ᓄᓇᖃᖅᑳᖅᓯᒪᔪᓂᒃ ᐱᓯᒪᑦᑎᑦᑎᐊᕐᓂᕐᒧᑦ ᐱᖁᔭᐃᑦ

ᐃᓗᓕᖏᑦ

• ᑐᓴᕋᔅᓴᖅ ᓄᓇᖃᖅᑲᖅᓯᒪᔪᓂᒃ ᑲᒪᑦᑎᐊᕐᓂᕐᒨᖓᔪᓕᕆᔩᑦ
• ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᕐᒧᑦ ᑭᓲᒻᒪᖔᖅ ᓇᓗᓇᐃᖅᑕᐅᓂᖓ
• ᐱᒋᐊᕐᕕᔅᓴᖓ ᐅᓪᓗᒃ
• ᐱᔾᔪᑎᖏᑦ
• ᐱᖁᔭᐅᑉ ᑐᕌᒐᖏᑦ
• ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᐊᑐᐊᕈᑏᑦ ᐅᑉᐱᕆᔭᖏᓐᓄᑦ ᒪᓕᒐᖏᓐᓄᓪᓗ
• ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᖏᑦ
• ᑭᒃᑯᓐᓄᑦ ᐊᑐᖅᑕᐅᒋᐊᖃᕐᒪᖔᖅ ᓂᕆᐅᒋᔭᐅᔪᓪᓗ ᑭᖑᓂᖓᓐᓂ
• ᓴᓐᖏᓂᖃᖅᑐᐃᑦ
• ᑎᒍᒥᐊᖅᑕᐅᔪᑦ ᑲᒪᒋᔭᐅᒋᐊᓖᓪᓗ
• ᕿᒥᕐᕈᔭᐅᖃᑦᑕᕆᐊᖃᕐᓂᖏᑦ
• ᑐᑭᖏᑦ
• ᖃᐅᔨᒋᐊᕐᕕᔅᓴᐃᑦ

ᑐᓴᕋᔅᓴᖅ ᓄᓇᖃᖅᑲᖅᓯᒪᔪᓂᒃ ᑲᒪᑦᑎᐊᕐᓂᕐᒨᖓᔪᓕᕆᔩᑦ

ᑲᓇᑕᓂ ᒥᕐᖑᐃᖅᓯᕐᕕᒃᑯᑦ ᐃᑲᔪᖅᑐᐃᕗᑦ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕐᓂᕐᒨᖓᔪᓂᒃ, ᓄᓇᕗᑦ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕐᓂᕐᒨᖓᔪᓕᕆᔩᑦ, ᐊᔭᐅᖅᑐᐃᓂᐊᕋᑦᑕ ᓄᓇᖃᖅᑳᖅᓯᒪᔪᓂᒃ ᑐᑭᓯᑎᑦᑎᑲᓐᓂᕐᓗᑕ ᐃᑲᔪᖅᑎᒌᓪᓗᑕ ᑕᒪᒃᑯᐊ ᐱᔭᕆᐊᖃᖅᑐᑦ ᑲᒪᒋᑦᑎᐊᕆᐊᓖᑦ ᐊᑐᓕᖅᑎᑕᐅᓗᑎᑦ ᑕᕝᕙᓃᑦᑐᑦ ᐱᖁᔭᑦ.

ᓄᓇᖃᖅᑳᖅᓯᒪᔪᑦ ᐱᖅᑯᓯᖏᑦ, ᐃᓄᖏᑦ ᐃᓛᒃᑰᖓᓐᖏᑦᑎᐊᕐᖓᑕ ᓯᓚᕐᔪᐊᒥ. ᓈᒪᔪᑦ, ᑕᐃᒪᐃᓪᓗᐊᕇᒻᒪᑕ ᓯᓚᕐᔪᐊᖅ ᑐᑭᓯᒋᐊᖃᕐᖓᑕ ᑕᒪᒃᑯᓂᖓ ᐆᒪᔪᓕᒫᑦ ᐆᒪᓂᖏᓐᓂᓪᓗ ᐊᑦᑐᐊᖏᓐᓇᕐᖓᑕ ᐃᓛᒃᑰᕈᓐᓇᖏᑦᑐᑦ, ᑕᐃᒪᐃᓪᓗᐊᖅᑐᑦ ᐊᕕᔅᓯᒪᒍᓐᓇᖏᑦᑐᑦ. ᑕᒪᓐᓇ ᖃᐅᔨᒪᔭᐅᔪᖅ ᐱᒋᐊᕈᑕᐅᓯᒪᔪᖅ ᐊᑦᑐᐃᓂᖃᕐᖓᑦ ᑕᐃᒃᑯᓄᖓ ᐊᓯᖏᓐᓄᓪᓗ. ᑕᒻᒪᓐᓇ ᐊᑦᑐᐊᖃᑎᒌᓐᓂᖅ ᐊᓯᒥᓄᒃ ᐅᖃᖅᓯᒪᒻᒪᑦ “ᑭᓱᓕᒫᑦᑎᐊᑦ ᐊᑦᑐᐊᖃᑎᒌᒻᒪᑕ”. ᑕᐃᒪᐃᓐᓂᖓᓐᓄᑦ ᑲᒪᒋᐊᖃᓕᕋᑦᑕ ᑕᐃᒪᐃᓪᓗᐊᖅᑎᑦᑎᓗᑕᓗ ᐊᓯᓕᒫᖏᓐᓂ ᑎᒥᐅᔪᓂᒃ ᐃᑉᐱᒋᑦᑎᐊᕐᓗᒋᓪᓗ ᐱᓯᒪᑦᑎᐊᕐᓗᒋᓪᓗ ᓄᓇᐃᑦ, ᐃᒪᐃᑦ ᓯᑯᓪᓗ ᐅᑭᐅᖅᑕᖅᑐᒥ. ᑕᒪᒃᑯᐊ ᐊᑦᑐᐊᖃᑎᒌᑦᑐᑦ, ᓄᓇᖃᖅᑳᖅᓯᒪᔪᑦ ᐃᒪᒋᔭᖏᓐᓂ ᑲᒪᑦᑎᐊᕆᐊᖃᕐᖓᑕ, ᑐᑭᓯᐅᒪᓗᓯᓗ ᐃᑲᔫᑎᐅᒻᒪᑕ ᐅᕙᑦᑎᓐᓄᑦ ᓯᓚᕐᔪᐊᒥ, ᑲᒪᑦᑎᐊᕆᐊᖃᕐᒥᒐᑦᑕ ᐸᖅᑭᓗᒋᑦ ᑕᒪᒃᑯᐊ ᑭᖑᕚᑦᑎᓐᓄᑦ ᐊᑐᖅᑕᐅᒋᐊᖃᓛᕐᒥᒻᒪᑕ.

ᐊᑐᓕᖅᑎᑕᐅᑎᓪᓗᒍ ᑖᓐᓇ ᐱᖁᔭᖅ ᐱᓕᕆᖃᑎᒌᓐᓂᕐᒧᑦ ᐸᕐᓇᐅᑎᓕᐅᕐᓗᑕᓗ, ᑲᒪᑦᑎᐊᕆᐊᖃᕋᑦᑕ ᐱᓕᕆᖃᑎᒌᑦᑎᐊᕐᓗᑕ, ᑭᓱᓪᓗ ᐊᖏᓂᖅᓴᐅᔪᖃᓐᖏᓪᓗᑎᑦ ᑕᐃᒪᐃᓪᓗᐊᖅᑎᓪᓗᒋᑦ, ᐃᑉᐱᒋᑦᑎᐊᕐᓗᒋᓪᓗ.

ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᕐᒧᑦ ᑭᓲᒻᒪᖔᖅ ᓇᓗᓇᐃᖅᑕᐅᓂᖓ

ᐃᖅᑲᐅᒪᒍᓐᓇᓂᓕᒫᓐᓂᓪᓕ, ᑭᓇᐅᓂᕐᓂᑦ ᓄᓇᖃᖅᑳᖅᓯᒪᔪᓪᓗᖓ ᐊᕙᑎᓐᓃᓐᖔᖅᓯᒪᒻᒥᔪᖅ ᑐᓐᖓᕕᐅᓪᓗᖓ ᓄᓇᒥᑦ ᐊᕙᑎᑦᑎᓐᓂ, ᐃᓚᑦᑎᓐᓂ, ᓄᓇᑦᑎᓐᓂ ᓯᕗᓕᖅᑎᓂᓪᓗ. ᐅᖃᐅᔾᔭᐅᖃᑦᑕᖅᓯᒪᒐᒪ ᐃᓕᓴᖅᓯᖁᔭᐅᓪᓗᖓ ᐅᐱᒋᓗᒍᓪᓗ ᐊᑦᑐᐊᔪᓕᒫᑦ, ᐅᐱᒋᓗᒋᑦ ᐱᕈᖅᑐᐃᑦ ᓂᕐᔪᑏᑦ ᐅᕙᑦᑎᓐᓄᑦ ᓇᒻᒥᓂᖅ ᑐᓂᕙᑦᑐᑦ ᓂᕆᒍᓐᓇᕐᓂᐊᕋᒪ ᓴᓐᖏᔫᓗᖓᓗ, ᐱᒃᑯᒋᑦᑎᐊᕐᓗᒋᓪᓗ ᐃᒪᕗᑦ ᑎᒥᑦᑎᓐᓂ ᐆᒪᑎᑦᑎᔪᑦ ᓴᓗᒪᑎᑦᑎᔪᑦ ᒪᒥᓴᖅᑎᑦᑎᔪᓪᓗ. ᐃᓕᓴᕆᒻᒥᓗᒋᓗ ᐅᐱᒋᓗᒋᑦ ᑕᒪᒃᑯᐊ ᐊᑦᑐᐊᔪᑦ ᐅᕙᑦᑎᓐᓃᓐᖏᓐᓇᕆᐊᓖᑦ, ᐊᑦᑐᐊᒻᒪᑕ ᐅᕙᑦᑎᓐᓂ ᐆᒪᑎᑦᑎᒻᒪᑕ, ᒪᑭᑕᑎᑦᑎᒻᒪᑕ ᐃᑲᔪᖅᑐᐃᒻᒪᑕ. ᑭᓇᐅᑎᑦᑎᔪᑦ ᐅᕙᓐᓂᑦ.

ᑕᒪᒃᑯᓂᖓ ᐊᑦᑐᐊᑎᓪᓗᑕ ᑲᒪᖃᑦᑕᕆᐊᖃᕋᑦᑕ, ᐃᓕᓐᓂᐊᖅᑎᑕᐅᓯᒪᖓᒪ ᑲᒪᖃᑦᑕᕆᐊᖃᕐᓂᑎᓐᓂ ᐊᑦᑐᐊᓗᑕ ᐃᓅᓯᑦᑎᓐᓂ ᐆᒪᑎᑦᑎᔪᓕᒫᓂᒃ, ᐊᒻᒪᓗ ᐃᑲᔪᖅᑐᐃᓗᑕᓗ ᐊᑐᐊᖅᓯᑎᑦᑎᓗᑕᓗ. ᑲᒪᒋᐊᖃᕐᒥᒐᒪ ᐃᑉᐱᒋᑦᑎᐊᕐᓗᒋᑦ ᑕᒪᒃᑯᐊ, ᖁᔭᒋᓗᒋᓪᓗ ᐊᒻᒪᓗ, ᐱᓯᒪᑦᑎᐊᕐᒥᓗᒋᑦ ᐊᔪᕐᓇᖏᑉᐸᑦ ᐅᕙᓐᓂᑦ ᐱᓯᒪᑦᑎᔪᑦ. ᑕᐃᒫᒃ ᐅᐱᒋᑦᑎᐊᕆᐊᓕᕗᑦ ᐃᓕᓐᓂᐊᑎᑦᑎᓗᑕᓗ, ᓯᓚᑐᓂᕐᒥᑦ ᒪᓕᒐᕐᓂᓪᓗ ᐃᓚᑦᑎᓐᓄᑦ, ᓄᓇᑦᑎᓐᓄ ᑲᓇᑕᒧᓪᓗ ᐊᒻᒪᓗ ᓯᕗᓕᒥᓂᑦᑎᓐᓂ, ᐊᒻᒪᓗ ᐃᓕᓐᓂᐊᑎᑦᑎᖃᑦᑕᕐᓗᑕ ᐱᕈᖅᑐᓃᓐᖔᖅᑐᓂᒃ ᓂᕐᔪᑎᓂᓪᓗ. ᑕᐃᒫᒃ ᐅᐱᒋᔭᖃᑦᑎᐊᖏᓐᓇᖅᑐᖓ ᐱᓕᕆᖃᑎᖃᖅᑐᖓᓗ ᐊᑦᑐᐊᓂᖃᖅᑐᖓᓗ ᓄᓇᕐᔪᐊᒧᑦ.

ᑭᓇᐅᓂᕋ ᓄᓇᖃᖅᑳᖅᓯᒪᔫᓪᓗᖓ ᓇᓗᓇᐃᖅᓯᒪᔪᑦ ᑕᒪᒃᑯᓄᖓ ᐊᑦᑐᐊᓂᖃᓂᖏᓐᓄᑦ ᑲᒪᒋᔭᕆᐊᖃᕐᓂᑎᓐᓄᑦ, ᐃᓅᓯᒪᓂᕐᓂᓪᓗ. ᐃᒻᒥᒃᑰᖅᑐᓂ, ᐅᑉᐱᕆᔭᕆᐊᖃᕋᑦᑎᒍ ᑲᒪᑦᑎᐊᖏᓐᓇᕐᓗᑕ ᐊᑦᑐᐊᓂᑦᑎᓐᓂ ᑲᒪᒋᔭᕆᐊᖃᕐᓂᑎᓐᓂᓪᓗ ᒥᑭᓪᓕᑎᖅᑕᐅᓯᒪᓗᐊᖃᑦᑕᕐᖓᑕ ᐅᖃᕋᐃᒐᓗᐊᕋᑦᑕ ᓄᓇᖃᖅᑳᖅᓯᒪᔪᑎᒍᑦ ᑲᒪᑦᑎᐊᕆᐊᖃᕐᓂᖏᓐᓂ.

ᑭᓯᐊᓂᓕ, ᑲᒪᑦᑎᐊᕆᐊᖃᕋᓗᐊᖅᑎᓪᓗᖓ ᐊᑦᑐᐊᓂᖃᑦᑎᐊᕐᓗᖓᓗ ᐊᕙᑎᑦᑎᓐᓄᑦ ᓇᕈᓗᑦᑕᐅᓯᒪᒻᒪᑕ ᒪᑯᓄ ᒪᓕᒑᓗᓐᓄᑦ, ᐱᖁᔭᕐᓂᑦ, ᐃᓕᖅᑯᓯᐅᕙᑦᑐᓂᒃ ᐃᓱᒪᒋᔭᐅᔪᓄᓪᓗ. ᐃᓚᖏᑦ ᒪᓕᒐᐃᑦ ᐱᖁᔭᐃᓪᓗ ᐃᓛᒃᑰᓕᖅᑎᑦᑎᓯᒪᒻᒪᑕ ᐱᖅᑯᓯᑦᑎᓐᓂ, ᒪᓕᒐᑦᑎᓐᓂ ᓄᓇᒧᑦ, ᓯᕗᓪᓕᒥᓂᑦᑕᓗ ᓄᓇᒥᓂᖏᓐᓂ, ᐃᓱᖃᖅᑎᑕᐅᓪᓗᑎᑦ ᐱᔪᓐᓇᕐᓂᕗᑦ ᐃᓯᕈᓐᓇᕐᓂᕗᓪᓗ ᓄᓇᓄᑦ. ᐊᓯᖏᓐᓂᓪᓗ ᓂᓪᓕᕈᓐᓇᖅᑎᑕᐅᓇᑕ ᖃᓄᖅ ᓄᓇᕗᑦ, ᐃᒪᕗᑦ, ᓯᑯᕗᓪᓗ, ᓂᕐᔪᑏᓪᓗ ᐱᕈᖅᑐᓪᓗ ᐆᒪᔪᓪᓗ ᐆᒪᓐᖏᑦᑑᒐᓗᐊᑦ ᑲᒪᒋᔭᐅᒋᐊᖃᕐᒪᖔᑦᑕ ᐅᐱᒋᑦᑎᐊᕐᓗᒋᑦ ᑲᒪᒋᑦᑎᐊᕆᐊᖃᖅᑐᒋᓪᓗ.

ᖃᓪᓗᓈᑦ ᐱᖅᑯᓯᖏᑦ ᐃᓱᒪᒋᔭᖏᓪᓗ ᐊᐳᖅᑕᕈᑕᐅᒃᑲᓐᓂᖅᓯᒪᒻᒪᑕ, ᐱᔭᕆᐊᑐᓕᒃᑲᓂᖅᑐᑎᑦ ᐅᕙᖓ ᐅᖃᕈᓐᓇᓂᕐᓄᑦ ᐃᓱᒪᒋᔭᒃᑲᓗ ᑐᓴᖅᑕᐅᒍᓐᓇᐃᓕᓪᓗᑎᑦ ᓂᐱᖃᕈᓐᓇᕐᓇᑕ, ᐅᕝᕙᓘᓐᓃᑦ ᐃᓚᕗᑦ ᓄᓇᓖᓪᓗ, ᑐᓴᖅᑕᐅᒍᓐᓇᐃᓕᓪᓗᑎᑦ. ᑕᒪᒃᑯᐊ ᐃᓕᖅᑯᓯᐅᔪᑦ ᐃᓱᒪᒋᔭᐅᔪᓪᓗ ᓂᓪᓕᐊᔾᔪᑕᐅᒍᓐᓃᖅᑐᑎᑦ ᓯᓚᑐᓂᖏᓪᓗ ᓯᕗᓕᑦᑕ, ᐱᕈᖅᑐᓂᒃ, ᐆᒪᔪᓂᒃ ᐊᓯᖏᓐᓂᓪᓗ ᑎᒥᐅᔪᓂᒃ ᐅᖃᕈᓐᓇᖅᑎᑕᐅᒍᓐᓃᖅᑐᑕ.

