ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᑲᓇᑕᒥ ᒥᕐᖑᐃᓯᕐᕕᒃ ᐊᐅᓚᑦᓯᔨᐅᔪᑦ ᐸᕐᓇᓯᒪᔭᖏᑦ, 2023

---

ᐱᒋᐊᕈᑎᖏᑦ

ᑲᓇᑕᓕᒫᒥ ᐃᒪᐅᑉ ᓯᓈᓂᑦ ᓯᓇᓄᑦ ᑎᑭᓪᓗᒍ, ᐊᑑᑎᔭᐅᓕᑌᓐᓇᑐᓄᑦ ᐃᓂᒃᓴᐅᔪᑦ, ᒥᕐᖑᐃᓯᕐᕕᐅᔪᑦ ᐊᒻᒪᓗ ᑲᓇᑕᓕᒫᒥ ᐃᒪᕐᐱᓕᕆᓂᕐᒧᑦ ᐱᓇᓱᐊᕐᕖᑦ ᖃᐅᔨᒋᐊᒐᑦᓴᐅᕗᑦ ᑲᓇᑕᒥᐅᓄᑦ ᐅᐱᒍᓲᑦᔨᓐᓇᑐᐃᑦ. ᑕᒪᒃᑯᐊ ᑲᓇᑕᒥ ᐊᑑᑎᔭᐅᔪᑦ ᐊᒻᒪᓗ ᐱᐅᓯᑐᖃᕐᓄᑦ ᓇᔪᕐᑕᐅᑦᓱᑎᒃ ᐅᓂᒃᑲᐅᓯᑕᖃᕐᓱᑎᓪᓗ ᖃᓄᐃᑦᑑᓂᑦᑎᓐᓂᒃ, ᐃᓚᖃᕐᑎᓪᓗᒋᑦ ᐱᐅᓯᐅᓯᒪᔪᓂᒃ ᐊᒻᒪᓗ ᑐᓂᔭᐅᓯᒪᔪᓂᒃ ᓄᓇᖃᕐᖄᓯᒪᔪᓄᑦ.

ᑕᒪᒃᑯᐊ ᖁᕕᐅᓇᕐᑑᑦᓱᑎᒃ ᐅᐸᒐᑦᓴᐅᒻᒪᑕ ᓯᕗᓪᓕᐅᑦᔭᐅᒋᐊᖃᕐᓱᑎᓪᓗ ᑲᓇᑕᐅᑉ ᑲᕙᒪᒃᑯᖏᓐᓄᑦ. ᐱᓇᓱᐊᒻᒪᕆᒃᐳᒍᑦ ᓴᐳᒻᒥᑦᓱᑕ ᑕᒪᒃᑯᓂᖓ ᐊᑑᑎᔭᐅᔪᓂᒃ ᐊᒻᒪᓗ ᐱᐅᓯᑐᖃᖃᕐᕕᐅᔪᓂᒃ, ᓴᐳᒻᒥᓂᕗᓪᓗ ᐃᓂᒋᔭᐅᔪᓂᒃ ᐊᖏᓕᒋᐊᕐᓯᒪᕙᕗᑦ, ᖃᐅᔨᓇᓱᐊᕆᐊᓪᓚᖃᑦᑕᓱᑕᓗ ᐱᑐᖃᕕᓃᑦ ᓱᒃᑯᑕᐅᖁᓇᒋᑦ.

ᐊᒻᒪᓗᒋᐊᓪᓚᒃ, ᓄᑖᓂᒃ ᐱᔨᑦᓴᖃᕐᑎᑦᓯᖃᑦᑕᕆᕗᒍᑦ ᐳᓛᕆᐅᕈᒪᔪᓄᑦ ᐊᒻᒪᓗ ᖃᐅᔨᓇᓱᐊᕐᕆᐊᓪᓛᓱᑕ ᐱᓇᓱᐊᒐᑦᓴᐅᔪᓂᒃ ᐊᒻᒪᓗ ᐱᓇᓱᐊᕐᑕᐅᖃᑦᑕᑐᓂᒃ ᑲᓇᑕᒥᐅᑦ ᖃᐅᔨᒋᐊᓪᓛᔪᓐᓇᖁᓪᓗᒋᑦ ᑕᒪᒃᑯᓇᓂ ᐅᐸᒐᑦᓴᐅᔪᓂ ᐃᓕᑦᓯᒋᐊᓪᓚᓗᑎᓪᓗ ᐊᑑᑎᔭᐅᕙᑦᑐᕕᓂᕐᓂᒃ, ᐱᐅᓯᑐᖃᒃᑯᑦ ᐊᒻᒪᓗ ᐊᕙᑎᒥᐅᑕᑎᒍᑦ.

ᐱᓇᓱᖃᑎᖃᕐᓱᑕ ᓄᓇᖃᕐᖄᓯᒪᔪᓂᒃ ᓄᓇᓕᓐᓂ ᐊᒻᒪᓗ ᐱᓇᓱᖃᑎᒋᓪᓚᕆᑦᓱᒋᑦ, ᑲᓇᑕᒥ ᒥᕐᖑᐃᓯᕐᕖᑦ ᐱᓇᓱᕝᕕᒋᔭᖏᑦ ᐊᒻᒪᓗ ᓴᐳᒻᒥᓂᖏᑦ ᐱᐅᓯᑐᖃᖃᕐᕕᐅᔪᓂᒃ ᒥᕐᖑᐃᓯᕐᕕᐅᔪᓂᓪᓗ; ᐃᓄᐃᑦ ᖃᐅᔨᔪᓐᓇᖁᓪᓗᒋᑦ ᐱᐅᓯᐅᕙᓚᐅᕐᑐᕕᓂᕐᓄᓪᓗ ᑲᓱᐃᑦᓯᐊᖁᓪᓗᒋᑦ ᐊᑑᑎᔭᐅᕙᒃᑐᓄᓪᓗ; ᐃᑲᔪᖁᓪᓗᒋᓪᓗ ᑮᓇᐅᔭᑎᒍᑦ ᒪᑭᒪᒐᓱᐊᕈᑎᑦᓴᓄᑦ ᐊᑑᑎᖃᕐᓂᖏᓐᓄᑦ ᑕᒪᒃᑯᐊ ᓄᓇᓕᓐᓄᑦ ᓄᓇᕕᒻᒦᑦᑐᓕᒫᓄᓪᓗ.

ᑕᒪᓐᓇ ᐊᐅᓚᑦᓯᓂᕐᒧᑦ ᐸᕐᓇᑕᐅᓯᒪᔪᖅ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂ-ᑑᕐᙰᑦ ᖃᖅᑲᖏᓐᓂ ᑲᓇᑕᒥ ᒥᕐᖑᐃᓯᕐᕕᐅᔪᓂ ᑕᒪᑦᓱᒥᖓ ᐃᓱᒪᒋᔭᐅᔪᓂᒃ ᓴᐳᒻᒥᖁᓪᓗᒋᑦ.

ᐊᐅᓚᑕᐅᓂᖓᑕ ᐸᕐᓇᑕᐅᓂᖓ ᐱᕙᓪᓕᐊᔭᐅᓯᒪᕗᖅ ᐱᓇᓱᑦᑎᓄᑦ ᐊᔪᐃᓐᓇᓪᓚᕆᒃᑐᓄᑦ ᑲᓇᑕᒥ ᒥᕐᖑᐃᓯᕐᕕᓕᕆᔨᓂ ᖃᐅᔨᒋᐊᕐᕕᖃᖃᑦᑕᓱᑎᒃ ᐃᓄᓐᓂᒃ ᓄᓇᖃᕐᖄᓯᒪᔪᓂᒃ ᐱᓇᓱᖃᑎᖃᕐᓱᑎᒃ, ᐊᓯᖏᓐᓂᓗ ᐱᓇᓱᖃᑎᖃᕐᓱᑎᒃ ᐱᖃᖃᑕᐅᔪᓂᒃ, ᓄᓇᓕᓐᓂᓗ, ᐳᓚᕋᑎᐅᖃᑦᑕᓯᒪᔪᓂᒃ ᐅᓪᓗᒥᒧᑦ. ᓇᑯᕐᖕᒦᕈᒪᕗᖓ ᐃᓘᓐᓇᖏᓐᓂᒃ ᐱᓇᓱᖃᑕᐅᖃᑦᑕᓚᐅᕐᑐᓂᒃ ᑕᒪᑦᓱᒧᖓ ᐸᕐᓀᓂᕐᒧᑦ ᐊᔪᐃᓐᓇᖃᑕᓚᐅᕐᑐᓂᒃ ᐊᒻᒪᓗ ᐱᓇᓱᐊᖃᑎᒌᑦᓯᐊᖃᑦᑕᓚᐅᕐᒪᑕ.

ᒥᓂᓯᑕᓗ ᒥᕐᖑᐃᓯᕐᕕᓕᕆᓂᕐᒧᑦ ᑲᓇᑕᒥ, ᓇᑯᕐᓴᒻᒪᕆᑉᐳᖓ ᐱᓇᓱᐊᖃᑕᐅᖃᑦᑕᓚᐅᕐᓂᖓᓂᒃ ᐊᒻᒪᓗ ᐊᓕᐊᓱᑦᓱᖓ ᐊᖏᓚᐅᕐᒪᑦ ᑑᕐᙰᑦ ᖃᕐᖃᕐᓱᐊᖏᑦᑕ ᓯᓚᕐᕿᔮᕐᕕᖓᓂᒃ ᑑᕐᙰᑦ ᑲᓇᑕᒥ ᒥᕐᖑᐃᓯᕐᕕᐅᔪᑦ ᐊᐅᓚᑕᐅᓂᖏᓐᓄᑦ ᐸᕐᓀᑕᐅᑎᓪᓗᒋᑦ.

---

ᑲᑐᑦᔨᔪᓄᑦ ᐊᐅᓚᑦᓯᔨᐅᔪᓄᑦ ᑲᑎᒪᔨᓄᑦ

ᐊᐅᒡᒍᓯ 31, 2022
ᐅᐱᓐᓇᑐᖅ ᓯᑏᕙᓐ ᒋᐅᓪᐱᐅᓪᑦ
ᑲᕙᒪᑐᖃᒃᑯᓐᓂ ᒥᓂᓯᑕᐅᔪᖅ ᐊᕙᑎᓕᕆᓂᕐᒧᑦ ᐊᒻᒪᓗ ᓯᓚᐅᑉ ᐊᓯᑦᔨᐸᓪᓕᐊᓂᖓᓄᑦ
ᐱᖁᔭᓕᐅᕐᕕᑦᔪᐊᒥ
ᐋᑐᕚᒥ, ᐊᓐᑎᐅᕆᐅᒥ, K1A 0H6

---

ᒥᓂᓯᑕᒧᑦ ᒋᐅᓪᐱᐅᓪᑦᒧᑦ,

ᐃᑦᓯᕙᐅᑕᕆᔭᐅᑎᓪᓗᖓ ᑲᑎᒪᔩᑦ ᐊᐅᓚᑦᓯᓂᖏᓐᓄᑦ ᑑᕐᙰᑦ ᖃᕐᖃᕐᓱᐊᖏᑦᑕ ᓯᓚᕐᕿᔮᕐᕕᖓᓄᑦ (CMB), ᐊᓕᐊᑉᐳᖓ ᐃᓕᑦᓯᓐᓂᒃ ᑐᓴᕐᑎᑦᓯᒋᐊᒥᒃ ᑖᒃᑯᐊ CMB-ᑯᑦ ᐱᓇᓱᐊᖃᑦᑕᓚᐅᕐᒪᑕ ᓄᑖᒥᒃ ᐊᐅᓚᑦᓯᓂᕐᒥᒃ ᑑᕐᙰᑦ ᖃᕐᖃᕐᓱᐊᖏᑦᑕ ᐊᐅᓚᑕᐅᓂᖏᓐᓄᑦ ᒥᕐᖑᐃᓯᕐᕕᐅᔪᒥᒃ ᑲᓇᑕᒥ.

ᑖᒃᑯᐊ CMB-ᑯᑦ ᑲᑎᒪᔨᖏᑦ 7-ᐅᕗᑦ, ᐃᓕᑕᕆᔭᐅᒪᑦᓱᑎᒃ ᖄᖏᕐᓂᑯᓕᐅᕐᑎᒐᑎᒃ ᑎᒥᐅᓂᖏᓐᓂᒃ. ᒪᕐᕉᓐᓂᒃ ᑎᒃᑯᐊᑕᐅᔪᖃᓚᐅᕐᐳᖅ ᐱᓇᓱᖃᑎᒋᔭᑦᑎᓐᓂᑦ ᐅᑯᓇᖕᖓ: ᓄᓇᑦᓯᐊᕗᑦ ᑲᕙᒪᒃᑯᖏᓐᓂᑦ, ᔪᐃ ᐊᕐᓇᑐᖅ ᐊᒻᒪᓗ ᓯᐊᔭ ᑕᐅᓐᓕ; ᒪᑭᕝᕕᒃᑯᓐᓂᑦ, ᒍᐃᓕ ᐃᑦᑐᖅ ᐊᒻᒪᓗ ᐋᑕᒥ ᑎᓕᓯ ᐊᓚᑯ; ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓂᑦ, ᓵᒥ ᐅᓇᑐᐃᓐᓇᖅ ᐊᒻᒪᓗ ᓄᐊᖅ ᓄᑦᓵᑦᓵᖅ. ᐃᑦᓯᕙᐅᑕᐅᔪᖅ ᐃᒻᒥᒎᕐᑑᑦᓱᓂ ᐱᓇᓱᒐᐅᒻᒪᑦ ᑲᑐᑦᔭᐅᑦᓱᓂ ᑎᒃᑯᐊᑕᐅᓚᐅᕐᐳᖅ ᐃᓘᓐᓇᖏᓐᓄᑦ ᑎᒥᐅᔪᓄᑦ ᐱᖓᓱᓄᑦ. ᐃᓘᓐᓇᑎᒃ ᐃᓚᒋᔭᐅᔪᑦ ᑖᒃᑯᓄᖓ CMB-ᑯᓐᓄᑦ ᐃᓄᑐᐃᓐᓇᐅᕗᑦ.

