Bulletins

ᐃᖃᓗᐃᑦ, ᓄᓇᕗᑦ ᒫᑦᓯ 18, 2022 – ᒪᑐᐃᖅᑕᐅᕙᓪᓕᐊᑎᓪᓗᒋᑦ ᑭᒃᑯᑐᐃᓐᓇᓕᒫᓄᑦ ᐋᓐᓂᐊᖅᑐᓕᕆᓂᕐᒧᑦ ᑭᓪᓕᓕᐅᕈᑕᐅᓯᒪᓚᐅᖅᑐᑦ ᓄᓇᕗᒥ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᒪᑐᐃᕐᓯᑲᓐᓂᕐᓂᐊᓕᕐᖓᑕ ᐊᐅᔪᐃᑦᑐᕐᒥᒃ ᖁᑦᑎᓂᕐᐹᒥᓪᓗ ᑲᓇᑕᒥ ᒥᕐᖑᐃᓯᕐᕖᓐᓂᒃ ᐳᓚᕋᑦᑎᓄᑦ, ᐊᑐᓯᓂᐊᖅᑐᖅ ᒫᑦᓯ 18, 2022.

ᐳᓚᕋᑦᑏᑦ ᐋᖅᑭᔅᓱᐃᔪᒪᔪᑦ ᐊᑎᓕᐅᖅᑕᐅᓂᕐᒥᒃ ᐊᕐᕌᒍᓂᐊᖅᑐᒧᑦ ᐅᖄᓚᖃᑦᑕᕈᓐᓇᖅᑐᑦ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᐊᐅᔪᐃᑦᑐᕐᒧᑦ ᖁᑦᑎᓂᕐᐹᒧᓪᓗ ᑲᓇᑕᒥ ᒥᕐᖑᐃᓯᕐᕕᓐᓄᑦ. ᑕᑯᓂᐊᕐᐸᑦᑐᑦ ᑎᓕᐅᖅᑕᐅᕗᑦ ᑕᑯᓂᐊᖃᑦᑕᖁᔭᐅᓪᓗᑎᒃ ᒥᕐᖑᐃᓯᕐᕖᑦ ᒥᔅᓵᓄᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᓐᓂᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑐᑭᓯᒋᐊᕈᑎᖃᕐᕕᖓᑦ ᐊᖅᑯᑎᒋᓗᒍ. ᑐᑭᓯᒃᑲᓐᓂᖃᑦᑕᓂᐊᕐᖓᑕ ᑭᓱᑦ ᐱᓕᕆᐊᔅᓴᑦ ᐊᑐᖅᑕᐅᔪᓐᓇᕐᒪᖔᑕ, ᐳᓚᕋᑦᑎᓄᑦ ᐊᑦᑕᓇᖅᑐᒦᑦᑕᐃᓕᔾᔪᑎᔅᓴᐃᑦ ᐊᒻᒪᓗ ᐊᐅᓪᓚᕐᓯᒪᓂᐊᕐᓗᓂ ᐸᕐᓇᐃᓂᕐᒧᑦ, ᐃᓚᒋᔭᐅᓪᓗᑎᒃ ᑐᑭᓯᒋᐊᖃᑦᑕᕕᔅᓴᐃᑦ ᐊᒻᒪᓗ ᐃᑲᕐᕋᖏᑦ ᐊᐅᓚᓂᕆᕙᑦᑕᖏᑕ ᒥᕐᖑᐃᓯᕐᕕᓐᓄᑦ ᐊᓪᓚᕝᕖᑦ. ᑐᑭᓯᑦᑎᑕᐅᖃᑦᑕᕆᐊᖃᕐᓂᖅ ᐊᒻᒪᓗ ᐊᑎᓕᐅᖃᑦᑕᕆᐊᖃᕐᓂᖅ ᓱᓕ ᑖᒃᑯᐊ ᐊᑐᖅᑕᐃᓴᐃᓐᓇᖃᑦᑕᕆᐊᓖᑦ ᐳᓚᕋᑦᑎᓕᒫᓄᑦ ᐃᓯᕐᓂᐊᖅᑐᓄᑦ ᓄᓇᕗᒥ ᑲᓇᑕᒥ ᒥᕐᖑᐃᓯᕐᕕᓐᓄᑦ.

ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᖅᑲᐃᑎᑦᑎᒋᐊᕈᒪᕗᑦ ᑲᓇᑕᒥᐅᓂᑦ ᓱᓕ ᓇᐅᑦᑎᕐᓱᖅᑎᐊᖃᑦᑕᖁᓪᓗᒋᑦ ᐊᒻᒪᓗ ᕿᒥᕐᕈᔫᒥᖃᑦᑕᖁᓪᓗᒋᑦ ᐊᑐᖅᑐᓕᒫᓂᑦ ᐊᐅᓪᓚᖃᑦᑕᓂᕐᒧᑦ ᑭᓪᓕᓕᐅᕈᑕᐅᓯᒪᔪᓂᑦ, ᐊᒻᒪᓗᑦᑕᐅᖅ ᑲᓇᑕᒥ, ᐅᑭᐅᖅᑕᖅᑐᒥ ᐊᒻᒪᓗ ᓄᓇᖓᓐᓂ ᐃᓄᓕᒫᓄᑦ ᐋᓐᓂᐊᖅᑐᓕᕆᓂᕐᒧᑦ ᐊᑐᖅᑕᐅᖁᔭᐅᓯᒪᔪᓂᑦ, ᐊᒻᒪᓗ ᖃᓄᓕᒫᖅ ᐱᓇᓱᐊᑦᑎᐊᖃᑦᑕᖁᓪᓗᒋᑦ ᐊᑦᑕᓇᖅᑐᒦᖁᓇᒋᑦ ᐊᒻᒪ ᐊᑦᑕᓇᖅᑐᒦᑎᑦᑎᓂᐊᙱᒻᒪᑕ.

ᑲᓇᑕᒥ ᒥᕐᖑᐃᓯᕐᕖᑦ ᓄᓇᕗᒥ ᑎᑭᑕᐅᒐᔪᓲᖑᒻᒪᑕ ᖃᓂᒋᔭᖏᑎᒍᑦ ᓄᓇᓖᑦ ᓚᐃᓴᓕᓐᓂᑦ ᐊᐅᓪᓚᔾᔨᔨᓂᑦ ᐊᑐᖅᑐᑎᒃ. ᐳᓛᕆᐊᕈᒪᒐᔭᖅᑐᑦ ᖃᐅᔨᒋᐊᖃᑦᑕᕆᐊᓖᑦ ᒥᕐᖑᐃᓯᕐᕕᓐᓄᑦ ᐃᖅᑲᓇᐃᔭᖅᑎᓄᑦ ᓇᓗᓇᐃᑦᑎᐊᖃᑦᑕᓂᐊᕐᖓᑦ ᑭᒃᑯᑦ ᐊᑐᖅᑐᒥᒃ ᒥᕐᖑᐃᓯᕐᕕᓐᓄᑦ ᐱᓕᕆᐊᖃᕐᓂᕐᒧᑦ ᓚᐃᓴᖃᕐᒪᖔᑕ. ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐳᓚᕋᑦᑎᓂᑦ ᑎᓕᐅᕆᕗᑦ ᐃᖏᕐᕋᓂᕐᒧᑦ ᐃᓂᔅᓴᓕᐅᖃᑦᑕᖁᓪᓗᒋᑦ ᓯᕗᓂᐊᓗᐊᒍᑦ ᐊᐅᓪᓚᕐᓯᒪᕕᒋᔪᒫᖅᑕᖏᑕ ᑕᐃᒫᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᐱᔨᑦᑎᕋᐅᑏᑦ ᐃᓪᓗᖁᑎᖏᓪᓗ ᐊᑐᕆᐊᖃᕋᔭᖅᑕᖏᑦ ᐊᑐᐃᓐᓇᐅᒐᓗᐊᕐᒪᖔᑕ. ᐱᓕᕆᕖᑦ ᑐᔅᓯᕋᐅᓯᐅᕈᒪᔪᑦ ᓚᐃᓴᖃᕐᓗᑎᒃ ᐊᐅᓪᓚᐅᔾᔨᔨᐅᓂᕐᒧᑦ ᓄᓇᕗᒥ ᒥᕐᖑᐃᓯᕐᕕᓐᓄᑦ 2022ᒧᑦ ᐅᖃᕐᕕᖃᖃᑦᑕᕆᐊᓖᑦ ᒥᕐᖑᐃᓯᕐᕕᓕᕆᔨᒃᑯᑦ ᐊᓪᓚᕝᕕᖓᓐᓂᒃ.

