ᖃᐅᔨᓴᕐᓂᖅ 2024
Wrecks of HMS Erebus and HMS Terror National Historic Site
ᐋᒡᒋᓯ 30, 2024−ᖑᑎᓪᓗᒍ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐃᒪᐅᑉ ᐃᓄᐊᓂ ᐃᓂᑐᖅᓂᑐᖃᓕᕆᔨᑦ ᐱᓕᕆᖃᑎᒌᑦ (ᐱᓕᕆᖃᑎᒌᑦ) ᐅᖅᓱᖅᑑᒥᖓᓚᐅᖅᑐᑦ, ᓄᓇᕗᑦ, ᐅᒥᐊᖅ ᑕᐃᕕᑎ ᑖᒻᓴᓐ ᑲᔪᓯᖁᓪᓗᒋᑦ ᐃᑦᑕᕐᓂᑕᓂᑦ ᖃᐅᔨᓴᕈᒪᓂᖏᑦ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ. ᐅᖓᑖᓂ ᐅᓪᓗᐃᑦ 13 ᐊᑯᓐᓂᖓᓂ ᐃᑦᑕᕕᒃ ᐋᒡᒋᓯ 31−ᐊᒥᕋᐃᔭᕐᕕᒃ 13, ᖃᐅᔨᓴᖅᑏᑦ 50 ᐊᖅᑲᐅᒪᓚᐅᖅᑐᑦ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᐊᖅᑲᐅᒪᔨᖏᑦ ᐊᒪᓗ ᖃᓗᕋᕐᑎᓪᓗᒋᑦ ᐃᑲᔪᖅᑕᐅᓪᓗᑎ ᑲᓕᒐᕐᒧᑦ ᑕᐃᔭᐅᔪᖅ ᕿᓂᖅᑎᕐᔪᐊᖅ ᖃᐅᔨᓴᖅᑕᐅᖏᓐᓇᖁᓪᓗᒍ ᐃᕆᐸᔅ, ᐊᒻᒪᓗ ᐊᑦᑕᕆᔭᐅᓪᓗᑎ ᐲᔭᖅᑕᐅᔪᑦ ᐃᑦᑕᕐᓂᓴᐃᑦ. ᐃᓚᒋᔭᐅᓪᓗᓂ ᖁᓕᓂᑦ ᓇᓪᓕᐅᓂᖅᓯᐅᕐᑕᐅᑎᓪᓗᒍ ᓇᓂᔭᐅᓚᐅᕐᓯᒪᒻᒪᑎᒃ ᑯᐃᓐ ᐅᒥᐅᖁᑖ ᐃᕆᐸᔅ, ᑭᒡᒐᖅᑐᐃᔩᑦ ᐊᒪᓗ ᐃᓐᓇᑐᖃᐃᑦ ᓇᑦᑎᓕᒃ ᐅᑐᖅᑲᖃᖅᕕᖓᓃᖓᕐᑐᑦ, ᐅᒥᐊᕕᓂᕐᒥ ᑲᒪᔨᑕ, ᓄᓇᓖᑦ ᐅᖅᓱᖅᑑᖅ, ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᑕᑯᔭᖅᑐᓚᐅᖅᑐᑦ ᐃᕆᐸᔅᒥᒃ ᐊᖅᑲᐅᒪᓪᓗᑎᒃ ᐊᒻᒪᓗ ᖃᓗᕋᕐᑕᐅᓪᓗᑎᒃ ᑲᓕᒐᕐᒧᑦ ᑕᐃᔭᐅᔪᖅ ᕿᓂᕐᑎᖅᔪᐊᖅ. ᐃᖃᔪᖅᑎᖏᑦ ᓄᓇᓕᖕᒥᐅᓪᓗ ᕿᒥᕐᕈᓚᐅᖅᑐᑦ ᕿᒥᕐᕈᑎᑦᑎᔨᖃᖅᑐᑎ ᐅᒦᔭᕈᑕᐅᔪᕕᕐᒥ ᑕᕐᕆᔮᔅᓴᓕᐊᖑᓯᒪᔪᒃᑯᑦ ᐃᒪᐅᑉ ᐃᖅᑲᖓᓂ ᐃᑦᑕᕐᓂᓴᓕᕆᔨᒧᑦ. ᐃᒪᐅᑉ ᐃᓄᐊᓂ ᐃᓂᑐᖅᓂᑐᖃᓕᕆᔨᑦ ᐱᓕᕆᖃᑎᒌᑦ ᐃᑦᑕᕐᓂᑕᓕᕆᓂᕐᒥ ᑲᔪᓯᑎᑦᑎᓚᐅᖅᑐᑦ ᖃᓗᕋᕐᑐᑎᒃ ᐅᒥᐊᕐᔪᐊᕐᒥᐅᖑᖃᑕᐅᔫᑉ ᑭᓱᖃᕐᕕᖓᓂ ᐅᒥᐊᕐᔪᐊᕐᒥᐅᑦ ᓇᔪᖃᑦᑕᓚᐅᕐᑕᖓᓂ (ᓯᕗᐊᓂ) ᐅᒥᐊᕐᔪᐊᑉ ᐊᑦᑎᓐᓂᖓᓂ, ᓴᖅᑭᑎᑦᑎᓗᑎ ᐊᔾᔨᒌᖏᑦᑐᓂᑦ ᓴᓇᕐᕈᑎᓂᑦ ᐱᖃᓯᐅᑎᓪᓗᓂ ᐊᐅᖅᑭᑎᑦᑎᔾᔪᑎ, ᐊᓐᓄᕌᒥᓃᑦ ᓲᕐᓗ ᐊᒡᒑᑦ ᐊᓕᖅᓰᓪᓗ, ᐄᔭᒐᒃᑯᕕᑦ ᐃᓅᓕᓴᐅᑎᓄᑦ, ᒪᕐᕉᒃ ᐃᓪᓗᐃᓇᕐᑑᑏᒃ (20 ᐅᖓᑖᓃᓚᐅᕐᑐᑦ ᑕᑯᔭᐅᔪᑦ ᑭᓱᖃᐅᑎᖃᕐᕕᖓᓂ), ᐅᓐᖏᔭᐅᑎᒐᓚᐃᓪᓗ. ᐃᓂᒋᖃᑦᑕᓚᐅᕐᑕᖓᓂᐅᔪᑦᓴᐅᔪᖅ ᑳᐱᑕᓐ ᓯᑑᕙᑦ ᓱᓇᖃᐅᑎᖓᑕ ᐅᒥᐊᕐᔪᐊᑉ ᐊᑦᑎᓐᓂᖓᓂ, ᐊᓯᖏᑦ ᓱᓇᒃᑯᑖᑦ ᑳᐱᑕᓐ ᐃᓂᒋᖃᑦᑕᓚᐅᕐᑕᖓᓂ ᐅᒥᐊᕐᔪᐊᕐᒥᐅᑕᐅᑎᓪᓗᒍ ᓲᕐᓗ ᐃᒥᖃᐅᑎ, ᐅᐊᓴᐅᑎᒃᑯᕕᒃ, ᐊᒻᒪᓗ ᐊᓕᒍᐃᑦ ᐃᒥᐅᑏᑦ ᓇᓂᔭᐅᓚᐅᖅᑐᑦ. ᖃᓗᕋᕐᑎᓪᓗᒋᑦ ᓇᓂᓯᓚᐅᕐᒥᔪᑦ ᐊᒧᔫᕋᓛᒥᑦ ᐃᓚᒋᔭᒥᓂᐅᓱᒋᔭᐅᔪᖅ ᐱᖓᔪᖓᓐᓄᑦ ᓘᑕᓚᓐᒧᑦ ᔭᐃᒻᔅ ᕕᐅᕼᐅᒻᔅ ᓯᓂᕝᕕᐊᓂ, ᐅᒥᐊᕐᔪᐊᑉ ᐊᑦᑎᓐᓂᖓᓂ. ᖃᐅᔨᔭᔅᓴᐅᔪᑦ ᓇᓂᔭᐅᔪᑦ ᐱᖃᓯᐅᔾᔨᓚᐅᖅᑐᑦ ᐅᒥᐊᔪᐊᑉ ᓇᓗᓇᐃᒃᑯᖓᑕ ᐃᓚᖓᓐᓂᒃ, ᒥᑭᔪᖅ ᐄᔭᒐᖃᕐᕕᒃ, ᐃᒐᓛᒧᑦ ᐊᕙᓗ ᐃᒐᓛᖏᑦ ᐊᑕᓪᓗᑎ, ᐅᒥᐊᕐᔪᐊᕐᒥ ᓱᓇᒃᑯᑖᒥᓂᐅᕙᓗᑦᑐᖅ ᐅᕝᕙᓘᓐᓃᑦ ᖁᓛᑕ ᐃᒐᓛᖓ. ᐅᖃᐅᓯᕆᔪᒥᓇᕐᒥᔪᖅ ᓇᓂᔭᐅᓚᐅᕐᓂᖓ ᐃᒻᒥᒃᑯᑦ ᐃᖃᖅᑎᒐᔭᐅᔭᑯᑖᖅ ᐃᕐᕋᖅ ᐃᒧᓯᒪᔪᖅ ᓴᓃᑦ ᐃᒻᒧᐊᓐᓂ ᓯᕗᐊᑕ ᐊᑕᓂ, ᐊᒻᒪᓗ ᓇᓂᔭᐅᒋᓪᓗᓂ ᐃᓗᐃᑦᑐᑲᓴᒃ ᐅᖓᓯᓐᓂᕐᓯᐅᑎ ᖃᐅᔨᓴᐅᑎ ᐅᒥᐊᕐᔪᐊᑉ ᐊᑦᑎᓐᓂᖓᓂ ᑳᐱᑕᐅᑉ ᓯᓂᕝᕕᐊᓂ. ᖃᐅᔨᓴᕐᑕᐅᕕᒻᒨᕐᓂᐊᕐᒥᔪᖅ, ᐱᔭᐅᔪᑦ ᐃᑦᑕᕐᓂᓴᐃᑦ, ᓇᒻᒥᓂᖁᑎᖃᑎᒌᑦᑑᒃ ᒥᕐᖑᐃᓯᕐᕕᒃ ᑲᓇᑕᒥ ᐊᒻᒪᓗ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ, ᑕᐃᒫᒃ ᖃᐅᔨᓴᖅᑕᐅᕕᒻᒨᖃᑦᑕᕐᒪᑕ ᐋᑐᕚᒧᑦ ᐱᓕᕆᐊᖑᓂᐊᖅᑐᑎᓪᓗ ᓂᕈᐊᖅᑕᐅᔪᑦ ᐅᑎᖅᑎᑕᐅᓚᐅᓐᖏᓐᓂᖏᓐᓂ ᓇᑦᑎᓕᒃ ᐅᑐᖅᑲᖃᖅᕕᖕᒧᑦ ᐅᖅᓱᖅᑑᒥ. ᐱᓕᕆᔩᑦ ᐊᐅᓚᑦᑎᒍᑎᖃᓚᐅᕐᒥᔪᑦ ᐊᐅᓚᑕᒐᕐᒥᒃ ᐊᔾᔨᓕᐅᕈᑎᓕᒃ ᐃᖏᕐᕋᔫᖅ (ᐃᖏᕐᕋᔫᖅ) ᐊᑐᕐᑐᑎᒃ ᐃᑎᓂᖅᓴᒨᑕᐅᓪᓗᓂ ᕿᒥᕐᕈᒍᑎᐅᓚᐅᕐᑐᖅ ᐃᓗᐊᓂᑦ ᐅᒦᔭᕈᑕᐅᔪᕕᓂᐅᑉ ᐊᑦᑎᓛᖓᓂᑦ ᓯᓂᕝᕕᐅᕙᑦᑐᒥᓂᕐᒥ. ᑐᖅᑯᐃᕕᐅᕙᑦᑐᓂ ᓱᓇᒃᑯᑖᖃᕐᕕᐅᓪᓗᓂᓗ ᐆᓇᕐᑐᓕᐅᕐᕕᐅᓪᓗᓂᓗ ᐅᒥᐊᕐᔪᐊᑉ ᐸᐅᑎᖏᓐᓂᑦ ᐆᓇᕐᑐᒧᑦ ᐸᐅᖅᑎᑦᑎᕕᐅᓪᓗᓂ ᐋᖅᑭᑦᑕᒥᓂᕐᒥᑦ 1845−ᖑᑎᓪᓗᒍ. ᐅᕝᕙ ᐅᑯᐊ ᐃᒫᓂ ᐊᖅᑲᐅᒪᔪᓄᑦ ᐊᔾᔨᓕᐅᖅᑕᐅᓯᒪᔪᑦ ᐅᒥᐊᕐᔪᐊᒥᑦ ᐆᖅᑰᑎᑦᓯᒍᑕᐅᕙᖅᑐᒥᓂᖅ ᓯᐅᓪᕙᔅᑐᒧᑦ ᓴᓇᐅᒐᐅᓂᖓᓂᒃ ᓇᓗᓇᐃᒃᑯᓯᕐᓯᒪᓪᓗᓂ, ᐅᒥᐊᕐᔪᐊᑉ ᐊᐅᓚᐅᑎᖃᕐᕕᖓ ᐊᒻᒪᓗ ᒪᕐᕉᒃ ᐊᐅᒫᓗᑎᖃᕐᕖᒃ ᐅᒥᐊᕐᔪᐊᑉ ᓴᓂᕌᓃᑦᑐᑎᒃ. ᐊᐅᓚᐅᑏᑦ, ᓴᐅᔭᐅᓯᒪᓚᐅᕐᑐᑦ ᒪᕐᕋᒧᑦ ᑭᓱᒐᓚᓐᓄᓪᓗ, ᐊᐅᓚᐅᑎᖃᕐᕕᒥᓂᖓ ᓇᐸᕈᑕᖃᕐᕕᖓᓗ ᐱᖃᓯᐅᑎᓪᓗᑎᒃ. ᐃᔾᔪᔪᒥᑦ ᐊᑦᑐᓈᑕᖃᕐᑐᓂ ᐃᒧᒪᔪᒥᑦ, ᑎᖏᕐᕋᐅᑕᖓᓄᑦ ᐊᑦᑐᓈᑦᓴᐅᔪᑦᓴᐅᔪᖅ, ᖃᓂᒋᔮᓃᑦᑐᑦ ᐊᐅᓚᐅᑎᖏᑕ. ᖃᐅᔨᓴᖅᑕᐅᓂᐊᕐᑐᑦ ᐊᐅᓚᐅᑎᖏᑕ ᓇᓗᓇᐃᒃᑯᑕᖏᒃ ᓱᖅᑯᐃᖅᑕᐅᓚᐅᓐᖏᓐᓂᖏᓐᓂ ᑭᓱᓄᓪᓗ ᐊᑐᕐᓂᕐᒪᖔᑕ ᓱᕐᑯᐃᕐᑕᐅᓇᓱᐊᖏᓐᓇᓂᐊᖅᑑᒃ. ᒪᕐᕉᒃ ᐊᑯᓂ ᕿᒥᕐᕈᔭᐅᔪᒃᓴᒫᒃ “ᐊᕙᑖᓃᑦᑑᒃ” ᐊᐅᒫᓘᑎᖃᐅᑎᒥᓃᒃ ᐃᓯᕐᑕᐅᒍᓐᓇᓚᐅᕐᑑᒃ ᐊᐅᓚᑎᑕᒐᕐᒧᑦ ᐅᖓᓯᑦᑐᒥᑦ ᐊᐅᓚᑕᐅᔪᒧᑦ. ᑖᒃᑯᐊ ᐊᒥᐊᒃᑯᒥᓂᖃᓐᖏᒻᒪᑕ ᐊᐅᒫᓘᑎᓂᑦ ᐊᑐᕐᑕᐅᔪᑦᓴᒫᓂᑦ ᐸᐅᑎᖏᓐᓄᑦ ᐃᖏᕐᕋᑎᑦᓯᒍᑎᐅᓪᓗᑎᒃ, ᐆᓇᖅᑐᓕᐅᕈᑎᐅᓪᓗᑎᒃ ᓂᕿᓕᐅᕈᑎᐅᓪᓗᑎᓪᓗ; ᐃᓗᓕᖃᓚᐅᓐᖏᑦᑑᒃ ᑕᑯᔭᔅᓴᐅᔪᓂᑦ ᐊᑦᑎᓐᓂᓕᒫᖓᑕᓗ ᐃᓗᓕᖃᕐᕕᒋᔪᓐᓇᕐᑕᖓ. ᐊᐅᒫᓘᑏᑕᖃᓐᖏᓐᓂᖓ ᐊᐅᒫᓘᑎᖃᐅᑎᖓᓂ ᖃᐅᔨᒪᓇᒐᓚᓚᐅᕐᑐᖅ ᐊᑯᓂᐊᓗᒃ ᐅᒥᐊᕐᔪᐊᕐᒦᓚᐅᕐᒪᑕ ᐊᐅᓪᓚᖅᓯᒪᓪᓗᑎᒃ ᐊᒻᒪᓗ ᐊᑲᐅᖏᓕᐅᕈᑎᖃᓕᓚᐅᕐᒪᑕ ᓯᑯᐃᑦ ᐱᓪᓗᒋᑦ ᐅᒥᐊᕐᔪᐊᒦᑦᑐᑦ ᕿᒪᐃᓚᐅᖅᑎᓐᓇᒋᑦ ᐅᒥᐊᕐᔪᐊᒥᑦ. ᖃᐅᔨᔪᒥᓇᖅᑐᒥᓪᓕ, ᐅᒥᐊᕐᔪᐊᖁᑎᓖᑦ ᐅᕝᕙᓘᓐᓃᑦ ᐅᒥᐊᕐᔪᐊᒦᑦᑐᑦ ᐊᖅᑯᑎᓕᐅᕐᓯᒪᓚᐅᕐᑐᑦ ᐃᒻᒪᑦᑕᐅᑎᒋᖏᑦᑐᑎᒍᑦ ᐊᑯᓐᓂᖏᓐᓂ ᐊᐅᒫᓘᑎᖃᕐᕖᒃ ᐊᒻᒪᓗ ᐊᐅᓚᐅᑎᖃᕐᕕᖓᓄᑦ, ᐃᒻᒪᖃ ᐊᑲᐅᓈᕐᓯᒪᖁᓪᓗᒍ ᐊᑐᕆᐊᖓ ᐊᐅᓚᐅᑎᖃᕐᕕᖓᓄᑦ. ᐃᑦᑕᕐᓂᓴᓕᕆᔩᑦ ᐱᓕᕆᓚᐅᕐᒥᔪᑦ ᖃᐅᔨᓴᖅᑐᑎ ᐊᔾᔨᓐᖑᐊᖏᑎᒍᑦ ᖃᓗᕋᖅᑕᐅᓯᒪᔪᓂᑦ ᓂᐱᓂᓪᓗ ᖃᐅᔨᓴᕈᑎᖃᕐᑐᑎᒃ ᓇᔪᖅᑕᐅᔪᖅ ᑐᑭᓯᑦᑎᐊᕐᑕᐅᖁᓪᓗᒍ ᐊᓯᔾᔨᐸᓪᓕᐊᔪᓪᓗ ᐱᓪᓗᒋᑦ ᐅᒦᔭᕈᑕᐅᔪᕕᓂᐅᑉ ᓴᓇᓯᒪᓂᖓ ᖃᓂᒋᔭᖏᓐᓃᑦᑐᓪᓗ ᐱᓪᓗᒋᑦ ᓱᓇᒃᑯᑖᑦ. ᐃᒪᐅᑉ ᐃᓄᐊᓂ ᐃᓂᑐᖅᓂᑐᖃᓕᕆᔨᑦ ᐱᓕᕆᖃᑎᒌᑦ ᑲᔪᓯᑎᑦᑎᓚᐅᖅᑐᑦ ᐃᑦᑕᕐᓂᓴᓕᕆᓂᕐᒧᑦ ᖃᐅᔨᓴᕐᑐᑎᒃ ᐅᒦᔭᕈᑕᐅᔪᕕᓂᕐᒥᑦ ᑯᐄᓐ ᐅᒥᐅᖁᑖ ᑎᐅᕐᕈᕐ ᐊᒥᕋᐃᔭᕐᕕᒃ 14-15. ᑖᓐᓇ ᓯᕗᓪᓕᖅᐹᖅ ᐅᑎᕐᕕᐅᓂᖓ ᐊᖅᑲᐅᒪᕙᑦᑐᓄᑦ 2019−ᒥᓂᑦ. ᐃᑦᑕᕐᓂᓴᓕᕆᔩᑦ ᖃᐅᔨᓴᓚᐅᕐᒥᔪᑦ ᐃᒪᓃᑦᑐᓂᑦ, ᐊᔾᔨᓐᖑᐊᑎᒍᓪᓗ ᖃᐅᔨᓴᖅᑐᑎᑦ ᐅᒦᔭᕈᑕᐅᔪᕕᓂᐅᑉ ᖁᓛᖓᓂ (ᐊᔾᔨᓕᐅᕆᓪᓗᑎ ᕼᐊᓐᓇᓚᖏᓐᓃᑦᑐᓂᑦ ᐊᔾᔨᓐᖑᐊᑦᑎᐊᕙᓐᓂᑦ) ᐱᔭᕇᖁᓪᓗᒋᑦ ᓇᓗᓇᐃᔭᖅᑕᐅᓯᒪᓂᖏᑦ ᓇᔪᖅᑕᐅᔪᑦ ᐸᕐᓇᐅᑎᖏᑦ ᐊᒻᒪᓗ ᓴᖅᑭᑕᐅᖁᓪᓗᒋᓪᓗ ᐱᓪᓚᕆᓐᖑᐊᑦ ᐊᔾᔨᓐᖑᐊᖏᑦ ᐅᒥᕐᔪᐊᒥᓂᐅᑉ. ᐃᒪᐅᑉ ᐃᖅᑲᖓᓂ ᐊᖅᑲᐅᒪᓪᓗᑎ ᐱᓕᕆᓚᐅᖅᑐᑦ ᓂᐱᓕᐅᕈᑎᓂᑦ ᐊᑐᕐᑐᑎᒃ ᖃᐅᔨᓴᐅᒻᒥᑦ ᐃᖏᕋᓂᖏᓐᓄᑦ ᓇᓗᓇᐃᔭᐃᔪᒥᑦ (ᖃᐅᔨᓴᐅᑎ), ᖃᐅᔨᓴᐅᑎ ᐊᑐᖅᑕᐅᔪᖅ ᖃᐅᔨᓴᖅᑐᓂ ᐃᒪᐅᑉ ᐃᖏᕋᓂᖏᓐᓂ, ᐃᖅᑲᖓᓂ ᖃᓂᒋᔭᖓᓂ ᓇᔪᖅᑕᐅᔪᒥᑦ. ᐊᔾᔨᐸᓗᖓ ᖃᐅᔨᓴᐅᑎ ᐋᖅᑭᑦᑕᐅᓚᐅᕐᒥᔪᖅ ᑯᐄᓐ ᐅᒥᐅᖁᑖ ᐃᕆᐸᔅ; ᑐᑭᓯᒋᐊᕈᑏᑦ ᓄᐊᑕᐅᔪᑦ ᑕᒪᒃᑭᓐᓂ ᖃᐅᔨᓴᐅᑏᑦ ᐃᑲᔪᕈᒫᕐᓂᐊᕐᑐᑦ ᓇᔪᖅᑕᖓᑕ ᐊᕙᑎᖓᑕᓗ ᖃᓄᐃᓐᓂᕆᔭᖓᓂᑦ ᐱᔾᔪᑕᐅᔪᓂᓪᓗ ᐊᑦᑐᐃᒍᓐᓇᕐᑐᓂᑦ ᐊᑯᓂ ᐱᓯᒪᔭᐅᒍᓐᓇᖁᓪᓗᒋᑦ ᐅᒦᔭᕈᑕᐅᔪᒥᓃᒃ. ᑖᓐᓇ ᐅᒥᐊᖅ ᑕᐃᕕᑎ ᑖᒻᓴᓐ ᐅᑎᓚᐅᖅᑐᖅ ᐅᖅᓱᖅᑑᒧᑦ ᐊᒥᕋᐃᔭᕐᕕᒃ 16 