ᐊᐅᓚᑦᓯᓂᐅᔫᑉ ᐊᐅᓚᑕᐅᓂᖓᓄᑦ ᐸᕐᓀᕈᑕᐅᔪᑦ ᓄᑖᖑᔪᑦ ᐋᖅᑭᑕᐅᓯᒪᕗᑦ ᑲᓇᑕᒥ ᒥᕐᖑᐃᓯᕐᕕᐅᔪᖅ ᐊᐅᓚᑕᐅᑦᓯᐊᖁᓪᓗᒍ ᐊᒻᒪᓗ ᐃᓄᐃᑦ ᓄᓇᑦᓯᐊᕗᑦ ᑲᕙᒪᒃᑯᖏᑦ ᓄᓇᕕᒻᒥᐅᓪᓗ ᐊᐅᓚᑕᐅᑦᓯᐊᖁᓪᓗᒋᑦ ᐊᐅᓚᓂᕆᔭᖏᑦ ᒥᕐᖑᐃᓯᕐᕕᖁᑎᖏᑦᑕ ᐊᕐᕌᒍᓄᑦ ᖁᓕᓄᑦ ᐊᑐᓚᖓᔪᓄᑦ ᐊᒻᒪᓗ ᑕᒪᓐᓇ ᑲᑐᑦᔭᐅᑦᓯᐊᕐᓱᓂ ᐱᓇᓱᐊᖃᑎᒌᒍᑕᐅᓯᒪᑦᓱᓂ ᐱᓇᓱᐊᖃᑎᒌᑦᓯᐊᖁᓪᓗᒋᑦ ᑖᒃᑯᐊ CMB-ᑯᑦ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᐅᔪᐃᑦ ᐱᒋᐊᕐᑎᑕᐅᓯᒪᔪᑦ ᐊᕐᕌᒍᒥ 2005-ᒥ. ᐊᐅᓚᑕᐅᓂᖓᑕ ᐸᕐᓇᑕᐅᓯᒪᓂᖓ ᐱᒋᐊᕈᑎᖃᕐᓯᒪᕗᖅ ᐃᓄᐃᑦ ᓄᓇᑦᓯᐊᕗᒻᒥᐅᑦ ᓄᓇᕕᒻᒥᐅᓪᓗ ᑲᓱᕐᑎᑕᐅᒋᐊᓪᓚᖁᑦᓱᒋᑦ ᑑᕐᙰᑦ ᖃᕐᖃᓱᐊᖏᓐᓄᑦ ᑕᒪᓐᓇ ᐊᓂᕐᕋᕆᒻᒪᑦᔪᒃ, ᐃᓄᑐᙯᓪᓗ ᖃᐅᔨᒪᔭᖏᑦ ᓂᖏᕐᑕᐅᑦᓯᐊᖁᑦᓱᒋᑦ ᑭᖑᕚᖏᓐᓄᑦ ᐃᓄᓐᓄᑦ, ᓄᓇᖓᓪᓗ ᓴᐳᒻᒥᔭᐅᖁᑦᓱᒍ ᑌᒪᖕᖓᑦ, ᐊᒻᒪᓗ ᐃᓄᐃᓪᓗ ᐅᓂᒃᑲᐅᓯᖏᑦ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂ ᑲᓇᑕᒥᐅᓕᒫᓄᑦ ᑭᖑᕚᖑᔪᓄᑦ ᖃᐅᔨᒪᔭᐅᑦᓯᐊᖁᓪᓗᒋᑦ.

ᐃᓚᒌᑦᓯᐊᕐᓂᒃᑯᑦ ᓲᔪᕆᖃᑦᑕᐅᑎᑦᓯᐊᕐᓂᒃᑯᓪᓗ ᐊᐅᓚᑕᐅᓂᖓᑕ ᑲᑐᑦᔭᐅᓂᖓ ᑲᑎᒪᔨᓄᑦ ᐊᒻᒪᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᓄᑦ ᐱᕙᓪᓕᐊᑎᑦᓯᖁᓪᓗᒍ ᐃᓱᒪᒋᔭᐅᔪᓂᒃ ᓯᕗᓂᕆᔭᐅᔪᒪᔪᓂᓪᓗ ᒥᕐᖑᐃᓯᕐᕕᒻᒥ, ᐊᒻᒪᓗ ᓇᓗᓀᕐᓗᒋᑦ ᓯᕗᓪᓕᐅᑦᔭᐅᔪᒪᔪᐃᑦ ᐊᐅᓚᑕᐅᓂᖓᑕᓗ ᒥᕐᖑᐃᓯᕐᕕᐅᑉ ᖁᓚᕐᓀᓕᓯᒪᑦᓯᐊᑐᒥᒃ ᓄᑖᒥᒃ ᐊᐅᓚᑕᐅᓂᖓᑕ ᐸᕐᓇᑕᐅᓂᖓᒍᑦ.

ᑲᑐᑦᔭᐅᑦᓯᐊᕐᓂᖓᒍᑦ ᐊᐅᓚᑕᐅᓂᖓ ᑲᑎᒪᔨᓄᑦ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᓯᕗᓂᕐᒧᑦ ᑕᑯᓐᓇᑕᐅᓂᖓ ᑲᔪᓯᑎᑕᐅᑦᓯᐊᓗᓂ ᐱᓇᓱᐊᕐᑕᐅᒍᒪᕗᖅ ᐱᓇᓱᖃᑎᒌᑦᓯᐊᓗᑎᒃ ᒥᕐᖑᐃᓯᕐᕕᓕᕆᔨᒃᑯᓪᓗ ᑲᓇᑕᒥ ᐸᕐᓇᓯᒪᕗᑦ ᑕᒪᑐᒥᖓ ᐊᑑᑎᑎᑦᓯᒍᒪᑦᓱᑎᒃ.

ᐃᓕᑕᕆᔦᑦ,

---

ᐃᒣᓕᒋᐊᖃᕐᑐᕆᔭᐅᒍᑎᖏᑦ

ᐃᒣᓕᒋᐊᖃᑐᕆᑦᓯᔪᖅ ᐅᓇ:

---

ᐳᕐᑐᓂᕐᓴᓂᑦ ᐱᔪᑦ ᓀᓕᒋᐊᕐᑕᐅᓯᒪᔪᐃᑦ

ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᐱᒋᐊᕐᑎᑕᐅᓯᒪᕗᖅ ᓴᐳᒻᒥᔭᐅᖁᓪᓗᒋᑦ ᐱᐅᓯᑐᖃᕕᓂᕐᓂᒃ ᖃᐅᔨᓴᕐᕕᐅᒍᓐᓇᑐᐃᑦ ᐊᒻᒪᓗ ᐱᕕᑦᓴᖃᖁᓪᓗᒋᑦ ᐃᓄᐃᑦ ᑲᓇᑕᒥᐅᓕᒫᓪᓗ ᑲᓱᕐᓯᒪᐅᑎᔪᓐᓇᖁᓪᓗᒋᑦ ᓛᐸᑐᐊᕐᒥᐅᑦ ᑕᕐᕋᖓᓃᑦᑐᓄᑦ ᖃᖅᑲᓄᑦ ᓱᕐᕋᓯᒪᖏᑦᑐᓄᑦ - ᐃᓄᐃᑦ ᓄᓇᖓᓐᓄᑦ. ᑑᕐᖓᑦ ᖃᕐᖃᖏᑦ ᒥᕐᖑᐃᓯᕐᕕᒃ ᓴᓂᕐᕙᑕᐅᓯᒪᕗᖅ ᐱᒋᐊᕐᑎᑕᐅᑦᓱᓂ ᐊᖏᕈᑕᐅᑦᓱᓂ ᓛᐸᑐᐊᕐᒥᐅᑦ ᐃᓄᖏᓐᓄᑦ ᐊᖅᑯᑎᖃᕐᓱᑎᒃ ᓛᐸᑐᐊᕐᒥᐅᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᓐᓂᒃ ᐊᒻᒪᓗ ᑐᓂᔭᐅᓯᒪᑦᓱᓂ ᒥᕐᖑᐃᓯᕐᕕᓕᕆᔨᓄᑦ ᐊᖏᕐᑕᐅᓯᒪᒋᓪᓗᓂ ᓄᓇᕕᒻᒥᐅᑦ ᐃᓄᖏᓐᓄᑦ ᐊᖅᑯᑎᑲᕐᓱᑎᒃ ᓄᓇᕕᐅᑉ ᐃᓄᖏᑦᑕ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᓐᓂᒃ.