ᑕᒪᒃᑯᐊ ᒪᓕᒐᓕᒪᕌᓗᐃᑦ, ᐱᖁᔭᐃᑦ, ᐊᑐᖅᑕᐅᕙᑦᑐᓪᓗ ᐃᓱᒪᒋᔭᐅᔪᓪᓗ ᐱᔪᓐᓇᖅᑎᑕᐅᖃᑦᑕᖏᑦᑐᒍᑦ ᐊᒥᓱᐊᓗᓐᓄᑦ ᐊᑦᑐᐃᓂᖃᕐᓂᖏᓐᓄᑦ. ᐱᓕᕆᐊᕆᔭᕆᐊᓕᒐᓗᐊᒃᑲ ᑭᓇᐅᓂᓐᓂᑦ ᒪᓕᑦᑐᒋᑦ ᑲᔪᓯᑎᒍᓐᓇᖏᑦᑕᒃᑲ ᓄᓇᖃᖅᑳᖅᓯᒪᔫᓗᖓ ᑲᒪᑦᑎᐊᕆᐊᖃᕋᓗᐊᖅᑐᖓᓪᓗ. ᐃᓚᒃᑲᓗ ᐅᕙᒍᑦ, ᓄᓇᖅᑲᑎᒃᑲᓪᓗ ᐊᓯᖏᓪᓗ ᐊᒥᓱᑦ ᓄᓇᖃᖅᑳᖅᓯᒪᔪᑦ, ᑲᔪᓯᒍᓇᓚᐅᓐᖏᑦᑐᒍᑦ ᐱᓕᕆᖃᑎᖃᕆᐊᖃᕐᓂᑎᓐᓂ ᑲᒪᑦᑎᐊᕐᓗᑕ ᐊᕙᑎᑦᑎᓐᓂ, ᐅᕝᕙᓘᓐᓃᑦ ᐸᖅᑭᔭᐅᖃᑕᐅᓗᑕ ᓄᓇᓂᑦ. ᑕᐃᒪᐃᓐᓂᖓᓄᑦ, ᑲᔪᓯᒍᓐᓇᖏᓐᓇᑦᑕ ᓄᓇᖃᖅᑳᖅᓯᒪᓗᑕ ᑲᒪᒋᔭᐊᓕᑦᑎᓐᓂ ᐃᓕᓯᒪᔭᑦᑎᓐᓂ ᑭᒃᑰᓂᑦᑎᓐᓂ. ᑕᒪᒃᑯᐊ ᐅᕙᑦᑎᓐᓄᑦ ᐊᑦᑐᐃᓂᖃᕐᖓᑕ, ᓄᓇᖃᖅᑳᖅᓯᒪᔫᓪᓗᑕ ᐊᕙᑎᑦᑎᓄᓪᓗ. ᐃᓱᒪᓐᖑᐊᕐᓗᓂ ᐊᑦᑐᐊᓂᖃᓐᖏᓪᓗᓂ ᑭᓱᑐᐃᓐᓇᕐᓂᑦ ᐅᖃᐅᓯᑦᑎᓐᓄᑦ, ᐱᖅᑯᓯᑦᑎᓐᓄᑦ ᑭᒃᑰᓂᑦᑎᓂᓪᓗ ᒪᓕᒻᒪᑕ, ᐅᖃᐅᔾᔭᐅᓪᓗᑕᓗ ᐱᓯᒪᑦᑎᖃᑦᑕᕆᐊᖃᕐᓂᑎᓐᓂ ᐅᑉᐱᕆᓐᖏᑕᑦᑎᐊᑎᓐᓂ ᐱᔭᕆᐊᑐᖅᑖᔮᓐᖏᑦᑐᓂᓪᓘᓐᓃᑦ.

ᖃᓄᕐᓕ ᓄᓇᖃᖅᑳᖅᓯᒪᔪᖅ ᑲᒪᑦᑎᐊᕋᓱᐊᕐᓂᕐᒧᑦ ᐃᑲᔪᖅᑐᐃᒍᓐᓇᕐᖓᑕ ᓄᓇᖃᖅᑳᖅᓯᒪᔪᓂᒃ ᐊᖅᑯᑖᓂ ᑲᒪᓇᓱᐊᖅᑎᓪᓗᒋᑦ ᑭᒃᑯᓂᖏᓐᓂᓪᓗ ᓄᓇᖃᖅᑳᖅᓯᒪᓗᑎᑦ ᑲᒪᑦᑎᐊᕋᓗᐊᕐᓗᑎᑦ? ᖃᓄᕐᓕ ᐱᓕᕆᐊᔅᓴᖅ ᐃᑲᔪᕐᓂᖃᕈᓇᕐᖓᑦ ᐅᕙᑦᑎᓐᓄᑦ ᓄᑖᕈᖅᑎᑕᐅᓗᑎᑦ ᐱᓕᕆᖃᑎᖃᐃᓐᓇᕐᓗᓂᓗ ᓯᓚᕐᔪᐊᕐᒥᐅᓂᑦ ᐊᒻᒪᓗ ᑲᒪᒋᔭᕆᐊᓕᕗᑦ ᑲᔪᓯᑎᓪᓗᑎᒍ? ᖃᓄᖅ ᐱᓕᕆᐊᔅᓴᐅᔪ ᑐᑭᓯᑎᑦᑎᑲᓐᓂᕈᓐᓇᕐᖓᑦ, ᓄᓇᖃᖅᑳᖅᓯᒪᔪᓂᒃ, ᓄᓇᓂᑦ ᐱᖅᑯᓯᖏᓐᓂᓪᓗ ᐃᓛᒃᑰᖓᓐᖏᓐᓂᖏᓐᓂ? ᖃᓄᖅ ᐱᓕᕆᐊᔅᓴᐅᔪᖅ ᐱᓕᕆᖃᑎᒌᑦᑎᑦᑎᑲᓐᓂᕋᔭᕐᖓᑦ ᓄᓇᖃᖅᑳᖅᓯᒪᔪᓂᒃ ᑲᓇᑕᒥᓗ ᒥᕐᖑᐃᖅᓯᕐᕕᒃᑯᖏᓐᓂ ᐊᒻᒪᓗ ᑲᔪᓯᑎᑦᑎᑦᑎᐊᕋᓱᐊᕐᓗᓂ ᐊᑦᑐᐊᓂᖏᓐᓂ ᐆᒪᔪᓂᒃ ᐊᔾᔨᒌᓐᖏᑦᑐᓂᒃ, ᐱᐅᖅᓱᐊᕐᓂᕐᒧᑦ ᓯᓚᓗ ᐊᓯᔾᔨᐸᓪᓕᐊᑎᓪᓗᒍ ᐊᒻᒪᓗ ᐃᑦᑕᕐᓂᓴᓕᕆᓂᕐᒥᑦ?

ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᕐᒧᑦ ᐃᓗᓕᖏᑦ ᐃᑲᔪᖅᑐᐃᒍᓐᓇᕐᖓᑕ ᓄᓇᖃᖅᑳᖅᓯᒪᔪᓂᒃ ᐊᑐᓕᒻᒪᓴᕐᓗᑎᑦ ᐃᒻᒥᒃᑯᑦ ᓄᓇᓖᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓗᑎᑦ ᐊᔾᔨᒌᓐᖏᑦᑐᓂᒃ ᐱᓕᕆᖃᑎᒌᓪᓗᑎᑦ ᐊᐅᓚᑦᑎᓗᑎᒃ ᑲᑐᔾᔨᓗᑎᓪᓗ ᐊᑐᐊᒐᔅᓴᓂᒃ. ᑕᒪᓐᓇ ᐃᓚᓕᐅᔾᔨᓯᒪᔪᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᐃᓱᒪᓕᐅᕐᓂᕐᒥᑦ ᐊᒻᒪᓗ ᓂᓪᓕᐊᔾᔪᑎᖃᕐᓂᕐᒥᑦ ᓄᓇᖃᖅᑳᖅᓯᒪᔪᓂᒃ ᓯᕗᓕᖅᑎᐅᔪᓂᒃ ᐊᐅᓚᑦᑎᔾᔪᑎᓂᓪᓗ. ᓂᐱᖃᐅᑎᒋᔪᓇᖅᑕᖏᑦ ᓄᓇᖃᖅᑳᖅᓯᒪᔪᑦ ᐅᑉᐱᕆᔭᖏᑦ ᓯᕗᓪᓕᖅᐸᐅᑎᒋᐊᓕᖏᓪᓗ ᒪᑯᐊ ᓄᓇᐃᑦ, ᐃᒪᑦ ᓯᑯᓪᓗ ᓄᓇᖃᖅᑳᖅᓯᒪᔫᑦ ᐃᓅᓯᕆᒻᒪᒋᑦ ᓴᖅᑭᔮᖅᑎᐸᑦᑐᓂᒋᓪᓗ ᐸᖅᑭᕙᑦᑐᓂᒋᓪᓗ ᓄᓇᖃᖅᑳᖅᓯᒪᔪᑦ ᐊᑐᖃᑦᑕᖅᑕᖏᑦ. ᐊᑐᐃᓐᓇᖃᑦᑕᑎᓪᓗᒋᑦ ᑕᒪᒃᑯᐊ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᐆᒪᐃᓐᓇᕐᖓᑕ, ᓄᓇᖃᖅᑳᖅᓯᒪᔪᓪᓗ ᒪᓕᒐᖏᑦ ᐊᑐᖅᑕᐅᖏᓐᓇᕐᖓᑕ, ᑲᒪᒋᔭᕆᐊᓕᕗᑦ ᑲᔪᓯᑎᒋᐊᖃᕋᑦᑎᒍ, ᐊᒻᒪᓗ ᐱᓕᕆᖃᑎᖃᕐᓂᑎᓐᓂ ᓯᓚᕐᔪᐊᓕᒫᒥ, ᐃᓚᒌᓐᓂᒃ ᓄᓇᖅᑲᑎᑦᑎᓂᓪᓗ ᑲᔪᓰᓐᓇᕆᐊᖃᕐᖓᑕ.

1. ᐱᒋᐊᕐᕕᔅᓴᖓ ᐅᓪᓗᒃ

ᑖᓇ ᐱᖁᔭᖅ ᐊᑐᓕᕈᒫᖅᑐᖅ ᐅᓪᓗᖓ ᐅᖃᐅᓯᐅᓛᑐᐃᓐᓇᖅᑐᖅ.

2. ᐱᔾᔪᑎᖏᑦ

ᐱᔾᔪᑎᖏᑦ ᐱᖁᔭᐃᑦ ᐊᑐᐊᕈᑎᐅᓗᑎᑦ ᐊᑐᓕᖅᑎᑕᐅᓂᖏᓐᓂ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕐᓂᕐᒨᖓᔪᓂᒃ ᐊᒻᒪᓗ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ (ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓂᖏᑦ'), ᐱᖃᓯᐅᔾᔨᔪ ᐱᒋᐊᕈᑎᓕᒫᓂᒃ ᐅᖃᐅᓯᖃᖅᑐᓂᒃ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐊᑐᓕᖅᑎᑕᐅᒋᐊᖃᕐᓂᖏᓐᓂ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᓐᓂ ᐱᖁᔭᕐᓂᑦ. ᐊᓯᔾᔩᔪᒫᖅᑐᓂᒃ ᖃᓄᖅ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐊᐅᓚᑦᑎᖃᑦᑕᕐᓂᐊᕐᒪᖔᑕ. ᑖᓐᓇ ᐱᖁᔭᖅ ᐱᓕᕆᖃᑎᖃᕐᓗᓂ ᑲᒪᑦᑎᐊᕐᓂᕐᒧᑦ ᐸᕐᓇᐅᑎᓕᐅᕆᐊᓖᑦ ᐊᑐᓂ ᓄᓇᑐᖃᒥᓂᕐᓄᑦ ᐊᒻᒪᓗ ᑲᓇᑕᒥ ᐊᓪᓚᕕᖓᓐ ᓄᓇᖃᖅᑳᖅᓯᒪᔪᑦ ᐱᓕᕆᖃᑕᐅᔪᓂᒃ. ᑕᒪᒃᑯᐊ ᐸᕐᓇᐅᑏᑦ ᑐᓐᖓᕕᐅᒐᔭᖅᑐᑦ ᑲᒪᒋᔭᐅᓗᑎᓪᓗ ᓇᓗᓇᐃᔭᖅᓯᒪᔪᑦ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕐᓂᕐᒨᖓᔪᓂᒃ.

ᑲᓇᑕᐅᑉ ᒥᕐᖑᐃᖅᓯᕐᕕᖓ ᐋᖅᑭᔅᓱᐃᓯᒪᔪᑦ ᐊᐅᓚᑦᑎᓪᓗᑎᓪᓗ ᓄᓇᑐᖃᒥᓂᕐᓂᑦ ᐃᓚᓕᐅᔾᔨᓯᒪᒐᑎᑦ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᓐᖏᑦᑐᓂᓪᓗ ᑲᒪᑦᑎᐊᕆᐊᖃᕐᓂᖏᓐᓂ. ᐅᑭᐅᒐᓚᐅᓚᐅᖅᑐᓂᒃ, ᓄᑖᕐᓂᑦ ᐸᖅᑭᔭᐅᒋᐊᓕᓐᓂᑦ ᓇᓗᓇᐃᖅᓯᓚᐅᕐᖓᑕ ᐱᓕᕆᖃᑎᑲᖅᑐᑎᑦ ᓄᓇᖃᖅᑳᖅᓯᒪᔪᓂᒃ, ᑭᓯᐊᓂᓕ ᒫᓐᓇᕈᓗᒃ ᑕᒪᒃᑯᐊ ᐱᑐᖃᐃᑦ ᐅᓗᕆᐊᓇᖔᖃᑦᑕᖅᓯᒪᔪᑦ ᓄᓇᖃᖅᑳᖅᓯᒪᔪᑦ ᐊᑦᑐᐊᓂᖃᕈᓐᓃᖅᑐᑎᑦ ᐅᑭᐅᖅᑕᖅᑐᒧᑦ. ᑕᒪᓇ ᐊᑦᑐᐊᒍᓐᓂᕐᓂᖅ ᐸᕝᕕᓴᒻᒪᑦ ᐱᖅᑯᓯᖏᓐᓂ ᐊᑐᖅᐸᑦᑕᖏᓐᓂᓪᓗ, ᒪᓕᒐᖅᑎᒍᓪᓗ ᑎᓕᓯᔾᔪᑎᓂᒃ, ᐊᑦᑐᐊᔪᓂᒃ ᑭᖑᕙᕇᑦ ᖃᐅᔨᒪᓂᑐᖃᐅᔪᓂᒃ, ᐊᓯᒃᑲᓐᓂᐊᓗᖏᓐᓂᓪᓗ. ᑖᓐᓇ ᐱᖁᔭᖅ ᐃᑲᔪᖅᑐᐃᔪᖅ ᐅᑉᐱᕆᔭᖃᖅᑐᓂᓗ ᑲᓱᖅᓯᒪᓂᖏᓐᓂ. ᐃᓕᓴᖅᓯᓯᒪᔪᖅ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᖏᓐᓂ ᐱᐅᖅᓱᐊᕐᓗᑎᑦ ᑕᒪᒃᑯᓂᖓ ᐊᑐᐃᓐᓇᕈᓐᓇᖁᓪᓗᒋᑦ ᐱᕈᖅᑐᑦ ᐊᔾᔨᒌᓐᖏᑦᑐᓂᒃ ᐊᑦᑐᐊᑦᑎᐊᕐᓗᑎᓪᓗ ᐊᑐᖅᑕᐅᑦᑎᐊᕐᓗᑎᓪᓗ ᐳᓚᕋᖅᑎᓄᑦ. ᑖᓐᓇ ᐱᖁᔭᖅ ᐋᖅᑭᔅᓱᐃᖃᑎᖃᖅᑐᑎᑦ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᒨᖓᔪᓕᕆᕙᑦᑐᓂᒃ ᑐᑭᓯᑦᑎᐊᕋᓱᐊᖅᑐᑎᓪᓗ ᑲᒪᑦᑎᐊᕐᓗᑎᑦ ᐊᑐᕐᓗᑎᑦ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᓐᖏᑦᑐᓂᓪᓗ ᐊᑯᓐᓂᖏᓐᓃᑦᑐᓂᒃ ᑕᑯᔅᓴᐅᔪᓂᒃ.

ᑖᓐᓇ ᐱᔾᔪᑎᖓ ᐱᖁᔭᐅᑉ ᓇᓗᓇᐃᔭᕐᓗᒋᑦ ᑐᓐᖓᕕᔅᓴᐅᔪᑦ ᑕᐃᒪᐃᓪᓗᐊᑎᑦᑎᔫᒥᓗᑎᑦ, ᐊᑑᑎᖃᑦᑎᐊᕐᓗᑎᑦ ᑲᒪᑦᑎᐊᖃᑎᖃᕐᓗᑎᓪᓗ ᒫᓐᓇᒧᑦ ᓯᕗᓂᑦᑎᓄᓪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ. ᕿᒥᕐᕈᔭᐅᔾᔫᒥᒋᐊᓖᑦ ᐃᓚᒋᓪᓗᓂᐅᒃ ᐊᔅᓱᕉᑕᐅᔪᖅ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓄᑦ ᐊᑐᓕᖅᑎᑕᐅᒋᐊᖃᕐᓂᖏᓐᓄᑦ ᑲᑐᔾᔨᔩᑦ ᓯᓚᕐᔪᐊᒥ ᓇᓗᓇᐃᖅᑕᐅᓯᒪᓂᖏᓐᓄᑦ.