ᐅᒥᐊᕐᔪᐊᒨᕐᓂᐊᕐᑐᑦ ᐊᒻᒪᓗ ᓱᓇᒃᑯᑖᓪᓗ ᑕᐅᖅᓯᕐᑕᐅᓪᓗᑎᒃ, ᐃᑲᔪᖅᑕᐅᓪᓗᑎ ᑲᓕᒐᕐᒧᑦ ᑕᐃᔭᐅᔪᖅ ᕿᓂᖅᑎᕐᔪᐊᖅ ᑲᓕᑦᑕᐅᓪᓗᓂ. ᐃᒪᐅᑉ ᐃᓄᐊᓂ ᐃᓂᑐᖅᓂᑐᖃᓕᕆᔨᑦ ᐱᓕᕆᖃᑎᒌᑦ ᖃᖓᑕᓲᒃᑯᑦ ᐅᑎᓕᐅᖅᑐᑦ ᐋᑐᕚᒧᑦ ᐅᒥᐊᕐᔪᐊᖅ ᐅᑎᖅᐸᓪᓕᐊᑎᓪᓗᒍ ᖃᓪᓗᓈᑦ ᓄᓇᖓᓐᓄᑦ ᑐᓚᑦᑕᕐᕕᖓᓄᑦ ᐳᕆᐊᔅᑳᑦ, ᐋᓐᑎᐅᕆᐅᒥ. ᒥᕐᖑᐃᓯᕐᕕᓕᕆᔩᑦ ᑲᓇᑕᒥ ᐃᓄᐃᓪᓗ ᐱᓕᕆᖃᑎᒌᒃᐳᑦ ᐊᐅᓚᑦᑎᓪᓗᑎᒃ ᓴᐳᔾᔨᓪᓗᑎᒡᓗ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ. ᐅᒦᔪᕈᑕᐅᔪᕕᓃᒃ ᑯᐃᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐃᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕖᒃ ᑲᓇᑕᒥ ᑲᑐᔾᔨᖃᑎᒌᒍᑕᐅᓪᓗᓂ ᐊᐅᓚᑕᐅᕗᖅ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᑦᓄᑦ ᐃᓄᓐᓄᓪᓗ, ᑲᑐᔾᔨᖃᑕᐅᒥᔪᑦ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ, ᓇᑦᑎᓕᒃ ᐅᑐᖅᑲᖃᖅᕕᒃ ᑲᑐᔾᔨᖃᑎᒌᑦ ᐃᑲᔪᖅᑕᐅᓪᓗᑎᒃ ᕿᑎᕐᒥᐅᑦ ᐃᓄᐃᑦ ᑲᑕᔾᔨᖃᑎᒌᖏᓐᓄᑦ. ᑲᑐᔾᔨᖃᑎᒌᑦ ᐊᐅᓚᑦᑎᖃᑦᑕᕆᕗᑦ ᐅᒥᐊᕕᓂᕐᒥ ᑲᒪᔨᑕ ᐊᑐᒐᒃᓴᐃ ᐊᒻᒪᓗ ᓇᑦᑎᓕᒃ ᐅᑐᖅᑲᖃᖅᕕᒃ ᐊᖏᒡᓕᒋᐊᖅᑕᐅᓂᖓ ᐱᓕᕆᐊᖅ ᐃᓚᖃᖅᑐᓂ ᓄᑖᒥᒃ ᑕᑯᔭᒐᖃᕐᕕᖕᒥᒃ ᒪᑐᐃᖅᑕᐅᓂᐊᖅᑐᖅ 2025−ᒥ. ᐊᕐᕌᒍᑦ ᖁᓕᑦ ᐅᖓᑖᓄᑦ ᑕᐃᑲᓂ ᕿᓂᓚᐅᖅᑎᓪᓗᒋᑦ ᐅᒦᔭᕈᑕᐅᔪᕖᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ, 2025-ᒥ ᒥᕐᖑᐃᓯᕐᕕᓕᕆᔨᒃᑯᑦ ᑲᓇᑕᒥ ᓅᑉᐸᓪᓕᐊᓂᐊᖅᐳᑦ ᐃᑦᑕᕐᓂᓴᓕᕆᓂᕐᒧᑦ ᖃᐅᔨᓴᖅᑕᐅᔪᓂᒃ ᖃᐅᔨᓴᖅᑕᐅᒐᔪᓪᓗᑎᒃ, ᓈᒻᒪᒃᑐᒥᒃ ᓇᐅᑦᑎᖅᓱᐃᓂᕐᒥᒃ ᐱᓕᕆᐊᖃᕐᓗᑎᒃ ᑲᑐᔾᔨᓪᓗᑎᒃ ᐃᓄᖕᓂᒃ, ᐃᑲᔪᖅᓯᓐᓈᑦ ᐱᕙᓪᓕᐊᑎᑕᐅᓂᖓᓂᒃ ᓄᑖᖅ ᖃᐅᔨᓴᕐᓂᕐᒧᑦ ᐸᕐᓇᒍᑕᐅᔪᖅ. ᑕᒪᓐᓇ ᓇᓗᓇᐃᖅᓯᓂᐊᖅᑐᖅ ᓴᐳᔾᔭᐅᓯᒪᓂᖏᓐᓂᒃ ᐊᒻᒪᓗ ᐃᖅᑲᐅᒪᔭᐅᓂᖏᓐᓂᒃ ᓱᓕᑦᑎᐊᕐᓂᖏᓐᓂᒃ ᐅᒦᔭᕈᑕᐅᔪᕕᓃᒃ ᑯᐄᓐ ᐅᒥᐅᖁᑖ ᐃᕆᐸᔅ ᐊᒻᒪᓗ ᑯᐄᓐ ᐅᒥᐅᖁᑖ ᑎᐅᕐᕈᕐ ᐃᑦᑕᕐᓂᓴᖃᕐᕕᒃ ᑲᓇᑕᒥ.
ᑕᕝᕙᓂ ᒪᒃᐱᖅᑐᒐᕐᒥ
ᑯᐃᓐ ᐅᒥᐊᖁᑖ ᐃᕆᐸᔅ (HMS Erebus)
ᑯᐃᓐ ᐅᒥᐊᖁᑖ ᑎᐅᕈᕐ (HMS Terror)
ᐃᓂᒥ ᐊᐅᓚᑦᓯᓂᖅ
ᑭᖑᓪᓕᕐᒥ ᐱᓕᕆᐊᔅᓴᑦ
ᒪᒃᐱᒐᖏᑦ ᐊᑦᔩᑦ
- Date modified :