ᒪᓕᑦᑐᑎᒃ ᐅᖃᐅᔾᔨᒋᐊᕈᑎᒋᓯᒪᔭᖏᓐᓂᒃ ᒥᕐᖑᐃᓯᕐᕕᒻᒥ ᐃᓄᐃᑦ / ᒐᕙᒪᒃᑯᓐᓂᑦ ᐸᕐᓇᐃᓂᕐᒧᑦ ᒥᕐᖑᐃᓯᕐᕕᓕᕆᓂᕐᒧᓪᓗ ᑲᑎᒪᔨᕋᓛᑦ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᒪᑐᓯᓚᐅᕐᓯᒪᒻᒪᑕ ᑲᓇᑕᒥ ᒥᕐᖑᐃᓯᕐᕕᓐᓂᑦ ᐳᓚᕋᑦᑎᓄᑦ ᐃᓱᒪᑕᖓᑕ ᐱᖁᔨᓂᖓ ᒪᓕᑦᑐᒍ ᒫᑦᓯ 18, 2020ᑎᓪᓗᒍ ᐱᔾᔪᑎᒋᓪᓗᒍ ᓄᕙᕐᔪᐊᓇᖅᑐᒧᑦ−ᖃᓂᒪᓇᖅᑐᖅ ᓄᓇᕐᔪᐊᓕᒫᒥ. ᐃᓄᐃᑦ ᐊᑐᖅᑐᑎᒃ ᐱᔪᓐᓇᐅᑎᖏᓐᓂᒃ ᑖᒃᑯᓇᓂ ᓄᓇᕗᑦ ᐊᖏᖃᑎᒌᒍᑎᖏᓐᓂ ᓱᓕ ᐃᓯᖃᑦᑕᕈᓐᓇᓚᐅᖅᑐᑦ ᒥᕐᖑᐃᓯᕐᕕᓐᓄᑦ ᑲᓇᑕᒥ ᓄᓇᕗᒥ ᒪᑐᓯᒪᒐᓗᐊᖅᑎᓪᓗᒋᑦ. ᐊᐅᔪᐃᑦᑐᖅ ᒥᕐᖑᐃᓯᕐᕕᒃ ᒪᑐᐃᔪᔪᖅ ᑭᓯᐊᓂ ᑭᓪᓕᖃᖅᑎᑎᓪᓗᑎᒃ ᖃᑦᑎᓂᑦ ᐃᓯᖃᑦᑕᕈᓐᓇᓂᐊᕐᒪᖔᑕ ᐳᓚᕋᑦᑎᓄᑦ ᐋᒡᒌᓯ 1, 2021ᖑᑎᓪᓗᒍ, ᒪᑐᓕᔪᒻᒥᔪᖅ ᑎᓯᐱᕆ 23, 2021ᖑᑎᓪᓗᒍ ᓄᕙᕐᔪᐊᓇᖅᑐᖅ ᓯᐊᒻᒪᐸᓪᓕᐊᓕᕐᓂᖓᓄᑦ ᓄᓇᕗᙵ.

ᑐᑭᓯᒋᐊᕐᕕᔅᓴᖅ:
ᒥᕐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᓄᓇᕗᒥ ᐊᓪᓚᕝᕕᐊᓄᑦ
1-867-975-4673
nunavut.info@pc.gc.ca