3. ᐱᖁᔭᐅᑉ ᑐᕌᒐᖏᑦ

ᒪᕐᕈᓪᓗᐊᑕᐅᒻᒪᑎᒃ ᑐᕌᒐᐃᑦ ᓄᓇᖃᖅᑳᖅᓯᒪᔪᓄᑦ ᑲᒪᑦᑎᐊᕆᐊᖃᕐᓂᕐᒧᑦ ᐱᖁᔭᐃᑦ. ᓯᕗᓪᓕᖅᐹᒥ, ᐱᖁᔭᐃᑦ ᐊᑐᐊᖅᓯᔾᔪᑕᐅᕗᑦ ᒪᓕᒋᐊᖃᕐᓂᖏᓐᓄ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᒨᖓᔪᓂᒃ (ᑕᑯᓗᒍ ᐃᓚᖓ 5) ᓄᓇᑐᖃᓕᒫᓂᒃ ᐊᒻᒪᓗ ᐃᓗᐊᓃᑦᑐᓂᒃ ᑲᓇᑕᐅᑉ ᐊᓪᓚᕕᖏᑦᑕ ᑲᑎᒪᔨᐅᕕᖏᓐᓂ.

ᐊᐃᑉᐸᖓ ᑐᕌᒐᖓ ᐱᖁᔭᐅᑉ ᐊᖅᑭᔅᓱᐃᓗᑎᑦ ᒪᓕᒐᕐᓂᑦ ᐃᑲᔪᖅᑐᐃᔾᔪᑕᐅᒐᔭᖅᑐᓂᒃ ᐱᖅᑯᓯᕐᓂᑦ ᑲᔪᓯᑎᑦᑎᓂᕐᒥᑦ ᐃᑲᔪᖅᑐᐃᓂᒃᑯᑦ, ᒪᑭᑦᑎᑕᐅᒃᑲᓂᕐᓗᑎᑦ, ᖁᕕᐊᓲᑎᒋᔭᐅᖃᑦᑕᕐᓗᑎᑦ, ᐱᓕᕆᖃᑎᖃᕐᓂᐅᔪᑦ ᐊᒻᒪᓗ ᐊᑦᑐᐊᓂᖃᕐᓗᑎᑦ ᓄᓇᖃᖅᑳᖅᓯᒪᔪᑦ ᓄᓇᒧᑦ, ᐃᒪᕐᒧᑦ, ᓯᑯᓄᓪᓗ ᐃᑲᔪᖅᑐᕐᓗᒋᓪᓗ ᓄᓇᖃᖅᑳᖅᓯᒪᔪᑦ ᐃᓅᓯᕆᓲᖏᓐᓂ ᐊᒻᒪᓗ ᓯᓚᕐᔪᐊᒥ ᑕᑯᓐᓇᖅᑕᐅᓂᖏᓐᓄᑦ.

4. ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᐊᑐᐊᕈᑏᑦ ᐅᑉᐱᕆᔭᖏᓐᓄᑦ ᒪᓕᒐᖏᓐᓄᓪᓗ

ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᐱᖁᔭᐃᑦ ᐅᖃᖅᓯᒪᔪᑦ ᐱᔾᔪᑎᖏᓐᓂ ᐅᑉᐱᕆᔭᖏᓐᓂ ᒪᓕᒐᕐᓂᓪᓗ ᑐᓐᖓᕕᐅᔪᓂᒃ ᐱᓕᕆᐊᓕᒫᖏᓐᓄᑦ ᓄᓇᖃᖅᑳᖅᓯᒪᔪᑦ ᐱᓕᕆᖃᑕᐅᔪᑦ. ᐅᑉᐱᕆᔭᖏᑦ ᐅᑉᐱᕈᓱᓐᓂᕐᒧᑦ, ᐃᑉᐱᒍᓱᑦᑎᐊᕐᓂᕐᒧᑦ ᐊᒻᒪᓗ ᐱᓕᕆᖃᑎᒌᓐᓂᕐᒧᑦ ᓇᓗᓇᐃᖅᓯᓯᒪᒻᒪᑕ ᐅᑉᐱᕆᔭᑦᑎᓐᓂ ᐅᖃᐅᓯᕆᕙᑦᑕᓂᓪᓗ ᐱᒻᒪᕆᐅᒋᔭᑦᑎᓐᓂ. ᑕᒪᒃᑯᐊ ᐃᑲᔫᑎᖃᕐᖓᑕ ᐃᓱᒪᓕᐅᖅᑎᓪᓗᖏᑦ ᐅᑉᐱᕆᔭᑦᑎᓐᓂ ᐊᑐᐊᕈᑎᑦᑎᓂᓪᓗ ᖃᐅᑕᒫᑦ ᐱᒋᐊᕈᑕᐅᕙᑦᑐᓂᒃ, ᐃᑉᐱᒍᓱᓐᓂᒃᑯᑦ ᓂᕈᐊᕐᓂᕆᕙᑦᑕᓂᑦᑎᓂᓪᓗ. ᒪᓕᓪᓗᒋᓪᓗ ᒪᓕᒐᐃᑦ ᐱᔪᓐᓇᐅᑏᑦ ᐅᐱᕆᑦᑎᐊᕐᓗᒋᑦ ᐊᒻᒪᓗ ᑲᒪᒋᔭᐅᒋᐋᓖᑦ, ᑎᒍᓯᓗᑎᓪᓗ ᓄᓇᖃᖅᑳᖅᓯᒪᔪᑦ ᓄᓇᖃᖅᑳᖅᓯᒪᓐᖏᑦᑐᓪᓗ ᐊᑯᓐᓂᖏᓐᓂᑦᑐᓂᑦ, ᐱᐅᖏᓐᓇᕋᓱᑦᑎᐊᕐᓗᑎᓪᓗ, ᐃᑉᐱᒋᑦᑎᐊᕐᓗᒋᓪᓗ ᐱᓕᕆᖃᑎᒌᓐᓂᐅᔪᑦ, ᑲᔪᓯᑦᑎᐊᖁᓪᓗᒋᓪᓗ ᐅᖃᐅᓯᖏᑦ ᐱᖅᑯᓯᖏᓐᓂᓪᓗ ᓯᕗᓂᑦᑎᓐᓂ ᐊᑐᐊᕈᑕᐅᓗᑎᑦ ᐱᒋᐊᕈᑎᑦᑎᓐᓂ ᐃᓱᒪᓕᐊᖑᔪᓂᓪᓗ. ᑕᒪᒃᑯᐊᓗ ᒪᓕᐃᑦ ᑲᔪᓯᑎᑦᑎᑦᑎᐊᕐᓗᑎᑦ ᐅᑉᐱᕆᔭᑦᑎᓐᓂ.

ᑲᒪᒋᖃᓯᐅᑎᓪᓗᒋᑦ, ᐅᑉᐱᕆᔭᐅᔪᑦ ᒪᓕᒐᐃᓪᓗ ᖃᓄᖅᑑᕈᓐᓇᕐᓗᑎᑦ ᐊᕕᑦᑐᖅᓯᒪᔪᓂᒃ ᓄᓇᓕᓐᓂᓪᓗ ᑐᑭᓯᑎᑦᑎᑲᓐᓂᕐᓗᑎᑦ ᐊᐅᓚᔾᔪᑎᓂᓪᓗ, ᑲᓇᑕᒥᓗ ᐊᑐᐊᕈᑎᖃᕐᓗᑎᑦ. ᐃᓱᒪᒋᔭᐅᔪᑦ ᐅᓂᒃᑳᕆᔭᐅᖃᑦᑕᕐᓗᑎᑦ ᓄᓇᖃᖅᑳᖅᓯᒪᔪᓄᑦ ᒪᓕᑦᑎᐊᕐᓗᑎᑦ ᒪᓕᒐᕐᓂᑦ ᑐᕌᒐᓐᓄᓪᓗ ᐅᖃᐅᓯᕆᔭᐅᖃᑦᑕᕐᓗᑎᑦ ᓱᓕᔪᑦ ᓴᐃᒻᒪᖃᑎᒌᓐᓂᕐᒧᓪᓗ ᑭᓪᓕᓯᓂᐊᕐᓂᐅᔪᑦ, ᑲᓇᑕᒥᓗ ᕿᒥᕐᕈᔭᐅᔪᓂᒃ ᔭᒐᓯᒪᔪᓂᒃ ᐃᓄᐊᖅᑕᐅᓯᒪᔪᓂᓪᓗ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᑦ ᓂᕕᐊᖅᓯᐊᓂᓪᓗ ᐊᒻᒪᓗ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ.

ᐅᑉᐱᕆᔭᐃᑦ

ᓱᓕᓂᖅ

ᓱᓕᔪᖅ ᑭᓱᓕᒫᑦᑎᐊᓃᒻᒪᑦ ᐱᔭᑦᑎᓐᓂ. ᑲᓇᑕᒥ ᒥᕐᖑᐃᖅᓯᕕᒻᒥ ᓄᓇᖃᖅᑳᖅᓯᒪᔪᑦ ᐅᑉᐱᕆᒐᑦᑎᒍ ᐱᓕᕆᖃᑎᕗᑦ ᐃᓕᓴᕆᓪᓗᑎᒍᓪᓗ ᓱᓕᓂᖅ ᐱᔭᕇᕈᓐᓇᖏᒻᒪᑦ, ᑭᓯᐊᓂ ᐊᓯᔾᔨᐸᓪᓕᐊᔪᖅ ᐱᕈᖅᐸᓪᓕᐊᓗᑎᓪᓗ. ᓱᓕᓂᖅ ᐊᖅᑐᖅᑕᐅᓴᕋᐃᒻᒪᑦ ᐃᓄᓐᓄᓪᓗ ᐊᑐᖅᑕᐅᒋᐊᓕᒃ; ᑕᐃᒫᑐᐃᓐᓇᖅ ᐱᕕᔅᓴᐅᖏᒻᒪᑦ ᑭᓯᐊᓂ ᐅᑉᐱᕆᔭᐅᕙᓪᓕᐊᓕᕐᓗᓂ ᐃᓱᒪᒋᔭᐅᑐᐃᓐᓇᕈᓐᓇᖏᑦᑐᖅ. ᐃᑉᐱᒍᓱᑦᑎᐊᕐᓂᐅᕗᖅ ᐱᑕᖃᖅᑎᓐᓇᒍ, ᐱᓕᕆᖃᑎᒌᑦᑎᐊᕈᓐᓇᖏᑦᑐᒍᑦ ᐃᑉᐱᒋᖃᑦᑕᐅᑎᑦᑎᐊᕐᓗᑕᓗ. ᓱᓕᓂᖅ ᐱᕙᓪᓕᐊᓲᖑᒻᒪᑦ ᐱᑕᖃᐃᓐᓇᕐᓗᓂᓗ ᓱᓕᖃᑎᒌᓐᓂᒃᑯᑦ ᐊᔾᔨᒌᑎᑦᑎᓂᒃᑯᓪᓗ.

ᐱᓕᕆᖃᑎᒌᓐᓂᖅ

ᐱᓕᕆᖃᑎᒌᓐᓂᖅ ᑐᑭᓯᐅᒪᓂᕐᒦᓐᖓᖅᑐᖅ ᐆᒪᔪᓕᒫᑦᑎᐊᑦ ᐊᑦᑐᐊᔪᐃᓐᓇᐅᒻᒪᑕ. ᐊᑦᑐᐊᔪᐃᓐᓇᐅᒐᑦᑕ ᐃᓕᓴᖅᓯᓯᒥᒪᔪᒍᑦ ᐱᒋᐊᕈᑎᒋᕙᑦᑕᕗᑦ ᐊᑦᑐᐃᓂᖃᖅᐸᑦᑐᑦ ᐊᓯᖏᓐᓂ ᑲᒪᒋᐊᖃᖅᑐᑕᓗ ᐃᑉᐱᒍᓱᑦᑎᐊᕐᓗᑕ ᐱᓕᕆᖃᑎᒌᑦᑎᐊᕐᓗᑕᓗ, ᐱᓯᒪᑦᑎᑦᑎᐊᕐᓗᑕ ᐃᓅᓇᓱᐊᑦᑎᐊᕐᓗᑕᓗ. ᐃᑲᔪᖅᑕᐅᓪᓚᕆᒃᑲᑦᑕ ᐱᓕᕆᖃᑎᖃᖅᑐᑕ ᓄᓇᑦᑎᓐᓃᖔᖅᑐᓂᒃ, ᐃᒪᑦᑎᓐᓂ ᓯᑯᑦᑎᓂᓪᓗ ᑲᒪᒋᑦᑎᐊᕆᐊᖃᕋᑦᑎᒍ ᑕᒪᒃᑯᐊ ᐱᓕᕆᖃᑎᒌᖏᓐᓇᕐᓗᑕᓗ ᐃᑉᐱᒋᑦᑎᐊᕐᓗᒋᓪᓗ ᐊᑦᑐᐊᓂᕗᑦ.

ᑲᒪᑦᑎᐊᕐᓂᖅ

ᑲᒪᑦᑎᐊᕐᓂᖅ ᐆᒪᔪᓕᒫᓂᒃ ᐃᑉᐱᒋᑦᑎᐊᕐᓗᑎᒍ, ᑕᐃᒪᐃᓪᓗᐊᖅᑎᓪᓗᑎᒍᑦ, ᐅᐱᒋᓗᑎᒍ, ᓇᓪᓕᒋᓗᑎᒍᑦ, ᐃᑉᐱᓐᓂᐊᑦᑎᐊᕐᓗᑎᒍ ᑐᓐᖓᓇᕐᕕᒋᓪᓗᑎᒍᓪᓗ. ᑕᐃᒫᒃ ᐱᐅᑦᑎᐊᕈᓐᓇᕋᑦᑕ, ᐃᑉᐱᒍᓱᑦᑎᐊᕐᓗᑕ ᑐᓐᖓᓇᕐᓗᑕᓗ ᐊᕙᑎᑦᑎᓐᓄᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᑦᑎᓐᓄᑦ ᑭᒃᑯᑐᐃᓐᓇᓄᓪᓗ ᐱᔨᑦᑎᕋᖅᑕᑎᓐᓄ. ᐊᑦᑕᓇᖅᑐᒦᑎᑦᑎᖏᓪᓗᑕ ᐃᓅᖃᑎᖃᑦᑎᐊᕐᓗᑕ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᑦᑎᓐᓂ, ᐃᖅᑲᓇᐃᔮᖅᑎᒍᑦ ᖃᓄᑐᐃᓐᓇᖅ ᐃᑲᔪᖅᑐᐃᓂᑦᑎᒍᑦ, ᐱᓕᕆᖃᑎᖃᑦᑎᐊᕐᓗᑕ, ᒪᑐᐃᖓᑦᑎᐊᕐᓗᑕᓗ, ᐊᔾᔨᒌᑎᑦᑎᔫᒥᓗᑕᓗ.

ᒪᓕᒐᐃᑦ

ᑲᒪᒋᔭᖃᑦᑎᐊᕐᓂᖅ ᐱᔪᓐᓇᐅᑎᓂᒃ, ᑲᒪᒋᔭᕆᐊᓕᓐᓂᒃ

ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐃᑉᐱᒍᓱᑦᑎᐊᕐᓂᐊᖅᑐᖅ ᓄᓇᖃᖅᑳᖅᓯᒪᔪᓂᒃ ᑎᒍᓯᒪᔭᖏᓐᓂ ᐱᔪᓐᓇᐅᑎᓂᒃ ᓇᒻᒥᓂᖅ ᐱᔪᒪᓂᖏᓐᓂ ᐊᑐᖃᑦᑕᖅᑕᖏᓐᓂᓪᓗ ᑲᔪᓯᑎᑦᑎᓗᑎᑦ ᐱᖅᑯᓯᖏᓐᓂ, ᐅᖃᐅᓯᖏᓐᓂ ᐃᓅᓇᓱᐊᕐᓂᖏᓐᓂᓪᓗ. ᐃᑲᔪᖅᑐᐃᓂᐊᖅᑐᒍᑦ ᓄᓇᖃᖅᑳᖅᓯᒪᔪᓂᒃ ᐱᔪᓐᓇᐅᑎᖏᓐᓂ ᐊᑐᖅᑎᓪᓗᒋᑦ ᑲᒪᑦᑎᐊᕋᓱᕐᓂᖏᓐᓂᓪᓗ ᓄᓇᓂᑦ, ᐃᒪᕐᒥ ᓯᑯᓂᓪᓗ. ᑐᓴᐅᒪᑎᑕᐅᓗᑕ ᒪᓕᒐᕐᒥᑦ 35−ᒥᑦ ᐱᖁᔭᕐᔪᐊᓃᑦᑐᓂᒃ, 1982, ᐊᖏᕈᑎᓂᒃ (ᐅᓪᓗᒥᓕᓴᕐᓂᑦ ᐅᐊᑦᑎᐊᕈᕐᓂᓴᕐᓂᓪᓗ), ᐊᓯᖏᓐᓂᓪᓗ ᐊᖏᕈᑎᐅᔪᓂᒃ ᓄᓇᖃᖅᑳᖅᓯᒪᔪᓂᒃ ᒐᕙᒪᑐᖃᒃᑯᓂᓪᓗ ᐊᒻᒪᓗ ᓯᓚᕐᔪᐊᑉ ᑲᑐᔾᔨᔨᖏᓐᓂ ᓇᓗᓇᐃᖅᑕᐅᓯᒪᔪᓂᒃ ᐱᓗᐊᖅᑐᒥᑦ ᒪᓕᒐᕐᓂᑦ 1-5, 25-26, 29.