ᑲᓇᑕᒥ ᒥᕐᖑᐃᓯᕐᕕᓕᕆᔩᑦ ᐱᓇᓱᑦᑎᖏᑦ ᐊᕐᕌᒍᓄᑦ ᖁᓕᓄᑦ ᐱᓇᓱᓚᐅᕐᑐᓯᒪᕗᑦ ᐱᓇᓱᐊᖃᑎᖃᕐᓱᑎᒃ ᐊᐅᓚᑦᓯᔨᐅᔪᑦ ᑲᑎᒪᔨᖏᓐᓂᒃ ᓇᓗᓀᕐᓯᒋᐊᖃᓕᑐᐊᕋᒥᒃ ᐅᓂᒃᑲᐅᓯᐅᔪᓂᒃ ᖃᐅᔨᑎᑦᓯᖃᑦᑕᕈᒪᒐᑦᑕ ᐳᓚᕋᑎᓂᒃ ᐊᒻᒪᓗ ᖃᓄᐃᓘᕆᐊᖃᕐᒪᖔᑕ ᐊᑑᑎᔭᐅᒍᓐᓇᕋᔭᕐᑐᐃᑦ ᐃᓄᓐᓄᑦ - ᐃᓄᑐᖃᕐᓄᑦ ᐊᒻᒪᓗ ᐅᕕᒃᑲᓄᑦ - ᒥᕐᖑᐃᓯᕐᕕᒻᒦᓐᓂᒥᓐᓂ ᐱᑐᑦᓯᒪᖃᑕᐅᑫᓐᓇᕈᓐᓇᓗᑎᒃ ᑕᒪᑦᓱᒧᖓ ᓄᓇᒧᑦ ᐅᕙᑦᑎᓐᓂᓪᓗ ᐱᓇᓱᖃᑎᖃᕈᓐᓇᓗᑎᒃ ᐱᓇᓱᖃᑎᒌᓐᓂᕗᑦ ᓲᖑᔫᑦᓯᐊᖁᓪᓗᒍ.

ᑕᒪᓐᓇ ᐊᐅᓚᑦᓯᓂᕐᒧᑦ ᐸᕐᓇᑕᐅᓯᒪᔪᖅ ᑲᑐᑦᔨᑦᓱᑕ ᐱᓇᓱᐊᖃᑦᑕᑕᑦᑎᓐᓂᒃ ᑖᒃᑯᓇᓂ ᐊᕐᕌᒍᓂ ᖁᓕᓂ ᒥᕐᖑᐃᓯᕐᕕᐅᑉ ᐊᐅᓚᑕᐅᓂᖓᓄᑦ ᐊᖏᓕᕙᓪᓕᐊᑎᑕᐅᑦᓯᐊᖁᓪᓗᒍ ᐱᓇᓱᐊᖃᑎᒌᒍᓐᓇᓂᕗᑦ ᐊᒻᒪᓗ ᐱᓇᓱᐊᕈᒪᑦᓯᐊᓂᕗᑦ ᐃᓂᓪᓚᑦᓯᒪᑦᓯᐊᕈᓐᓇᖁᓪᓗᒍ ᑐᖕᖓᕕᖃᕐᓗᓂ ᐊᖏᖃᑎᒌᑦᓯᒪᓂᑦᑎᓐᓂᒃ. ᑕᒪᓐᓇ ᐸᕐᓇᓯᒪᓂᖅ ᓯᕗᓂᕐᒧᑦ ᑕᑯᓐᓇᓂᐅᑦᓱᓂ ᐊᒻᒪᓗ ᐊᐅᓚᑕᐅᓂᖓᓄᑦ ᒥᕐᖑᐃᓯᕐᕕᐅᑉ, ᐱᒋᐊᕐᑎᑕᐅᓚᐅᕐᓯᒪᔪᖅ ᐊᕐᕌᒍᒥ 2010-ᒥ ᐊᐅᓚᑕᐅᓂᖓᑕ ᐸᕐᓇᑕᐅᓂᖓ.

ᐱᖓᓱᓂᒃ ᓯᕗᓂᕆᔭᐅᔪᒪᔪᓂᒃ ᐱᓪᓚᕆᑦᑕᖃᕐᐳᖅ ᐊᐅᓚᑦᓯᓂᐅᓚᖓᔪᓄᓪᓗ ᓄᓇᒋᔭᖓᓄᑦ ᑐᕌᒐᐅᓂᐊᕐᑐᓂᒃ ᐊᕐᕌᒍᐃᑦ ᖁᓕᑦ ᐃᓗᐊᓂ ᐊᑐᑎᔪᒪᒐᔭᕐᑕᑦᑎᓐᓂᒃ ᒪᑯᐊ ᑕᒐ:

---

---

---

ᐊᐅᓚᑦᓯᐅᔪᑦ ᓄᓇᑦ ᑲᒪᒋᔭᖏᑦ

ᓯᑕᒪᐅᔪᕐᑑᕗᑦ ᐊᐅᓚᑦᓯᔨᐅᔪᑦ ᓄᓀᑦ ᑲᒪᒋᔭᖏᑦ ᓇᓗᓀᕐᑕᐅᓯᒪᔪᑦ ᑕᒡᒐᓂ ᒥᕐᖑᐃᓯᕐᕕᒻᒥ, ᑐᖕᖓᕕᖃᕐᓱᑎᒃ ᐊᑦᑕᓇᕐᑑᔪᓂᒃ ᓄᓇᓂᒃ ᐊᒻᒪᓗ ᐱᐅᓯᑐᖃᐅᔪᓄᑦ ᖃᐅᔨᒋᐊᕐᕕᑦᓴᐅᔪᐃᑦ ᐊᒻᒪᓗ ᐱᓪᓚᕆᐅᔪᑦ ᐃᓄᓐᓄᑦ ᐅᓂᒃᑲᐅᓯᕙᑦᑐᐃᑦ ᑲᓇᑕᒥᐅᓄᑦ ᐳᓚᕋᑎᐅᔪᓄᑦ. ᑕᓪᓕᒪᐅᕗᑦ ᓄᓀᑦ ᓯᕿᓂᖓᓃᓐᓂᓴᐅᔪᐃᑦ ᒥᕐᖑᐃᓯᕐᕕᒻᒥ ᑐᕌᖓᓗᐊᕐᑐᐃᑦ ᐳᓚᕋᑎᐅᔪᓄᑦ ᐊᒻᒪᓗ ᑌᒣᓐᓂᖓᓄᑦ ᑲᒪᔨᖃᕆᐊᖃᕐᑐᐃᑦ ᓴᐳᒻᒥᔭᐅᒍᑎᑦᓴᖏᓐᓄᑦ ᓄᓇᐅᔪᐃᑦ ᐱᐅᓯᑐᖃᐅᔪᓄᓪᓗ ᖃᐅᔨᓇᓱᐊᕐᕕᐅᔪᓐᓇᕋᔭᕐᑐᐃᑦ. ᐱᖓᓲᕗᑦ ᓄᓀᑦ ᑕᕐᕋᒦᓐᓂᓴᐅᔪᐃᑦ ᒥᕐᖑᐃᓯᕐᕕᒻᒥ ᐊᑦᑕᓇᕐᑑᒍᓐᓇᑐᐃᑦ ᓯᖁᑦᑎᑕᐅᖁᔭᐅᖏᑦᑐᐃᑦ ᐳᓚᕋᑎᓄᑦ ᐱᔭᕐᓃᑦᑑᒐᔭᕐᑐᐃᑦ ᐅᐸᑦᑕᐅᒐᓱᒋᐊᖏᑦ ᑭᓯᐊᓂ ᐃᒻᒪᖄ ᓯᕗᓂᕐᒥ ᐳᓚᕋᑎᓄᑦ ᐅᐸᑦᑕᐅᒍᓐᓇᓯᑐᐃᓐᓇᕆᐊᖃᓛᕐᓂᐊᑐᐃᑦ.

ᓄᓀᑦ ᑕᓪᓕᒪᑦ ᓯᕿᓂᖓᓃᓐᓂᓴᐅᔪᐃᑦ ᒥᕐᖑᐃᓯᕐᕕᒻᒥ ᐊᑦᔨᐸᓱᖏᓐᓂᒃ ᐊᐅᓚᑕᐅᒋᐊᖃᕐᒥᔪᐃᑦ ᑲᒪᔨᐅᔪᓄᑦ ᐊᒻᒪᓗ ᐃᓱᐃᓗᑕᖃᑐᐃᓐᓇᕆᐊᖃᕋᔭᕐᒥᔪᐃᑦ ᐳᓚᕋᑎᓄᑦ ᐅᐸᑦᑕᐅᒋᐊᖏᑦ, ᐋᖅᑭᒋᐊᕐᑕᐅᑐᐃᓐᓇᕆᐊᓖᑦ ᐊᑑᑎᔭᐅᒋᐊᖃᕐᐸᑕ, ᐊᒻᒪᓗ ᐊᑦᑕᓇᕐᑑᑐᐃᓐᓇᕆᐊᖃᕐᓂᒧᑦ ᐱᑦᔪᑎᓖᑦ ᓄᓀᑦ ᓱᕐᕋᑕᐅᓯᒪᖏᑦᑐᐃᑦ ᐊᒻᒪᓗ ᐱᐅᓯᑐᖃᕐᓅᓕᖓᔪᓂᒃ ᖃᐅᔨᓇᓱᐊᕐᕕᐅᔪᓐᓇᕋᔭᕐᑐᐃᑦ.