ᑎᒍᓯᕙᓪᓕᐊᓂᖅ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᓐᖏᑦᑐᓂᓪᓗ ᐊᑯᓐᓂᖏᓐᓂᑦᑐᓂᒃ

ᑲᓇᑕᐅᑉ ᒥᕐᖑᐃᖅᓯᕐᕕᖏᑦ ᐱᓕᕆᖃᑎᖃᐃᓐᓇᕐᓂᐊᖅᑐᑦ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᓐᖏᑦᑐᓂᓪᓗ ᐊᑯᓐᓂᖏᓐᓃᑦᑐᓂᒃ ᐋᖅᑮᓇᓱᐊᕐᓗᑎᑦ ᐱᓕᕆᖃᑎᒌᑦᑎᐊᕐᓂᕐᒥᑦ. ᐱᓕᕆᖃᑎᒌᓐᓂᒃᑯᑦ ᑲᒪᑦᑎᐊᖃᑦᑕᕐᓗᑕ ᑐᓴᖅᑎᑕᐅᖃᑦᑕᕐᓗᑕᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᓯᓚᕐᔪᐊᒥᓗ, ᖃᓪᓗᓈᓪᓗ ᖃᐅᔨᒪᓂᖏᓐᓂ ᐅᑭᐅᒐᓴᓐᓄᑦ ᐊᑐᖅᑕᐅᓯᒪᔪᓂᒃ. ᑲᓇᑕᐅᑉ ᒥᕐᖑᐃᖅᓯᕐᕕᖓᑕ ᐱᓕᕆᔨᖏᑦ ᑲᒪᐃᓐᓇᕐᓂᐊᖅᑐᑦ ᐱᖅᑯᓯᕐᓂᑦ ᐊᑦᑕᓇᖅᑐᒦᑎᑦᑎᑦᑕᐃᓕᓗᑎᑦ ᓄᓇᖃᖅᑳᖅᓯᒪᔪᓂᒃ ᐃᑲᔪᖅᑐᐃᓗᑎᓪᓗ ᑲᑐᔾᔨᖃᑎᒌᓐᓂᒃ ᐱᖅᑯᓯᕐᓂᑦ ᑲᒪᔪᓂᒃ. ᐊᑦᑕᓇᖅᑐᒦᖁᓇᒋᑦ ᑕᒪᒃᑯᐊ, ᐃᓕᓴᖅᓯᓯᒪᓂᐊᖅᑐᒍᑦ, ᒪᒥᐊᓐᓂᐅᓚᐅᖅᓯᒪᔪᒥᓪᓗ, ᓱᓕᔪᓂᑦ ᐅᓂᒃᑳᕐᓂᕐᒥᑦ ᐱᓕᕆᖃᑎᒌᓐᓂᒃᑯᑦ ᓄᓇᖃᖅᑳᖅᓯᒪᔪᓂᒃ. ᐱᓕᕆᖃᑎᖃᕐᓗᑕ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᑐᖃᖏᓐᓂ, ᑲᓇᑕᐅᑉ ᒥᕐᖑᐃᖅᓯᕐᕕᒃᑯᖏᑦ ᐃᑉᐱᒍᓱᑦᑎᐊᕐᓂᐊᖅᑐᑦ ᐊᔾᔨᐅᓐᖏᑦᑐᓂᒃ ᐊᒻᒪᓘᓐᓃᑦ ᓄᓇᓕᓐᓂ ᐊᐅᓚᑕᐅᔪᓂᒃ ᒪᓕᒐᕐᓂᑦ ᐊᑐᕐᓗᑎᑦ ᓄᓇᖃᖅᑳᖅᓯᒪᔪᑦ ᑎᒍᒥᐊᕐᓂᖏᓐᓂ, ᑕᐃᒪᐃᒋᐊᖃᕋᐃᑉᐸᑕ.

ᐱᐅᑎᑦᑎᓇᓱᐊᕐᓂᖅ ᐃᓅᓯᑦᑎᐊᕆᓐᓂᕐᒥᑦ, ᐃᑉᐱᒋᖃᑦᑕᐅᑎᑎᐊᕐᓂᖅ

ᑲᓇᑕᐅᑉ ᒥᕐᖑᐃᖅᓯᕐᕕᖓ ᐱᓕᕆᑦᑎᐊᕋᓱᐃᓐᓇᕐᓂᐊᖅᑐᖅ ᐱᓕᕆᖃᑎᒋᕙᑦᑕᖏᓐᓂ ᐃᑲᔪᖅᑐᐃᓗᓂ ᓄᓇᖃᖅᑳᖅᓯᒪᔪᓂᒃ ᐱᔪᓐᓇᐅᑎᒥᓂᒃ ᐊᑐᖃᑦᑕᖅᑐᓂᒃ, ᐱᖅᑯᓯᕐᒥᓂᒃ ᖃᓄᐃᓘᖃᑦᑕᖅᑐᓂᒃ, ᑲᒪᑦᑎᐊᖃᑦᑕᖅᑐᓂᓪᓗ. ᑕᕝᕙᓂ ᐱᐅᔪᓂᒃ ᐱᓕᕆᖃᑎᒌᑦᑎᐊᕐᓗᑎᑦ ᓄᓇᖃᖅᑳᖅᓯᒪᔪᑦ ᒐᕙᒪᓕᒫᖏᓐᓂ ᓄᓇᓕᓐᓄᓪᓗ ᐋᖅᑭᔅᓱᐃᓗᑎᓪᓗ ᐊᑐᓕᖅᑎᑦᑎᓗᑎᓪᓗ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕐᓂᕐᒧᑦ ᐱᓕᕆᖃᑎᖏᓐᓂ ᒪᓕᒐᖏᓐᓂ ᒪᓕᑦᑎᓪᓗᒋᑦ, ᐃᓕᖅᑯᓯᖏᓐᓂ, ᓄᓇᖃᖅᑳᖅᓯᒪᔪᓪᓗ ᒪᓕᒐᖅᑎᒍᑦ ᒪᓕᖁᔭᐅᓯᒪᓂᖏᓐᓂ, ᐊᒻᒪᓗ ᓄᓇᐃᑦ ᒪᓕᒐᖏᓐᓂ. ᑐᓐᖓᕕᖓᓐᓂ, ᐃᓕᓴᕆᔭᐅᒋᐊᖃᕐᖓᑕ ᐊᔾᔨᒌᓐᖏᑦᑐᓂᑦ ᐱᓕᕆᔪᓐᓇᕐᓂᖏᓐᓂ ᐱᔪᒪᓂᖏᓐᓂᓪᓗ ᓄᓇᖃᖅᑳᖅᓯᒪᔪᑦ ᒐᕙᒪᒃᑯᖏᓐᓂ − ᑲᒪᒋᓗᒋᑦ ᓇᒦᓐᓂᖏᓐᓂ ᓇᒧᓐᖓᕐᓂᖏᓐᓂᓪᓗ − ᐊᒻᒪᓗ ᐱᔪᓐᓇᖅᓯᕙᓪᓕᐊᑏᓐᓇᕐᓗᒋᑦ ᐃᑲᔪᖅᑐᕐᓗᒋᑦ, ᓈᒻᒪᒐᐃᑉᐸ ᐊᒻᒪᓗ ᐱᔭᕆᐊᖃᖅᑲᑕ. ᐃᓕᓴᕆᒐᑦᑎᒍ ᑕᒪᒃᑯᐊ ᐱᓕᕆᖃᑎᖃᕐᓂᐅᔪᑦ ᐊᓯᔾᔨᖃᑦᑕᓐᖑᓱᒻᒪᑕ ᐃᓕᑦᑐᐸᓪᓕᐊᓗᑎᓪᓗ, ᓯᕗᒧᐊᑦᑎᐊᕈᒪᓪᓗᑕᓗ ᑕᒪᑐᒥᖓ.

ᐃᓕᓴᖅᓯᓯᒻᒥᔪᒍᑦ ᖃᓪᓗᓈᑦ ᐱᔪᒪᓂᖏᓐᓂ ᐃᓚᖏᓐᓂ ᓄᓇᓂᑦ ᖃᓪᓖᖅᑕᐅᓯᒪᔪᓂᒃ ᓄᓇᖃᖅᑳᖅᓯᒪᔪᑦ ᐱᓕᖅᑯᓯᖏᓐᓂ ᐊᒻᒪᓗ ᒪᓕᒐᖏᓐᓂ ᐱᓕᕆᖃᑎᖃᖅᑎᓪᓗᒋᑦ ᐊᓯᖏᓐᓂ ᐱᔭᕆᐊᑐᔪᓐᓂᓪᓗ ᐅᐊᑦᑎᐊᕈᕐᓂᓴᕐᓂᑦ ᒫᓐᓇᓕᓴᕐᓂᓪᓗ ᐱᓕᕆᖃᑎᖃᖃᑦᑕᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᒐᕙᒪᒃᑯᖏᓐᓂ. ᒪᑯᓂᖓ ᓄᓇᖃᖅᑳᖅᓯᒪᔪᑦ ᒐᕙᒪᒃᑯᖏᓐᓂ ᐊᐃᕙᐅᑎᖃᑦᑕᕐᖓᑕ ᑲᒪᑦᑎᐊᕋᓱᐊᕐᓂᕐᒥᑦ, ᑕᐃᒪᐃᒋᐊᖃᖅᑲᑦ, ᑲᒪᓇᓱᒃᑲᔭᑐᒍᑦ ᐃᓕᓴᕆᓪᓗᒋᑦ ᑲᒪᒋᐊᖃᕐᓂᖏᓐᓂ ᐊᑐᓂ ᓄᓇᓖᑦ ᐃᓕᓴᕆᓗᒋᓪᓗ ᐅᐊᑦᑎᐊᕈᕐᓂᓴᐃᑦ ᐅᓪᓗᒥᓕᓴᐃᓪᓗ ᑲᒪᒋᔭᕆᐊᓕᖏᑦ ᐊᔾᔨᒌᓐᖏᑐᐃᓐᓇᕆᐊᓕᐅᒐᓗᐊᑦ. ᑲᓇᑕᒥ ᒥᕐᖑᐃᖅᓯᕐᕕᒃ ᒪᑐᐃᖓᐃᓐᓇᕐᓂᐊᖅᑐᖅ, ᓂᓪᓕᐊᒍᒪᔪᓄ, ᑐᓴᐅᒪᑎᑦᑎᓗᑎᑦ ᓄᓇᖃᖅᑳᖅᓯᒪᔪᑦ ᐊᑲᐅᓐᖏᓕᐅᕈᑎᖏᓐᓂ ᐋᖅᑭᔅᓱᐃᖃᑎᖃᕋᓱᐊᕐᓗᑕ. ᐱᓕᕆᖃᑎᖃᑦᑎᐊᕐᓗᑕ ᒫᓐᓇᐅᔪᖅ ᐊᖏᖃᑎᒌᒍᑕᐅᓐᖏᑦᑐᓂᒃ ᑕᐃᒪᐃᒍᓐᓇᖁᓪᓗᒋᑦ ᓱᓕ.

ᑲᔪᓯᑦᑎᐊᖏᓐᓇᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᐱᖅᑯᓯᖏᑦ ᐅᖃᐅᓯᖏᓪᓗ

ᑲᓇᑕᐅᑉ ᒥᕐᖑᐃᖅᓯᕐᕕᖓ ᐃᓕᓴᖅᓯᓯᒪᔪᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᕐᒧᑦ ᐃᓕᓯᒪᔪᑦ ᐊᔾᔨᐅᖏᑦᑐᑎᓪᓗ. ᐃᓕᓴᖅᓯᓯᒪᒻᒥᔪᒍᑦ ᐱᓕᕆᖃᑎᖃᖅᑐᑎᑦ ᐊᐅᓚᑦᑎᓂᕐᒨᖓᔪᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒧᑦ ᓄᓇᓕᓐᓄᑦ ᑕᒪᒃᑯᐊ ᐋᖅᑭᑦᑕᐅᑦᑎᐊᕐᓂᐊᕐᒥᔪᐊᓗᐃᑦ ᓄᓇᖃᖅᑳᖅᓯᒪᔪᑦ ᐊᑐᕐᓗᑎᑦ ᖃᐅᒪᓂᖏᓐᓂ, ᒪᓕᒐᖏᓐᓂ ᐱᓕᕆᐊᖏᓐᓂ. ᐃᑉᐱᒋᑦᑎᐊᕐᓗᑎᒍᓪᓗ ᓄᓇᖃᖅᑳᖅᓯᒪᔪᑦ ᐅᐊᑦᑎᐊᕈᕐᓂᓴᖏᑦ, ᒪᓕᒐᖏᑦ, ᐊᑐᐊᕈᑎᖏᑦ, ᐱᖅᑯᓯᖏᑦ, ᓯᓚᕐᔪᐊᒥᓗ ᑕᑯᓐᓇᖅᑕᐅᓂᖏᑦ, ᖃᐅᔨᒪᓂᐅᔪᓪᓗ ᐊᒻᒪᓗ, ᐊᔪᕐᓇᓐᖏᒐᐃᒻᒪᑦ, ᐃᑲᔪᖅᑐᕐᓗᒋᑦ ᑭᖑᕚᕇᑦ ᖃᐅᔨᒪᓂᕐᒥᓂᒃ ᐅᖃᐅᔾᔪᒋᐊᖃᑦᑕᕐᓗᓂᒋᑦ ᐃᓕᓐᓂᐊᖅᑎᓪᓗᓂᒋᓪᓗ ᑲᔪᓯᑦᑎᐊᖁᓪᓗᒋᖅ ᐱᖅᑯᓯᖏᑦ ᐅᖃᐅᓯᖏᓪᓗ.

5. ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᖏᑦ

ᑲᓇᑕᐅᑉ ᒥᕐᖑᐃᖅᓯᕐᕕᖓ ᓄᑖᕈᖅᑎᑦᑎᕙᓪᓕᐊᓕᕐᒥᔪᑦ, ᑕᑯᓐᓇᖅᑕᐅᔪᑦ ᒪᓕᑦᑐᒋᑦ ᓄᓇᑐᖃᕐᓂᑦ ᐊᐅᓚᑦᑎᓂᕐᒥᑦ ᐊᑐᐊᖅᓯᓂᕐᒥᓪᓗ ᒪᓕᑦᑎᐊᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᖏᓐᓂ ᓄᓇᓂᑦ, ᐃᒪᕐᒥ ᓯᑯᓂᓪᓗ. ᐱᔾᔪᑎᖃᖅᑐᑦ ᓯᕗᕙᕆᐊᕐᓗᑕ ᓴᐃᒻᒪᖃᑎᒌᓐᓂᕐᒥᑦ ᐃᑲᔪᖅᑐᕐᓗᓂᒋᓪᓗ ᐊᑐᓕᖅᑎᑕᐅᓂᖏᓐᓂᓪᓗ ᓯᓚᕐᔪᐊᑉ ᑲᑐᔾᔨᔨᖏᑦ ᓇᓗᓇᐃᖅᓯᓯᒪᓂᖏᑦ. ᑲᓇᑕᐅᑉ ᒥᕐᖑᐃᖅᓯᕐᕕᖓ ᑐᑭᓯᐅᒪᑦᑎᐊᕐᖓᑕ ᐱᓕᕆᐊᖑᔪᓂᑦ ᒫᓐᓇ ᑭᒡᒐᖅᑐᖅᑕᐅᓂᖏᓐᓂ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᕐᒨᖓᔪᓂᒃ. ᓇᓗᓇᐃᔭᖅᓯᒪᔪᑦ ᒪᓕᑦᑐᑦ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᖏᑦ ᑲᓱᒃᑲᓐᓂᕐᓗᑎᑦ ᓄᓇᒧᑦ, ᐃᒪᕐᒧᑦ ᓯᑯᒧᓪᓗ ᐱᖅᑯᓯᖏᓐᓂ ᐊᑐᕐᓗᑎᑦ, ᐊᖏᕈᑎᖏᓐᓂ ᓄᓇᒧᑦ, ᓯᕗᓪᓕᖏᑦᑕ ᓄᓇᒥᓂᖏᓐᓂᓪᓗ. ᑕᒪᒃᑯᓂᖓ ᐱᖃᓯᐅᔾᔨᔪᑦ ᒪᓕᒋᐊᓕᓐᓂᒃ ᑲᒪᒋᔭᕆᐊᓕᓐᓂᓪᓗ ᑲᓱᖅᓯᒪᒃᑲᓂᕐᓗᑎᑦ ᐃᑲᔪᖅᑐᖅᑕᐅᓗᑎᓪᓗ ᐱᐅᖅᓱᐊᕋᓱᓐᓂᖏᓐᓂ ᓄᓇᖃᖅᑳᖅᓯᒪᔪᑦ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖓ ᒪᓕᒐᖏᓐᓂ ᑲᔪᓯᖃᑎᒌᓐᓂᖏᓐᓂᓪᓗ.

ᑲᔪᓯᑦᑎᐊᖅᓯᒪᔪᑦ ᐃᑲᔪᖅᑐᖅᑕᐅᓪᓗᑎᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᖏᓐᓂ, ᑲᓇᑕᐅᑉ ᒥᕐᖑᐃᖅᓯᕐᕕᖓ ᒪᓕᒋᐊᓕᓐᓂᑦ ᓴᖅᑮᒋᐊᖃᕐᓂᐊᕐᖓᑕ ᑲᔪᓯᑦᑎᐊᕐᓂᐊᕐᓂᖏᓐᓄᑦ. ᑕᒪᒃᑯᐊ ᒪᓕᒐᐃᑦ ᐊᓯᔾᔨᕐᓗᒋᑦ ᐱᖅᑯᓯᖏᓐᓄᑦ ᑲᓇᑕᐅᑉ ᒥᕐᖑᐃᖅᓯᕐᕕᖓ, ᐊᒻᒪᓗ ᐊᓯᖏᓐᓂ ᑐᑭᓯᐅᒪᒃᑲᓂᕐᓗᑕ ᐅᔾᔨᕈᓱᓪᓗᑕᓗ ᐱᓕᕆᖃᑦᑕᕆᐊᖃᖅᑐᓂᒃ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕋᓱᐊᕐᓂᖏᓐᓂ, ᐊᓪᓚᕕᐅᑉ ᐃᓗᐊᓂ, ᓯᓚᑖᓂᓗ ᐳᓚᕋᖅᐸᑦᑐᓄᑦ ᓄᓇᑐᖃᒥᓂᕐᓄᑦ. ᐱᖓᓲᒻᒪᑕ ᑐᓐᖓᕕᐅᒍᓐᓇᖅᑐᑦ ᓇᓗᓇᐃᖅᓯᔾᔪᑏᑦ ᐱᔭᐅᒋᐊᓖᑦ ᓄᓇᖃᖅᑳᖅᓯᒪᔪᓄᑦ ᑲᒪᑦᑎᐊᕐᓂᐊᖅᑎᓪᓗᒋᑦ ᓯᕗᕙᖅᑎᓪᓗᒋᑦ, ᐃᖏᕐᕋᓕᖅᑭᑲᓐᓂᕐᓗᑎᑦ ᑲᒪᒋᐊᖃᕐᓂᖏᑦ ᓱᓇᒃᑯᑖᕐᓂᑦ, ᐅᕝᕙᓘᓐᓃᑦ ᑲᔪᓯᑦᑎᐊᕋᓱᐊᕐᓗᑎᑦ ᐊᑐᓕᖅᑎᑕᐅᓂᖏᑦ ᐊᓯᔾᔨᖅᑐᑦ ᓈᒪᓗᓂᓗ:

ᐃᓕᓴᖅᓯᓂᐅᔪᑦ ᒪᒥᐊᓐᓂᐅᔪᓪᓗ

ᐃᓕᓴᖅᓯᓂᐅᔪᑦ ᒪᒥᐊᓐᓂᐅᔪᓪᓗ - ᐅᖃᐅᓯᓕᒃ ᐱᓕᕆᓂᐊᕐᓂᕋᕐᓂᖏᓐᓂ ᑕᒪᒃᑯᓂᖓ ᐅᓂᒃᑳᕈᓐᓇᖁᓪᓗᒋᑦ ᓈᓚᑦᑕᐅᒍᓐᓇᖁᓪᓗᒋᓪᓗ ᓱᓕᓂᒃᑯᑦ ᐅᐊᑦᑎᐊᕈᕐᓂᓴᕐᓂᑦ ᐅᓪᓗᒥᓗ ᐱᑦᑎᐊᖅᑕᐅᖃᑦᑕᖏᑦᑐᓂᒃ, ᐃᑲᔪᖅᑐᐃᒻᒪᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᖃᖅᑐᑎᑦ ᐅᓂᒃᑳᖅᑐᓂᒃ ᐅᐊᑦᑎᐊᕈᕐᓂᓴᕐᓂᓪᓗ ᓂᐱᖃᕈᓐᓃᖁᔭᐅᖃᑦᑕᖅᓯᒪᔪᓂᒃ ᐅᕝᕙᓘᓐᓃᑦ ᓂᐱᖃᖅᑎᑕᐅᒍᓐᓃᖅᑐᓂᒃ ᐱᔮᖅᑯᒻᒥᑦ.

ᐱᓕᕆᖃᑎᒌᓐᓂᖅ

ᐱᓕᕆᖃᑎᒌᓐᓂᖅ - ᐱᖃᓯᐅᔾᔨᔪᑦ ᐱᓕᕆᖃᑎᖃᐃᓐᓇᕐᓂᐊᓂᕐᒥᑦ ᐊᑯᓂ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᖏᓐᓂ ᐊᓯᔾᔨᐸᓪᓕᐊᓂᐊᖅᑐᓂᒃ ᐱᕈᖅᐸᓪᓕᐊᓂᐊᖅᑐᓂᓪᓗ.

ᐃᓕᓐᓂᐊᖅᑐᓕᕆᓂᖅ ᑐᑭᓯᐅᒪᓂᕐᓗ

ᐃᓕᓐᓂᐊᖅᑐᓕᕆᓂᖅ ᑐᑭᓯᐅᒪᓂᕐᓗ - ᐊᑐᖅᑐᑦ ᐊᔅᓱᕉᑕᐅᔪᓂᒃ ᑲᓇᑕᐅᑉ ᒥᕐᖑᐃᖅᓯᕐᕕᖓ ᐱᓕᕆᓂᐊᕐᓂᖏᓐᓂ ᐱᕙᓪᓗᐊᓗᑎᒃ ᐱᐅᓯᕚᓪᓕᑎᑦᑎᓇᓱᐊᕐᓗᑎᓪᓗ ᐱᖅᑯᓯᖏᓐᓂ ᐱᔪᓐᓇᕐᓂᖏᓐᓂ ᐱᖃᑕᐅᔪᓂᒃ, ᐊᓯᖏᓐᓂᓪᓗ ᐅᔾᔨᕈᓱᒃᑲᓐᓂᖁᓪᓗᒋᑦ ᐱᓕᕆᔩᑦ ᐳᓚᕋᖅᑏᓪᓗ ᓄᓇᓄᑦ ᐱᑐᖃᐅᔪᓂᒃ ᐅᓪᓗᒥᓕᓴᕐᓂᓪᓗ ᐱᓕᕆᖃᑎᖃᖃᑦᑕᑎᓪᓗᒋᑦ ᓄᓇᖃᖅᑳᖅᓯᒪᔪᓂᒃ ᓄᓇᖃᖅᑳᖅᓯᒪᓐᖏᑦᑐᓂᓪᓗ, ᒪᑯᓂᖓᓗ ᓄᓇᖃᖅᑳᖅᓯᒪᔪᓂᒃ ᐊᑦᑐᐊᓂᖃᖅᑐᓂᒃ ᓄᓇᓄᑦ, ᐃᒪᕐᒧᑦ, ᓯᑯᓄᓪᓗ.

ᑕᕝᕙᓐᖓᑦ ᑐᓐᖓᕕᖓᓐᓂ, ᑲᓇᑕᐅᑉ ᒥᕐᖑᐃᖅᓯᕐᕕᖓ ᐃᑲᔪᖅᑐᐃᔪᓐᓇᖅᑐᑦ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᖏᓐᓂ ᑕᒪᒃᑯᓂᖓ ᑲᒪᑦᑎᐊᕋᓱᐊᖅᑎᓪᓗᒋᑦ.

ᑐᓐᖓᕕᓪᓗᐊᑕᖓ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᒨᖓᔪᓂᒃ ᐃᓚᖃᖅᑐᑦ ᑎᓴᒪᓂᒃ ᐊᑦᑐᐊᓂᖃᖅᑐᓂᒃ ᑲᒪᒋᔭᕆᐊᓕᖏᓐᓂ ᑐᑭᓯᐅᒪᔭᐅᔪᑦ ᓄᓇᖃᖅᑳᖅᑐᓂᒃ ᑲᒪᑦᑎᐊᕐᓂᕐᒧᑦ. ᐃᒪᐃᑦᑐᓪᓗᑎᑦ:

ᑲᑐᔾᔨᔪᑦ ᐊᐅᓚᑦᑎᔾᔪᑎᓂᒃ,

ᑲᑐᔾᔨᔪᑦ ᐊᐅᓚᑦᑎᔾᔪᑎᓂᒃ, ᐅᖃᐅᓯᓕᒃ ᐱᓕᕆᐊᔭᕆᐊᓕᖏᑦ ᓄᓇᖃᖅᑳᖅᓯᒪᔪᑦ ᐃᓱᒪᓕᐅᕐᓂᖏᓐᓂ. ᑲᑐᔾᔨᓗᑎᒃ ᐊᐅᓚᔾᔪᑎᓂᒃ ᒫᓐᓇᒧᑦ ᐃᓕᖅᑯᓯᐅᔪᓂᒃ ᐱᓕᕆᖃᑎᖃᕐᓗᑎᑦ ᐊᐅᓚᑦᑎᔨᓂᒃ ᐋᖅᑭᔅᓱᐃᓗᑎᒃ ᓄᓇᐃᑦ ᒪᓕᒐᖏᓐᓄᑦ ᐊᑐᓂᖅᓴᐅᓗᑎᒃ, ᓄᓇᖃᖅᑳᖅᓯᒪᔪᑦ ᒪᓕᒐᖅᑎᒍᑦ ᑎᓕᓯᔾᔪᑎᖏᑦ, ᐱᔪᓐᓇᐅᑎᖏᓪᓗ ᑲᒪᒋᐊᖃᕐᓂᖏᓐᓂ ᓄᓇᓂᑦ, ᐃᒪᕐᒥᑦ ᓯᑯᓂᓪᓗ ᑲᒪᒋᑦᑎᐊᖅᓯᒪᔭᖏᓐᓂ 1000−ᖏᓐᓃᑦᑐᓂᒃ ᐅᑭᐅᒐᓈᓗᓐᓂᑦ.

ᐱᖅᑯᓰᑦ ᑲᔪᓯᓐᓂᖏᓐᓂ

ᐱᖅᑯᓰᑦ ᑲᔪᓯᓐᓂᖏᓐᓂ ᐱᖃᓯᐅᔾᔨᔪᑦ ᐊᑐᖅᐸᑦᑕᖏᓐᓂ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐱᓕᕆᖃᑎᖃᒃᑲᓐᓂᕐᓂᕐᒧᑦ ᐊᑦᑐᐊᓂᖏᓐᓂ ᐱᖅᑯᓯᖏᓐᓄᑦ ᐅᑭᐅᖅᑕᖅᑐᒥ, ᓄᓇᐃᑦ ᐊᖏᕈᑎᖏᓐᓂ ᐊᒻᒪᓗ ᓯᕗᓕᖏᑦᑕ ᓄᓇᒥᓂᖏᓐᓂ, ᐅᖃᐅᓯᒃᑯᑦ, ᐱᖅᑯᓯᒃᑯᑦ ᑲᒪᑦᑎᐊᕐᓂᑯᓪᓗ ᐊᐅᓚᑦᑎᔾᔪᑎᑦᑎᐊᕙᐅᖏᓐᓇᖅᑐᑦ ᐅᖃᐅᓯᕆᕙᑦᑕᖏᓐᓂ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂ ᑲᒪᒋᐊᖃᕐᓂᖏᓐᓂᓪᓗ.

ᐊᑐᐃᓐᓇᕐᓗᑎᑦ ᐱᖅᑯᓯᓕᕆᓂᕐᒥᑦ ᓄᓇᑐᖃᕐᓂᑦ ᖁᕕᐊᓲᑎᖃᕐᓂᒃᑯᑦ, ᐅᖃᐅᓯᕐᓂᑦ ᑲᑐᔾᔨᓂᕐᒥᑦ; ᓄᓇᖃᖅᑳᖅᓯᒪᔪᑦ ᐱᐅᖅᓱᐊᕐᓂᖏᑦ; ᓇᔪᒐᖏᓐᓂ ᐃᓕᓐᓂᐊᕐᓂᕐᒥᑦ ᖃᐅᔨᒪᔭᑐᖃᕐᓂᓪᓗ ᐃᓕᓐᓂᐊᕐᓗᑎᑦ ᐃᓐᓇᕐᓂᑦ, ᐃᓅᓱᑦᑐᓂᒃ, ᖃᐅᔨᒪᔨᑕᕐᓂᑦ, ᓄᓇᓕᓐᓂᓪᓗ ᐊᒻᒪᓗ ᓂᕿᔅᓴᖅᓯᐅᖃᑦᑕᓂᕐᒥᑦ ᐊᓯᖏᓐᓂᓪᓗ ᐱᔾᔪᑎᖏᓐᓂ.

ᑲᑎᒪᔾᔪᑎᔅᓴᓄᑦ ᒪᓂᒪᔾᔪᑏᑦ

ᑲᑎᒪᔾᔪᑎᔅᓴᓄᑦ ᒪᓂᒪᔾᔪᑏᑦ - ᐊᔭᐅᖅᑐᐃᒋᐊᒃᑲᓂᕐᓗᑎᑦ ᐊᒥᓱᓂᑦ ᑲᓇᑕᐅᑉ ᒥᕐᖑᐃᖅᓯᕐᕕᖓ ᐊᐅᓚᓂᖏᓐᓂ ᒪᑯᓂᖓ ᑕᖏᓕᑦᑎᒍᑦ ᑐᓂᕐᕈᑏᑦ ᐃᓄᓐᓄᑦ ᒪᑭᒪᔾᔪᑎᔅᓴᓐᓄᑦ ᐃᓅᓇᓱᐊᑦᑎᐊᕐᓂᖏᑦ ᓄᓇᖃᖅᑳᖅᓯᒪᔪᑦ. ᓄᓇᖃᖅᑳᖅᓯᒪᔪᑦ ᐃᓅᓇᓱᐊᕐᓂᖏᑦ ᒪᑭᒪᔾᔪᑎᖏᑦ ᐊᕙᓂᑐᖃᕐᔪᐊᕌᓗᒃ ᐋᖅᑭᓱᖅᓯᒪᔪᑦ ᑲᓇᑕᐅᑉ ᒥᕐᖑᐃᖅᓯᕐᕕ ᐊᐅᓚᑦᑎᓚᐅᖅᑎᓐᓇᒍ ᓄᓇᑐᖃᒥᓂᕐᓂᑦ, ᓴᓐᖓᑎᒃᑲᓂᕐᓗᑎᑦ ᑕᒪᒃᑯᐊ ᐱᒻᒪᕆᐅᔪᑦ ᐃᓕᓴᕆᔭᐅᓗᑎᑦ ᐊᑦᑐᐊᓂᖃᕐᓂᖏᓐᓂ ᐱᖅᑯᓯᑐᖃᖏᓐᓂ, ᐊᖏᕈᑎᓂᒃ ᓄᓇᓂᑦ, ᓯᕗᓕᑦᑕ ᓄᓇᒥᓂᖏᓐᓂ ᑎᒍᒥᐊᖅᑕᖏᓪᓗ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂ ᑲᒪᒋᔭᕆᐊᖃᖅᑕᖏᓐᓂᓪᓗ.

ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑕ ᐃᓕᖅᑯᓯᖏᑦ

ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑕ ᐃᓕᖅᑯᓯᖏᑦ - ᐃᓚᓕᐅᔾᔨᓯᒪᔪᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᖃᐅᔨᒪᔭᑐᖃᕐᓂᑦ. ᑲᒪᒋᔭᐅᑦᑎᐊᖃᑦᑕᕐᓂᖏᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᓕᖏᑦ ᖃᐅᔨᒪᓂᖏᓪᓗ ᐃᓕᖅᑯᓯᖏᓪᓗ ᒪᓕᑦᑐᑦ ᐱᕕᖃᖅᑎᑕᐅᓗᑎᑦ ᐱᖅᑯᓯᖏᓐᓂ ᑲᔪᓯᑦᑎᐊᖁᓪᓗᒋᑦ.

ᑖᓐᓇ ᐱᖁᔭᖅ ᐃᓕᓴᖅᓯᓯᒪᔪᖅ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᕐᒧᑦ ᐊᑐᕇᑦᑐ ᑕᒪᒃᑯᐊ ᐊᓯᐊᒍᑦ ᐱᑕᖃᕇᖅᑐᑦ ᑲᓇᑕᐅᑉ ᒥᕐᖑᐃᖅᓯᕐᕕᖓ ᐊᐅᓚᑦᑎᓂᖏᓐᓂ. ᐃᓕᓴᕆᔭᐅᔪᑦ ᑕᒪᒃᑯᐊ ᐊᑐᓕᖅᑎᑕᐅᓂᖏᓐᓂ ᐱᖁᔭᐃᑦ ᐋᖅᑭᓱᑦᑎᐊᖅᓯᒪᓗᑎᑦ ᐊᔾᔨᐅᖏᑦᑐᓄᑦ ᓄᓇᓄᑦ ᐱᓕᕆᖃᑕᐅᕙᑦᑐᓄᓪᓗ.

6. ᑭᒃᑯᓐᓄᑦ ᐊᑐᖅᑕᐅᒋᐊᖃᕐᒪᖔᖅ ᓂᕆᐅᒋᔭᐅᔪᓪᓗ ᑭᖑᓂᖓᓐᓂ

6.1. ᑖᓐᓇ ᐱᖁᔭᖅ ᑐᕌᖓᔪᖅ ᐅᑯᓄᖓ:

6.1.1. ᓄᓇᑐᖃᓕᒫᓄᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓃᑦᑐᓄᑦ ᐊᐅᓚᑦᑎᖃᑦᑕᖅᑐᓂᒃ.

6.1.2. ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓄᑦ ᐊᓪᓚᕕᖓᑦᑕ ᑲᑎᒪᔨᖏᓐᓄᑦ ^{Footnote 1}.

6.2. ᑐᕌᒐᖏᑦ ᑖᔅᓱᒪ ᐱᖁᔭᐅᑉ ᑎᓕᓯᔾᔪᑕᐅᔪᑦ ᐊᑐᓕᖅᑎᑕᐅᒋᐊᖃᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᒨᖓᔪᓂᒃ ᐊᒻᒪᓗ ᒪᓕᒐᓕᐅᕐᓗᑎᑦ ᐃᑲᔪᖅᑐᐃᒐᔭᖅᑐᑦ ᐱᖅᑯᓰᑦ ᑲᔪᓰᓐᓇᖁᓪᓗᒋᑦ ᓄᓇᖃᖅᑳᖅᓯᒪᔪᓂᒃ ᒪᓕᑦᑐᑦ ᐅᑉᐱᕆᔭᖏᓐᓂ ᒪᓕᒐᖏᓐᓂ ᐅᖃᖅᓯᒪᔪᓂᒃ ᐃᓚᖏᓐᓂ ᖁᓛᓃᑦᑐᓂᒃ.

6.3. ᑖᓐᓇ ᐱᖁᔭᖅ ᒪᓕᒐᓱᐊᖅᑐᖅ ᐱᐅᓯᕚᓪᓕᑎᑦᑎᑲᓐᓂᕋᓱᐊᕐᓗᓂᓗ ᐊᖏᕈᑕᐅᓯᒪᔪᓂᒃ ᐊᑐᐊᖅᓯᔾᔪᑕᐅᓗᑎᓪᓗ ᓯᕗᓂᑦᑎᓐᓂ, ᐊᖏᕈᑎᓂᒃ ᑐᑭᓯᐅᒪᑦᑎᐊᕐᓂᕐᒥᓪᓗ.

6.4. ᓂᕆᐅᒋᔭᐅᔪᑦ ᑭᖑᓂᖓᓂ ᐱᖁᔭᕐᓂᑦ ᐃᒪᐃᑦᑑᓪᓗᑎᑦ:

6.4.1. ᑲᒪᖃᑕᐅᔪᑦ ᓂᕈᐊᖅᑕᐅᓯᒪᔪᓪᓗ ᑭᒡᒐᖅᑐᐃᔩᑦ ᓄᓇᖃᖅᑳᖅᓯᒪᔪᓂᒃ ᓄᓇᓕᓐᓂ ᐋᖅᑭᔅᓱᐃᖃᑎᖃᕐᓂᐊᖅᑐᑦ, ᐆᑦᑐᕋᔅᓴᐅᒍᓐᓇᖅᑐᓂᒃ ᐸᕐᓇᐅᑎᓂᒃ ᑲᒪᑦᑎᐊᓂᕐᒧᑦ ᐊᑐᓂ ᓄᓇᑐᖃᕐᓂᑦ.

6.4.2. ᖃᓄᖅ ᑲᒪᓂᐊᕐᒪᖔᑕ ᐋᖅᑭᔅᓱᐃᖃᑎᖃᕐᓗᑎᑦ ᑲᒪᑦᑎᐊᕐᓂᕐᒧᑦ ᐸᕐᓇᐅᑏᑦ ᓄᓇᓕᓐᓂᑦ ᐃᓱᒪᓕᐅᖅᑕᐅᒐᔭᖅᑐᑦ ᓄᓇᖃᖅᑳᖅᑐᓂᒃ ᐱᖃᑕᐅᔪᓂᒃ.

6.4.3. ᐸᕐᓇᐅᑏᑦ ᐊᑐᓕᖅᑎᑕᐅᔪᑦ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᒨᖓᔪᑦ ᐊᒻᒪᓗ ᓯᕗᓪᓕᖅᐸᐅᑎᒋᐊᓖᑦ ᐊᑐᓂ ᐸᓇᐅᑏᑦ ᐅᖃᐅᓯᐅᓯᒪᔪᑦ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑕᐅᔪᓄᑦ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓄᑦ ᑲᒪᔨᓄᑦ. ᐃᓱᒪᒋᖃᓯᐅᔾᔨᒐᔭᖅᑐᑦ ᑐᓐᖓᕕᐅᒍᓐᓇᖅᑐᓂᒃ (ᐃᓕᓐᓂᐊᖅᑐᓕᕆᓂᕐᒥᑦ ᑐᑭᓯᐅᒪᓂᕐᒥᑦ, ᐃᓕᓴᖅᓯᓂᕐᒥᑦ, ᐱᓕᕆᖃᑎᖃᕐᓂᒥᓪᓗ) ᑲᒪᒋᔭᒋᐊᓖᑦ (ᒪᑭᒪᔾᔪᑎᔅᓴᓄᑦ ᒪᓂᒪᔾᔪᑕᐅᔪᑦ, ᐱᖅᑯᓯᖏᓐᓂ ᑲᔪᓯᑎᑦᑎᓂᕐᒥᑦ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᐃᓕᖅᑯᓯᐅᔪᓂᒃ, ᑲᑐᔾᔨᓂᕐᒥᓪᓗ ᐊᐅᓚᔾᔪᑎᓂᒃ) ᐊᓯᖏᓐᓂᓪᓗ ᐊᑦᑐᐊᓂᖃᖅᑐᓂᒃ ᓯᕗᓪᓕᖅᐸᐅᔾᔭᐅᖁᔭᐅᓯᒪᔪᓂᒃ ᐱᓕᕆᖃᑕᐅᔪᓄᑦ (ᓲᕐᓗ ᓄᓇᖃᖅᑳᖅᓯᒪᔪᑦ ᐸᖅᑭᔭᐅᖁᔭᖏᑦ ᐱᐅᖅᓱᐊᖅᑕᐅᖁᔭᖏᓪᓗ ᐊᓯᖏᓪᓗ).

6.4.4. ᐸᕐᓇᐅᑎᑦ ᐃᓱᒪᒋᖃᓯᐅᔾᔨᓂᐊᕐᒥᔪᑦ ᒪᓕᓪᓗᑎᓪᓗ ᐱᑕᖃᕇᖅᑐᓂᒃ ᓴᖅᑭᓂᐊᖅᑐᓂᓪᓘᓐᓃᑦ ᓄᓇᓕᓐᓂ ᓯᕗᓪᓕᖅᐸᐅᑎᒋᐊᓕᓐᓂᒃ ᐸᕐᓇᐅᑎᓂᓪᓘᓐᓃᑦ.

6.4.5. ᓄᓇᑐᖃᐃᑦ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᑲᒪᒋᔭᐅᕙᑦᑐᑦ ᐊᒥᓱᓂᒃ ᓄᓇᖃᖅᑳᖅᓯᒪᔪᓂᓪᓗ ᐱᓕᕆᖃᑎᖃᖅᐸᑦᑐᑎᒃ, ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ ᐱᓕᕆᖃᑎᖃᕋᓱᐊᕐᓂᐊᕐᒥᔪᖅ ᐋᖅᑭᔅᓱᐃᒋᐊᖃᕐᒪᖔᑕ ᒪᕐᕉᓕᖅᑲᖓᔫᓐᓂᒃ ᐸᕐᓇᐅᑎᓂᒃ ᐅᕝᕙᓘᓐᓃᑦ ᐸᕐᓇᐅᑎᓂᒃ ᒪᓕᑦᑐᓂᒃ ᐊᒥᓱᓂᒃ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑕᐅᔪᓂᒃ.

6.4.6. ᑲᓇᑕᒥ ᐊᓪᓚᕕᖓᓂ ᑲᑎᒪᔩᑦ ᐸᕐᓇᐅᑎᓕᐅᖅᓯᒪᔪᑦ ᓇᓗᓇᐃᖅᓯᓯᒪᓪᓗᑎᑦ ᐊᑐᓕᖅᑎᑕᐅᒋᐊᓕᓐᓂᒃ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᕆᐊᖃᕐᓂᕐᒧᑦ ᐱᓕᕆᖃᑎᖃᕐᓗᑎᑦ ᕿᒥᕐᕈᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓕᕆᔨᒃᑯᓐᓂ ᐊᒻᒪᓗ ᓄᓇᖃᖅᑳᖅᓯᒪᔪᓕᕆᓂᕐᒧᑦ ᑲᒪᑦᑎᐊᕆᐊᖃᕐᓂᕐᒨᖓᔪᓂᒃ.

6.4.7. ᐸᕐᓇᐅᑎᓕᒫᑦ ᑲᑐᔾᔨᓪᓗᑎᑦ ᐃᖏᕐᕋᓂᖏᓐᓂ ᐃᓱᒪᒋᔭᐅᓯᒪᔪᑦ ᕿᒥᕐᕈᔭᐅᓚᐅᖃᑦᑕᕐᒥᓗᑎᓪᓗ ᐊᓯᔾᔨᖃᑦᑕᕐᓗᑎᓪᓗ.

6.5. ᐊᕐᕌᒍᑕᒫᑦ ᐅᓂᒃᑳᓕᐅᖃᑦᑕᕐᓗᑎᑦ ᑲᒪᑦᑎᐊᕐᓂᕐᒧᑦ ᐸᕐᓇᐅᑎᖏᓐᓂ ᐱᓕᕆᖃᑎᖃᕐᓗᑎᑦ ᓄᓇᖃᖅᑳᖅᓯᒪᔪᓂ ᐱᓕᕆᖃᑎᖏᓐᓂ ᒪᓕᑦᑎᐊᕐᓗᑎᓪᓗ ᐅᓂᒃᑳᓕᐅᖃᑦᑕᕆᐊᓖᑦ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᒪᔭᖏᓐᓂ ᐱᖁᔭᖏᓐᓂ ᐊᓯᖏᓐᓂᓪᓗ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐅᓂᒃᑳᓕᐅᖃᑦᑕᕆᐊᖃᕐᓂᖏᓐᓂ, ᒪᓕᓪᓗᑎᑦ ᒪᓕᒐᕐᓂᑦ.

6.6. ᐅᓂᒃᑳᓕᐅᕐᓂᕐᒧᑦ ᒪᓕᒐᐃᑦ ᓄᓇᖃᖅᑳᖅᓯᒪᔪᑦ ᓄᓇᓕᓐᓅᕆᐊᖃᖅᑲᑕ ᐋᖅᑭᔅᓱᖃᑕᐅᓗᑎᑦ ᐃᓱᒪᓕᐅᖅᑕᐅᓗᑎᓪᓗ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑕᐅᔪᓄᑦ.

7. ᓴᓐᖏᓂᖃᖅᑐᐃᑦ

7.1. ᑖᓐᓇ ᐱᖁᔭᖅ ᓇᓗᓇᖅᓯᕗᖅ ᐃᓚᖓᓐᓂ 5−ᒥᑦ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐱᖁᔭᖏᓐᓂ ᐊᒻᒪᓗ ᐃᓇᖐᒐᔭᖅᑐᑦ ᐱᖁᔭᕐᓂᑦ, ᐊᑐᐊᒐᕐᓂᑦ, ᑎᓕᓯᔾᔪᑎᓂᓪᓗ ᒪᓕᓐᓂᓐᖏᑐᐊᖅᑲᑕ ᐱᖁᔭᕐᓂᑦ.

7.2. ᑖᓐᓇ ᐱᖁᔭᖅ ᓇᓗᓇᖅᓯᔪᖅ ᑎᒍᒥᐊᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᖏᓐᓂ ᒪᓕᖃᑦᑕᕐᓗᑎᑦ ᐊᑐᐊᖅᓯᔾᔪᑕᐅᓗᑎᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓄᑦ ᐊᑐᓕᖅᑎᑕᐅᒋᐊᖃᕐᓂᖏᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕆᐊᖃᕐᓂᒨᖓᔪᓂᒃ ᑕᕝᕙᓂ ᐱᖁᔭᕐᓃᑦᑐᓂᒃ.

7.3. ᑖᓐᓇ ᐱᖁᔭᖅ ᒪᓕᑦᑕᐅᒋᐊᓕᒃ ᑲᓇᑕᐅᑉ ᒥᕐᖑᐃᖅᓯᕕᒻᒥ ᐱᓕᕆᔨᖏᓐᓄᑦ ᐊᓯᐊᒎᖅᑕᐅᒋᐊᖃᓐᖏᑦᑐᖅ ᐊᐅᓪᓛᖅᑕᐅᖏᓪᓗᑎᓪᓗ ᑲᒪᒋᔭᐅᒋᐊᓖᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ, ᒐᕙᒪᖏᓐᓄᑦ ᑲᑐᔾᔨᖃᑎᒌᖏᓐᓄᓪᓗ.

7.4. ᑖᓐᓇ ᐱᖁᔭᖅ ᐅᖃᓕᒪᖅᑕᐅᒋᐊᓕᒃ ᒪᓕᑦᑕᐅᓗᓂᓗ ᑲᑎᓐᖓᖃᑎᖃᕐᓗᑎᑦ ᐊᑑᑎᓕᓐᓂᒃ ᒪᓕᒐᕐᔪᐊᓂᒃ, ᐊᑐᐊᒐᕐᓂᑦ, ᐱᖁᔭᕐᓂᑦ ᐊᒻᒪᓗ ᐊᖏᕈᑕᐅᓯᒪᔪᓂᒃ ᑲᓇᑕᐅᑉ ᒐᕙᒪᒃᑯᖏᓐᓂ ᐊᓯᖏᓐᓂᓪᓗ ᒐᕙᒪᑐᖃᒃᑯᓐᓂ, ᒪᑯᐊᓗ ᐅᓪᓗᒥᓕᓴᐃᑦ ᐅᐊᑦᑎᐊᕈᕐᓂᓴᓪᓗ ᐊᖏᕈᑏᑦ, ᐊᓯᖏᓪᓗ ᐊᖏᕈᑕᐅᓯᒪᔪᑦ ᐃᔫᑎᔅᓴᐅᔪᑦ.

7.5. ᑖᓐᓇ ᐱᖁᔭᖅ ᐅᖃᓕᒫᖅᑕᐅᒋᐊᓕᒃ ᑲᑎᓐᖓᖃᑎᖃᕐᓗᓂᓗ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᓐᓂ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᓂᒃ, ᐃᓄᐃᑦ ᓄᓇᖓᓐᓂ ᐱᖁᔭᕐᓂᑦ, ᐊᒻᒪᓗ ᐱᓕᕆᖃᑕᐅᓯᒪᔪᓂᒃ ᐅᓪᓗᒥᓕᓴᕐᓂᑦ ᐊᖏᕈᑎᓂᒃ ᐊᑐᓕᖅᑎᑕᐅᓂᕐᒧᑦ ᐱᖁᔭᕐᓂᑦ.

7.6. ᑖᓐᓇ ᐱᖁᔭᖅ ᐃᑉᐱᒍᓱᑦᑎᐊᕆᐊᓕᒃ ᓄᓇᖃᖅᑳᖅᓯᒪᔪᑦ ᓴᓐᖏᓂᖏᓐᓂ ᐊᑐᓕᖅᑎᑕᐅᓂᖏᓐᓄᑦ.

8. ᑎᒍᒥᐊᖅᑕᐅᔪᑦ ᑲᒪᒋᔭᐅᒋᐊᓖᓪᓗ

8.1. ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓄᑦ ᒥᓂᔅᑕᕆᔭᖅ ᑲᒪᔨᐅᔪᖅ ᐃᒪᐃᑦᑐᓄᑦ:

8.1.1. ᐸᖅᑭᑦᑎᔨ, ᐱᐅᖅᓱᐊᖅᑎ, ᐱᓯᒪᑦᑎᔨ ᓄᓇᓂᑦ ᓄᓇᑐᖃᕐᓂᓪᓗ ᐊᐅᓚᑕᐅᔪᓂᒃ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓄᑦ ᒪᓕᑦᑐᒋᑦ ᒪᓕᒐᐃᑦ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓄᑦ ᐱᖁᔭᖏᓐᓂ.

8.1.2. ᐊᖏᖅᓯᔨ ᑖᔅᓱᒥᖓ ᐱᖁᔭᕐᒥᑦ, ᐱᓕᕆᖃᑎᖃᕐᓗᓂ ᑲᑎᒪᑎᑦᑎᓗᓂᓗ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᓂᐊᕐᒨᖓᔪᓕᕆᔨᓂᒃ.

8.2. ᐊᖏᔪᖅᑳᖅ ᐃᖅᑲᓇᐃᔭᖅᑎᓄᓪᓗ ᓯᕗᓕᖅᑎ, ᐱᓕᕆᖃᑎᖃᕐᓗᓂ ᑲᑎᒪᑎᑦᑎᓗᓂᓗ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᖅᑐᓕᕆᔨᒃᑯᓐᓂ, ᑐᕌᒐᐃᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ ᑲᔪᓯᑦᑎᐊᕋᓗᐊᕐᒪᖔᑕ ᑐᕌᒐᖏᓐᓂ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᕐᓂᖏᓐᓂ ᒪᓕᑦᑎᐊᕐᓗᑎᓪᓗ ᒫᓐᓇᐅᔪᖅ ᒪᓕᒐᕐᔪᐊᕐᓂᑦ, ᐊᑐᐊᒐᕐᓂᑦ ᐱᖁᔭᓂᓪᓗ ᒪᓕᒋᐊᓕᓐᓂᒃ.

8.3. ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ, ᐱᓕᕆᖃᑎᖃᕐᓗᑎᑦ ᐊᖏᔪᖅᑳᕐᒥ ᐊᒻᒪᓗ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᒥᑦ, ᑲᒪᔨᐅᕗᑦ ᖁᕕᐊᓲᑎᖃᕐᓂᕐᒥᑦ ᓄᑖᕈᖅᑎᑕᐅᓂᖏᓐᓂ ᐱᖁᔭᐃᑦ.

8.4. ᐊᖏᔪᖅᑳᖅ ᑐᖏᓕᖓ, IACH ᐊᒻᒪᓗ ᐊᖏᔪᖅᑳᒻᒪᕆᒃ ᐊᖏᔪᖅᑳᑉ ᑐᖏᓕᖓ ᐊᐅᓚᑦᑎᓂᕐᒧᑦ ᐱᓕᕆᖃᑎᖃᕆᐊᓖᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ ᕿᒥᕐᕈᓗᑎᑦ ᐊᑐᓕᖅᑎᑕᐅᒋᐊᓕᓐᓂᒃ ᓄᓇᖃᖅᑳᖅᓯᒪᔪᓂᒃ ᑲᒪᑦᑎᐊᖅᑐᓕᕆᔩᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐊᕐᕌᒍᑕᒪᓪᓗ ᐅᓂᒃᑳᓕᐅᖃᑦᑕᕐᓗᑎᑦ ᐱᕙᓪᓕᐊᓂᖏᓐᓂ.

8.5. ᐊᖏᔪᖅᑲᑉ ᑐᖏᓕᖓ IACH, ᐱᓕᕆᖃᑎᖃᕐᓗᑎᑦ ᑲᑎᒪᑎᑦᑎᓗᑎᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ, ᑐᕌᒐᐃᑦ ᒪᓕᑦᑕᐅᑦᑎᐊᕋᓗᐊᕐᒪᖔᑕ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓄᑦ ᐱᖁᔭᕐᓂᑦ ᒪᓕᑦᑎᐊᓗᑎᓪᓗ ᒪᓕᒐᕐᔪᐊᓂᑦ, ᐊᑐᐊᒐᕐᓂᑦ ᐱᖁᔭᓂᓪᓗ ᑲᒪᒋᔭᕆᐊᓕᖏᓐᓂ, ᐊᒻᒪᓗ ᑲᒪᒋᐊᓖᑦ ᐃᒪᐃᑦᑐᓂᒃ:

8.5.1. ᐊᐅᓚᑦᑎᑦᑎᐊᕈᓐᓇᕐᓗᑎᑦ ᓯᕗᓕᖅᑎᐅᓂᕐᒥᑦ ᑕᒪᒃᑯᓄᖓ ᒪᓕᒐᕐᔪᐊᓄᑦ ᐱᖁᔭᕐᓄᓪᓗ ᐱᒋᐊᕈᑕᐅᔪᓂᒃ ᐊᑐᓕᖅᑎᑕᐅᓂᖏᓐᓂ ᓯᓚᕐᔪᐊᑉ ᑲᑐᔾᔨᔨᖓᓐᓂ ᐱᖁᔭᖏᓐᓂ.

8.5.2. ᐅᖃᐅᔾᔨᒋᐊᕆᔪᓐᓇᕐᓗᓂ ᐸᕐᓇᐅᑎᓂᑦ, ᐱᓕᕆᔨᒻᒪᕆᐅᓂᕐᒥᑦ, ᐃᑲᔪᖅᑐᐃᓗᑎᓪᓗ ᐊᓯᖏᓐᓂ ᑲᑎᒪᔨᓂᒃ ᑕᒪᒃᑯᓂᖓ ᑲᒪᓂᐊᖅᑎᓪᓗᒋᑦ ᐊᑐᓕᖅᑎᑦᑎᓂᕐᒥᑦ ᐱᖁᔭᕐᓂᑦ.

8.5.3. ᐃᓕᓐᓂᐊᖅᑎᑕᐅᑦᑎᐊᖃᑦᑕᕐᓗᑎᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐱᓕᕆᔪᑦ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᓂᕐᒨᖔᔪᓂᒃ ᐊᒻᒪᓗ ᑖᔅᓱᒥᖓ ᐱᖁᔭᕐᒥᑦ.

8.6. ᐊᖏᔪᖅᑳᒻᒪᕆᒃ ᐊᖏᔪᖅᑳᑉ ᑐᖏᓕᖓ, ᐱᓕᕆᖃᑎᖃᕐᓂᕐᒥᑦ ᑲᑎᒪᑎᑦᑎᖃᑦᑕᕐᓗᑎᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ, ᑲᒪᒻᒪᑕ ᐃᒪᐃᑦᑐᓂᒃ:

8.6.1. ᑲᒪᑦᑎᐊᕐᓂᕐᒧᑦ ᐸᕐᓇᐅᑏᑦ ᐱᓕᕆᖃᑎᖃᕐᓗᑎᑦ ᓄᓇᑐᖃᕐᓂᑦ ᑲᒪᔪᓂᒃ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐊᒻᒪᓗ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᐅᔪᓂᒃ.

8.6.2. ᑲᒪᑦᑎᐊᕐᓂᕐᒧᑦ ᐸᕐᓇᐅᑏᑦ ᐊᑐᓕᖅᑎᑕᐅᑦᑎᐊᕐᓗᑎᑦ ᐅᓂᒃᑳᓕᐅᖃᑦᑕᕐᓗᑎᓪᓗ ᐃᓕᖅᑯᓯᕆᓂᐊᖅᑕᖏᓐᓂ ᖃᖓᒃᑯᓪᓗ ᑲᑎᒪᑎᑦᑎᓂᐊᕐᒪᖔᑕ ᑐᕌᒐᓕᕆᓗᑎᑦ ᓄᓇᖃᖅᑳᖅᓯᒪᔪᑦ ᐱᓕᕆᖃᑕᐅᔪᑦ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖓᓐᓂ.

8.7. ᐊᖏᔪᖅᑳᑉ ᑐᖏᓕᖓ ᐊᒻᒪᓗ ᐃᖅᑲᓇᐃᔭᖅᑎᐊᖅᑐᓕᕆᔨ, ᐱᓕᕆᖃᑎᖃᕐᓗᓂ ᐊᖏᔪᖅᑳᑉ ᑐᖏᓕᖓᓕ ᓄᓇᖃᖅᑳᖅᑐᓕᕆᔨᒃᑯᓐᓂ ᐱᖅᑯᓯᓕᕆᔨᒃᑯᓂᓪᓗ ᐊᒻᒪᓗ ᐱᓕᕆᖃᑎᖃᕐᓗᓂ ᑲᑎᒪᑎᑦᑎᓗᑎᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ, ᑲᒪᒋᔭᖃᖅᑐᑦ ᐋᖅᑭᔅᓱᐃᓗᑎᒃ ᐊᑐᐊᕈᑎᔅᓴᓂᒃ ᐱᖅᑯᓯᓕᕆᓂᒨᖓᔪᓂᒃ ᐃᖅᑲᓇᔭᐃᖅᑖᖅᑐᕐᓗᑎᓪᓗ, ᐱᖅᑯᓯᓕᕆᔨᒥᑦ ᖃᐅᔨᒪᑦᑎᐊᖅᑐᒥ ᐃᓕᓐᓂᐊᕈᑎᔅᓴᓂᑦ.

8.8. ᐊᖏᔪᖅᑳᑉ ᑐᖏᓕᖓ ᐸᕐᓇᐅᑎᓂᒃ ᐱᖁᔭᕐᓂᑦ ᐸᕐᓇᐅᑎᓕᕆᓂᕐᒥᓪᓗ, ᐱᓕᕆᖃᑎᖃᕐᓗᑎᑦ ᑲᑎᒪᑎᑦᑎᓗᑎᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ, ᑲᒪᒋᔭᓕᓐᓂᑦ ᐱᕙᓪᓕᐊᑎᑦᑎᓂᕐᒥᑦ ᐊᖏᔪᖅᑲᐅᑏᑦ ᐃᖅᑲᓇᐃᔭᑦᑎᐊᕆᐊᖃᕐᓂᕐᒧᑦ ᐊᑐᓕᖅᑎᑕᐅᓂᖏᓐᓂᐱᖁᔭᕐᓂᑦ ᑖᔅᓱᒥᖓ.

8.9. ᐊᑕᖏᕐᓗᑎᑦ ᑲᓇᑕᐅᑉ ᒥᕐᖑᐃᖅᓯᕐᕕᖏᑦ ᐊᖏᔪᖅᑳᑉ ᑐᖏᓕᖓ ᑲᒪᔨᐅᔪᑦ ᐃᒪᐃᑦᑐᓂᒃ:

8.9.1. ᐋᖅᑭᔅᓱᐃᓗᑎᑦ ᑲᒪᑦᑎᐊᕐᓂᕐᒧᑦ ᐸᕐᓇᐅᑎᓂᒃ ᓇᓗᓇᐃᔭᐃᓗᑎᓪᓗ ᑲᑎᒪᔨᐅᔪᑦ ᐊᑐᓕᖅᑎᑕᐅᒋᐊᖃᕐᓂᖏᓐᓂ ᑕᕝᕙᓂ ᐱᖁᔭᕐᓂᑦ.

8.9.2. ᕿᒥᕐᕈᔭᐅᑦᑎᐊᖃᑦᑕᕋᓗᐊᕐᒪᖓᑕ ᖃᐅᔨᒪᒋᐊᕐᓗᑎᑦ ᑲᑎᒪᔩᑦ ᑲᒪᑦᑎᐊᖅᑐᓕᕆᓂᕐᒥᑦ ᐸᕐᓇᐅᑎᓂᒃ ᓇᓗᓇᐃᔭᑦᑎᐊᖅᑕᐅᓗᑎᓪᓗ ᓄᓇᖃᖅᑳᖅᓯᒪᔪᑦ ᑲᒪᑦᑎᐊᖅᑐᓕᕆᔨᒃᑯᖏᓐᓂ.

ᕿᒥᕐᕈᔭᐅᖃᑦᑕᕆᐊᖃᕐᓂᖏᑦ

ᑖᒃᑯᐊ ᐱᖁᔭᐃᑦ ᕿᒥᕐᕈᔭᐅᖃᑦᑕᕐᓂᐊᖅᑐᑦ ᐊᕐᕌᒍᐃᑦ ᑕᓪᓕᒪᑦ ᐊᓂᒍᕐᓂᑕᒫᑦ.

ᑐᑭᖏᑦ

ᐱᖅᑯᓯᓕᕆᓂᖅ ᑲᔪᓯᑦᑎᐊᕐᓂᖓᓐᓂ

ᑕᒪᓐᓇ ᐃᓱᒪᒋᔭᐅᓪᓗᓂ ᐅᖃᐅᓯᓕᒃ ᓄᓇᖃᖅᑳᖅᓯᒪᔪᑦ ᐊᐅᓚᑦᑎᓂᖏᑦ ᐱᓕᕆᖃᑎᖃᒃᑲᓂᕐᓂᖏᓐᓂᓪᓗ ᐱᖅᑯᓯᑐᖃᓕᕐᓂᕐᒥᑦ ᐅᑭᐅᖅᑕᖅᑐᒥ, ᓄᓇᓄᑦ ᐊᖏᕈᑎᓂᒃ ᓯᕗᓕᒥᓂᖏᑦᑕᓗ ᓄᓇᑐᖃᒥᓂᖏᓐᓂ, ᐅᖃᐅᓯᓕᕆᓂᕐᒥᓪᓗ, ᐱᖅᑯᓯᓕᕆᓂᕐᒥᓪᓗ, ᑲᒪᑦᑎᐊᕐᓂᕐᒥᓪᓗ ᐊᐅᓚᑦᑎᑦᑎᐊᕐᓂᖏᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᑦ ᑲᒪᒋᐊᖃᕐᓂᖏᓪᓗ. ᐊᑐᖅᑕᐅᖃᑦᑕᕐᓂᖏᑦ ᐱᖅᑯᓯᕐᓂᑦ ᑲᔪᓯᑎᑦᑎᓂᖏᓐᓂ ᓄᓇᑐᖃᒥᓂᕐᓂᑦ ᒪᑯᓂᖓ ᖁᕕᐊᓲᑎᖃᕐᓂᕐᒥᑦ; ᐅᖃᐅᓯᕐᓂᑦ ᐅᓂᒃᑳᖃᕐᓂᖅ; ᓄᓇᖃᖅᑳᖅᓯᒪᔪᑦ ᓯᕗᒃᑲᑕᕐᓂᖏᑦ ᐱᐅᖅᓱᐊᕐᓂᖏᓐᓄᑦ; ᓄᓇᓂᑦ ᐃᓕᓐᓂᐊᕐᓂᖅ ᖃᐅᔨᒪᔭᖏᓐᓂᓪᓗ ᐅᓂᒃᑳᖃᕐᓂᖏᑦ ᐃᓐᓇᐃᑦ ᐃᓅᓱᑦᑐᓪᓗ, ᖃᐅᔨᒪᔨᑕᐃᓪᓗ, ᓄᓇᓖᓪᓗ, ᓂᕿᔅᓴᖅᓯᐅᖃᑦᑕᕐᓂᖏᑦ ᐊᓯᖏᓐᓂᓪᓗ ᐱᔾᔪᙱᖃᕐᓗᑎᑦ.

ᓄᓇᖃᖅᑳᖅᓯᒪᔪᑦ ᓄᓇᖃᖅᑳᖅᓯᒪᓐᖏᑦᑐᓪᓗ ᖃᐅᔨᒪᓂᖏᑦ

ᓄᓇᖃᖅᑳᖅᓯᒪᔪᑦ ᓄᓇᖃᖅᑳᖅᓯᒪᓐᖏᑦᑐᓪᓗ ᖃᐅᔨᒪᓂᖏᑦ ᐅᖃᐅᓯᓕᒃ ᖃᐅᔨᒪᓂᓕᒫᓐᓂᒃ ᐊᒻᒪᓗ ᐊᓯᖏᓐᓂ ᐅᑉᐱᕆᔭᐅᔪᓂᒃ ᒪᓕᒐᐅᔪᓂᓪᓗ. ᐱᔪᓐᓇᑎᑦᑎᔪᖅ ᐊᑐᖅᑕᐅᓂᐊᖅᑎᓪᓗᒋᑦ ᓈᒪᑦᑎᐊᖅᑐᒥᑦ ᑐᑭᓯᐅᒪᓗᑎᑦ ᐱᖅᑯᓯᖃᑎᒋᓐᖏᑕᖏᓐᓂᓪᓗ ᓯᓚᕐᔪᐊᓕᒫᒥᑦ, ᐊᔾᔨᒌᖃᑦᑕᖏᑦᑐᑦ ᐅᖃᐅᓯᐅᔪᑦ, ᐱᖅᑯᓯᕐᒥᓂᓪᓗ ᒪᓕᒐᖃᖅᑐᑎᑦ ᓇᒥᑐᐃᓐᓇᖅ ᑲᓇᑕᒥ.

ᓄᓇᑐᖃᒥᓃᑦ

ᑖᓐᓇ ᐃᓚᓕᐅᔾᔨᓯᒪᔪᖅ ᐅᖃᐅᓯᕐᓂᑦ ᐅᖃᐅᓯᓖᑦ ᓄᓇᓕᒫᑦᑎᐊᕐᓂᑦ, ᓄᓇᓂᓪᓗ ᐃᒫᓃᓕᖅᑐᓂᒃ, ᓯᑯᓂᒃ, ᐃᒪᕐᒥᓪᓗ ᐊᐅᓚᑕᐅᔪᓂᒃ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓄᑦ ᑲᓇᑕᒥ ᓄᓇᑐᖃᕐᓂᑦ, ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᒥᕐᖑᐃᖅᓯᕐᕕᓐᓂᑦ ᓇᓗᓇᐃᖅᑕᐅᓯᒪᔪᓂᒃ, ᑲᓇᑕᐅᑉ ᐃᒪᖏᓐᓂ ᐱᐅᖅᓱᐊᖅᑕᐅᔪᓂᒃ ᓇᓗᓇᐃᖅᑕᐅᓯᒪᔪᓂᓪᓗ, ᐊᓯᖏᓐᓂᓪᓗ ᓄᓇᑐᖃᒥᓂᕐᓂᑦ ᓇᓗᓇᐃᖅᑕᐅᓯᒪᔪᓂᒃ ᐃᓚᖓᓐᓂ 2−ᒥ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐱᖁᔭᖏᑦ ᒪᓕᑦᑐᒋᑦ.

ᑲᑐᔾᔨᓪᓗᑎᑦ ᐊᐅᓚᑦᑎᔾᔪᑏᑦ

ᑲᑐᔾᔨᔪᑦ ᐊᐅᓚᑦᑎᔾᔪᑎᓂᒃ ᐅᖃᐅᓯᓕᒃ ᓴᓐᖏᓂᖏᓐᓂ ᑲᑐᔾᔨᖃᒌᑦᑐᑦ ᐃᓱᒪᓕᐅᖃᑦᑕᓂᒃᑯᑦ. ᐱᓕᕆᖃᑎᒌᑦᑐᑦ ᑕᒪᒃᑯᐊ ᐋᖅᑭᓱᖅᓯᒪᔪᑦ ᐊᔾᔨᐅᖏᑦᑐᑦ ᐃᓚᖓᑎᒋᑦ ᐱᔪᓐᓇᕐᓂᖏᓐᓂ ᐱᓕᕆᐊᕆᔭᕆᐊᓕᖏᓐᓂᓪᓗ ᑲᑐᔾᔨᒐᓗᐊᖅᑐᑎᑦ. ᐅᐊᑦᑎᐊᕈ, ᑲᓇᑕᐅᑉ ᒥᕐᖑᐃᖅᓯᐃᒃᕕᖏᓐᓂ ᐊᑐᖅᓯᒪᔪᑦ ᐅᖃᐅᓯᕐᓂᑦ “ᐱᓕᕆᖃᑎᒌᓐᓂᖅ” ᐊᒻᒪᓗ “ᐱᓕᕆᖃᑎᒋᓐᓂᖅ ᐊᐅᓚᑦᑎᔩᑦ” ᑕᐃᒫᒃ ᓇᓗᓇᐃᖅᑕᐅᕙᔪᔪᖅ. ᐊᓯᖏᓐᓄᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᑦ ᐊᑐᖃᑦᑕᖅᑐᑎᑦ “ᐊᐅᓚᑦᑎᖃᑎᒌᓐᓂᖅ”.

ᑲᑎᒪᑎᑦᑎᓂᖅ ᐱᓕᕆᖃᑎᒌᓐᓂᕐᓗ

ᑖᓐᓇ ᓇᓗᓇᐃᖅᓯᓯᒪᔪᖅ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᓇᓗᓇᐃᖅᓯᓯᒪᔪᖅ ᐱᖁᔭᕐᓂᑦ ᐅᖃᐅᓯᓕᒃ ᒪᓕᒐᕐᓂᑦ ᑲᑎᒪᑎᑦᑎᔅᓴᐃᓐᓇᕆᐊᖃᖅᑐᑎᑦ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓂᒃ. ᑖᒃᑯᐊ ᐅᖃᐅᓰᑦ ᒪᓕᒐᕐᓃᑦᑐᑦ 18−ᒥ 19−ᒥᓗ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᒪᔭᖏᓐᓂ ᐃᓗᓕᖃᖅᑐᑎᓪᓗ UNDA-ᒥᑦ ᐊᑦᑐᐊᔪᓂᒃ ᑐᑭᓯᐅᒪᔭᐅᒋᐊᓕᒃ ᑲᒪᒋᔭᐅᒋᐊᖃᖅᑐᑎᓪᓗ ᑭᒡᒐᖅᑐᐃᓪᓗᑎᑦ ᓂᕈᐊᖅᑕᐅᓯᒪᔪᑦ ᓄᓇᖃᖅᑳᖅᓯᒪᔪᓂᒃ ᐃᓱᒪᖅᓱᖁᓪᓗᒋᑦ, ᓯᕗᓂᖓᓂᓗ ᑐᓴᖅᑎᑦᑎᓗᑎᓪᓗ ᐊᖏᕈᑎᓂᒃ ᑎᒍᓯᓗᑎᑦ ᐊᑐᓕᖅᑎᑦᑎᓗᑎᓪᓗ ᒪᓕᒐᕐᔪᐊᖅᑎᒍᑦ ᐅᕝᕙᓘᓐᓃᑦ ᐊᓪᓚᕕᓕᕆᓂᑦᑎᒍᑦ ᐊᑦᑐᐃᓂᖃᕈᓐᓇᖅᑐᓂᒃ ᑕᐃᒃᑯᓄᖓ. ᑲᑎᒪᑎᑦᑎᓂᖅ ᐱᓕᕆᖃᑎᒌᓐᓂᕐᓗ ᑲᔪᓰᓐᓇᕐᓂᐊᖅᑐᖅ ᐊᑕᐅᓯᕐᒧᑦ ᑐᕌᖓᓐᖏᑦᑐᖅ.

ᖃᐅᔨᒋᐊᕐᕕᔅᓴᐃᑦ

• ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᓄᑦ ᐱᖁᔭᐃᑦ
• ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᓄᑦ ᐱᖁᔭᐃᑦ ᐱᒋᐊᕈᑏᑦ ᐸᕐᓈᑦ
• ᑲᓇᑕᒥ ᓄᐊᑦᑎᓂᖏᑦ ᐅᓪᓗᒥᐅᔪᖅ ᐊᖏᕈᑎᓂᒃ ᐊᑐᓕᖅᑎᑕᐅᔪᓂᒃ ᐱᖁᔭᕐᓂᑦ
• ᐃᓄᐃᑦ ᓄᓇᖓᑕ ᐱᖁᔭᖏᑦ
• ᑲᓇᑕᒥ ᒥᕐᖑᐃᖅᓯᕐᕖᑦ ᐱᐅᔭᖏᑦ
• ᑲᓇᑕᒥ ᐃᒪᕐᒥ ᐱᐅᖅᓱᐊᖅᑕᐅᕙᑦᑐᑦ ᐱᖁᔭᖏᑦ
• ᑲᓇᑕᐅᑉ ᒥᕐᖑᐃᖅᓯᕐᕕᖓᑦᑕ ᐱᖁᔭᖏᑦ
• ᓄᓇᑐᖃᐃᑦ ᐃᖅᑲᐅᒪᔭᑐᖃᐃᓪᓗ ᖃᓄᐃᓘᕐᕕᒥᓃᑦ ᐱᖁᔭᖏᑦ
• ᐅᓂᒃᑳᑦ ᓱᓕᔪᑦ ᓴᐃᒻᒪᖃᑎᒌᓐᓂᒥᓪᓗ ᑭᓪᓕᓯᓂᐊᖅᑏᑦ ᑲᓇᑕᒥ
• ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᓯᓯᒪᓂᖏᑦ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᓄᑦ, ᑲᑐᔾᔨᔩᑦ ᓯᓚᕐᔪᐊᒥ (2007) — ᓇᓗᓇᐃᔭᖅᓯᒪᔪᑦ ᒪᓕᒐᐃᑦ ᑦᒪᐃᑦᑑᓪᓗᑎᑦ: 1-5, 25-26, 29
• ᒪᓕᒐᖅ 1: ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᖁᕕᐊᓲᑎᖃᕐᓗᑎᑦ, ᑲᑐᔾᔨᓗᑎᒃ ᐅᕝᕙᓘᓐᓃᑦ ᐃᒻᒥᒃᑯᑦ, ᑭᒃᑯᑐᐃᓐᓇᓕᒫᑦ ᐱᔪᓐᓇᐅᑎᖃᖅᑐᑦ ᐊᒻᒪᓗ ᐃᓱᒪᖅᓱᕈᓐᓇᖅᑐᑎᓪᓗ ᐃᓕᓴᕆᔭᐅᓪᓗᑎᑦ ᒪᓕᒐᖅᑎᒋᑦ ᓯᓚᕐᔪᐊᒥ ᑲᑐᔾᔨᔩᑦ, ᓯᓚᕐᔪᐊᒥᓗ ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᐱᔪᓐᓇᐅᑎᖏᑦ 4 ᐊᒻᒪᓗ ᓯᓚᕐᔪᐊᒥ ᑭᒃᑯᑐᓐᐃᓇᕐᓄᑦ ᒪᓕᒐᐃᑦ.
• ᒪᓕᒐᖅ 2: ᓄᓇᖃᖅᑳᖅᓯᒪᔪ ᐊᒻᒪᓗ ᐃᒻᒥᒃᑰᖅᑐᑦ ᐃᓱᒪᖅᓱᕐᖓᑕ ᑕᐃᒪᐃᓪᓗᐊᖅᑎᑕᐅᓗᑎᑦ ᐊᓯᖏᓐᓄ ᑭᒃᑯᐃᓐᓇᕐᓄᑦ ᐊᒻᒪᓗ ᐃᒻᒥᒃᑰᖅᑐᑦ ᐱᔪᓐᓇᐅᑎᖃᕐᖓᑕ ᐃᓱᒪᖅᓱᕐᓗᑎᑦ ᐃᓚᐃᓐᓈᖅᑕᐅᖏᑦᑎᐊᕐᓗᑎᑦ, ᐱᔪᓐᓇᐅᑎᒥᓂᒃ ᐊᑐᕐᓗᑎᑦ, ᐱᓗᐊᖅᑐᒥᑦ ᓇᑭᓐᖔᖅᓯᒪᓂᖏᓐᓂ ᐅᕝᕙᓘᓐᓃᑦ ᑭᓇᐅᓂᕐᒥᓂᒃ.
• ᒪᓕᒐᖅ 3: ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᓇᒻᒥᓂᖅ ᐱᓇᓱᐊᕐᓗᑎᑦ. ᐱᔪᓐᓇᐅᑎᖏᑦ ᒪᓕᑦᑐᑎᑦ ᐃᓱᒪᖅᓱᖅᑐᑦ ᑲᑎᒪᔨᐅᓂᖏᓐᓂ ᖃᓄᐃᓕᖓᓂᖏᓐᓂ ᐊᒻᒪᓗ ᐱᓇᓱᐊᕈᓐᓇᖅᑐᑎᑦ ᒪᑭᒪᔾᔪᑎᔅᓴᓂᒃ, ᐃᓄᓕᕆᓂᕐᒥᑦ ᐱᖅᑯᓯᕐᓂᓪᓗ ᐱᕙᓪᓕᐊᓂᑦᒥᑦ.
• ᒪᓕᒐᖅ 4: ᓄᓇᖃᖅᑳᖅᓯᒪᔪ, ᐊᑐᕐᓗᓂᒋᑦ ᐱᔪᓐᓇᐅᑎᖏᑦ ᓇᒻᒥᓂᖅ ᐱᓇᓱᐊᕐᓗᑎᑦ, ᐱᔪᓐᓇᐅᑎᖃᖅᑐᑦ ᐃᒻᒥᒃᑯᑦ ᐱᓇᓱᐊᕐᓗᑎᑦ ᐅᕝᕙᓘᓐᓃᑦ ᓇᒻᒥᓂᖅ ᒐᕙᒪᖃᕐᓗᑎᑦ ᐊᑦᑐᐊᔪᓂᒃ ᐃᓗᐊᓂ ᓯᓚᑖᓂᓗ, ᐊᒻᒪᓗ ᑮᓇᐅᔭᓕᕆᓂᕐᒥᑦ ᓇᒻᒥᓂᕐᓗ ᐊᐅᓚᓗᑎᑦ.
• ᒪᓕᒐᖅ 5: ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᑲᒪᐃᓐᓇᕐᓗᑎᑦ ᓴᓐᖓᑎᑉᐸᓪᓕᐊᓗᑎᑦ ᑲᑎᒪᔨᐅᕕᖏᓐᓂ ᐊᔾᔨᐅᓐᖏᑦᑐᓂᒃ, ᒪᓕᒐᖅᑎᒍᑦ, ᒪᑭᒪᔾᔪᑎᔅᓴᒃᑯᑦ, ᐃᓄᓕᕆᓂᑦᑎᒍᑦ ᐊᒻᒪᓗ ᐱᖅᑯᓯᖏᑎᒍᑦ, ᐱᔪᓐᓇᐅᑎᖃᐃᓐᓇᕐᓗᑎᑦ ᓈᒪᑦᑎᐊᖅᑐᓂᒃ ᐃᓚᐅᓗᑎᑦ, ᑕᐃᒪᐃᒍᒪᑉᐸᑕ, ᑲᑎᒪᔨᐅᓂᒃᑯᑦ, ᒪᑭᒪᔾᔪᑎᖏᑎᒍᑦ, ᐃᓄᓕᕆᓂᑦᑎᒍᑦ ᐱᖅᑯᓯᖏᑎᒍᓪᓗ ᐃᓅᓯᕐᒥᓅᖓᔪᓂᒃ.
• ᒪᓕᒐᖅ 25: ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᐊᐅᓚᑦᑏᓐᓇᕐᓗᑎᑦ ᓴᓐᖏᓂᖃᕐᓗᑎᓪᓗ ᐊᔾᔨᐅᖏᑦᑐᓂᒃ ᐅᑉᐱᕐᓂᖏᓐᓂ ᐱᖅᑯᓯᖏᓐᓂ ᓇᒻᒥᓂᖅ ᐅᕝᕙᓘᓐᓃᑦ ᐊᑐᖅᑕᒥᓂᒃ ᓄᓇᒥᑦ, ᐅᑭᐅᖅᑕᖅᑐᒥ, ᐃᒪᕐᒥ ᐊᒻᒪᓗ ᓯᔾᔭᓕᓐᓂᑦ ᐊᓯᖏᓐᓂᓪᓗ ᐊᑐᕈᓐᓇᖅᑕᖏᓐᓂ ᑲᒪᒋᔭᖃᕐᓂᐊᖅᑐᑦ ᓯᕗᓂᑦᑎᓐᓂ ᑭᖑᕚᑦᑎᓐᓄᑦ ᐱᔾᔪᑎᖃᕐᓗᑎᑦ.
• ᒪᓕᒐᖅ 26:
  1. ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᓄᓇᒧᑦ, ᐅᑭᐅᖅᑕᖅᑐᒥ ᑭᓱᑐᐃᓐᓇᕐᓂᓪᓗ ᐊᑐᐃᓐᓇᐅᔪᓂᒃ ᐱᖅᑯᓯᒃᑯᑦ ᓇᒻᒥᓂᕆᓪᓗᓂᒋᑦ, ᓇᔪᕈᓇᖅᑐᓂᒋᑦ ᐅᕝᕙᓘᓐᓃᑦ ᐃᓯᕈᓐᓇᖅᑐᒋᑦ ᐱᕕᒋᔪᓐᓇᖅᑐᒋᓪᓘᓐᓃᑦ.
  2. ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᐊᑐᕈᓐᓇᕐᓗᑎᑦ, ᐱᕙᓪᓕᐊᓗᑎᒃ ᐊᐅᓚᑦᑎᓗᑎᓪᓗ ᓄᓇᖏᓐᓂ, ᐅᑭᐅᖅᑕᖅᑐᒥ ᓱᓇᒃᑯᑖᓂᓪᓗ ᐊᑐᕈᒪᔭᖏᓐᓂ ᐱᖅᑯᓯᖅᑎᒍᑦ ᓇᒻᒥᓂᕆᔭᖏᓐᓂ.
  3. ᐅᖃᖅᓯᒪᔪᑦ ᒪᓕᒐᖅᑎᒍᑦ ᐃᓕᓴᕆᔭᐅᓯᒪᓪᓗᑎᑦ ᐸᖅᑭᑦᑎᓂᖏᓐᓂ ᑕᒪᒃᑯᓂᖓ ᓄᓇᓂᑦ, ᐅᑭᐅᖅᑕᖅᑐᒥᑦ ᐊᑐᐃᓐᓇᐅᔪᓂᓪᓗ. ᒪᑯᐊ ᐃᓕᓴᕆᔭᐅᔪᑦ ᑲᒪᒋᔭᐅᒋᐊᓖᑦ ᐅᑉᐱᒍᓱᑦᑎᐊᕐᓗᑎᑦ ᐃᓕᖅᑯᓯᖏᓐᓂ, ᐱᖅᑯᓯᖏᓐᓂ ᓄᓇᓂᓪᓗ ᐊᑐᖅᐸᑦᑕᖏᓐᓂ ᓄᓇᖃᖅᑳᖅᓯᒪᔪᑦ ᐃᓱᒫᓘᑎᒋᔭᖏᓐᓂ.
• ᒪᓕᒐᖅ 29:
  1. ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖃᖅᑐᑦ ᐱᐅᖅᓱᐊᓂᕐᒧᑦ ᐸᖅᑭᑦᑎᓂᕐᒧᓪᓗ ᐊᕙᑎᑦᑎᓐᓂ ᐊᒻᒪᓗ ᐱᓕᕆᔪᓐᓇᕐᓗᑎᑦ ᓄᓇᓂᑦ ᐅᑭᐅᖅᑕᖅᑐᒥᓪᓘᓐᓃᑦ ᐊᑐᐃᓐᓇᐅᔪᓂᓪᓗᓐᓂᑦ. ᑎᒥᐅᔪᑦ ᐋᖅᑭᔅᓯᒪᔪᑦ ᐊᑐᓕᖅᑎᑦᑎᓗᑎᓪᓗ ᐃᑲᔪᖅᑕᐅᓗᑎᑦ ᐃᑲᔫᑎᔅᓴᓄᑦ ᓄᓇᖃᖅᑳᖅᓯᒪᔪᓄᑦ ᓲᕐᓗ ᐱᐅᖅᓱᐊᕐᓂᐊᖅᑎᓪᓗᒋᑦ ᐸᖅᑭᑎᑦᑎᓪᓗᒋᑦ, ᐃᓚᐃᓐᓈᖅᑕᐅᖏᑦᑎᐊᕐᓗᑎᑦ.
  2. ᑎᒥᐅᔪᖅ ᖃᐅᔨᓴᕐᓂᐊᖅᑐᖅ ᑭᓱᑐᐃᓐᓇᕐᓂᑦ ᑐᖅᑯᐃᖃᑦᑕᕆᐊᖃᓐᖏᑦᑐᑦ ᐅᕝᕙᓘᓐᓃᑦ ᐃᒋᑦᑎᒋᐊᖃᓐᖏᑦᑐᑦ ᐅᓗᕆᐊᓇᖅᑐᓕᓐᓂᒃ ᓄᓇᒧᑦ ᐅᑭᐅᖅᑕᖅᑐᒧᓪᓘᓐᓃᑦ ᓄᓇᖃᖅᑳᖅᓯᒪᔪᑦ ᐊᖏᓚᐅᓐᖏᓐᓂᓕᒫᖏᓐᓂ ᑐᓴᖅᑎᑕᐅᓚᐅᓐᖏᓂᓕᒫᖏᓐᓂᓪᓗ.
  3. ᑎᒥᐅᔪᖅ ᖃᐅᒪᑦᑎᐊᕋᓱᒃᑲᔭᖅᑐᑦ, ᑕᐃᒪᐃᒋᐊᖃᕈᑎᒃ, ᐅᔾᔨᓱᕐᓗᑎᑦ, ᑲᒪᑦᑎᐊᕐᓗᑎᑦ ᑐᖅᑯᐃᓗᑎᓪᓗ ᓄᓇᖃᖅᑳᖅᓯᒪᔪᓄᑦ, ᐋᖅᑭᔅᓱᐃᓗᑎᑦ ᐊᑐᓕᖅᑎᑦᑎᓗᑎᓪᓗ ᐃᓄᓐᓄᑦ ᐊᑦᑐᐃᓂᖃᖅᑐᓂᒃ ᓲᕐᓗ ᓱᓇᒃᑯᑖᕐᓂᑦ, ᐊᑐᓕᖅᑎᑕᐅᓂᐊᕈᑎᓪᓘ