---

ᑐᑭᓯᑎᑦᓯᒍᑏᑦ

ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᓯᓚᕐᔪᐊᓕᒫᒥ ᓯᕗᓪᓕᐹᑦᓯᐊᖑᑦᓱᑎᒃ ᐃᓂᓪᓚᖓᑦᓯᐊᓱᑎᒃ ᓄᓇᒥ ᐃᓱᒪᓇᕐᑐᓂᓪᓗ ᓴᐳᒻᒥᒐᓱᐊᕐᓂᒥᒃ ᐱᓇᓱᐊᖃᑦᑕᕐᐳᑦ. ᑖᒃᑯᐊ ᑎᓕᔭᐅᓯᒪᒍᑎᖃᕐᑐᑦ ᓴᐳᒻᒥᓂᕐᒥᒃ ᕿᒥᕐᕈᔭᐅᑎᑦᓯᖃᑦᑕᓂᕐᒥᓗ ᐅᓪᓗᒥ ᓯᕗᓂᕐᒥᓗ ᐃᓅᓛᕐᑐᓄᑦ. ᓯᕗᓂᕐᒧᑦ ᑐᕌᕐᓱᓂ, ᐊᑐᓂᑦ ᒥᕐᖑᐃᓯᕐᕕᖁᑎᖏᑦ ᐊᐅᓚᑕᐅᒍᑎᖃᕐᓱᑎᒃ, ᑕᕆᐅᕐᒦᑐᓪᓗ, ᐃᓱᒪᓇᕐᑐᖁᑏᓪᓗ ᐃᓃᑦ ᐊᐅᓚᑕᐅᔪᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓄᑦ ᐱᓇᓱᐊᖃᑎᐅᔪᑦ ᓯᕗᓂᕐᒧᑦ ᑕᐅᑐᑦᑕᖓᓄᑦ ᓴᐳᒻᒥᔭᐅᒍᑎᖃᕐᓱᑎᒃ:

ᑲᓇᑕᐅᑉ ᓄᓇᖁᑎᖏᑦ ᐃᕐᖃᕐᓇᕐᑐᑕᓖᓪᓗ ᐃᓃᑦ ᕿᒻᒪᖁᑎᑦᓴᐅᓂᐊᕐᑐᑦ, ᐆᒻᒪᑎᓂᒃ ᐃᓱᒪᓂᓪᓗ ᐱᑐᖃᑎᒌᑎᑦᓯᓗᑎᒃ ᓲᖑᓂᕐᓴᒧᑦ, ᐃᑎᓂᕐᓴᒧᑦ ᑐᑭᓯᒪᓂᕐᒥᒃ ᑲᓇᑕᐅᑉ ᓱᓇᖕᖑᕈᑎᓪᓚᕆᖏᓐᓂᒃ.

ᑲᓇᑕᒥ ᒥᕐᖑᐃᓯᕐᕕᓕᕆᓂᐅᑉ ᐱᖁᔭᖏᑦ ᑲᓇᑕᒥᓪᓗ ᒥᕐᖑᐃᓯᕐᕕᓕᕆᓂᕐᒥᒃ ᐱᓇᓱᐊᕐᑐᑦ ᐱᖁᔭᖏᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᐊᑐᕆᐊᖃᓲᖏᑦ ᐊᒥᕐᖑᐃᓯᕐᕕᓂᒃ ᐊᐅᓚᑦᓯᒍᑎᐅᓂᐊᕐᑐᓂᒃ ᐸᕐᓇᓯᒪᒍᑎᓕᐅᓕᑐᐊᕋᒥᒃ ᐊᑐᓂᑦ ᒥᕐᖑᐃᓯᕐᕕᐅᔪᓄᑦ. ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ– ᑑᕐᙰᑦ ᖃᕐᖃᖏᑦᑕ ᒥᕐᖑᐃᓯᕐᕕᖓᑕ ᐊᐅᓚᑕᐅᒍᑎᑦᓴᖏᑦ, ᐊᖏᕐᑕᐅᓯᒪᓕᑐᐊᕐᐸᑕ ᒥᓂᔅᑕᒧᑦ ᐅᖃᕐᕕᒪᕆᒻᒥᓗ ᕿᒥᕐᕈᔭᐅᓯᒪᓗᑎᒃ, ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᑲᓇᑕᒥᐅᓄᑦ ᑭᐅᒍᓐᓇᓯᐊᖁᓪᓗᒋᑦ, ᐊᐅᓚᑦᓯᔨᐅᓂᐊᕐᑐᑦ ᖃᓄᐃᓘᕐᓂᐊᒪᖔᑕ ᐸᕐᓇᓯᒪᔭᒥᓂᒃ ᐃᑲᔪᕈᑎᒋᓗᒍ ᐱᓇᓱᐊᖃᑎᒌᑦᑐᑦ ᑎᓕᔭᐅᓯᒪᒍᑎᖏᓐᓂᒃ.

ᑖᓐᓇ ᒥᕐᖑᐃᓯᕐᕕᒃ ᐊᑕᐅᑦᓯᑯᑦ ᐊᐅᓚᑕᐅᖃᑎᐅᓲᖑᕗᖅ ᐃᓄᓐᓄᑦ ᓄᓇᕕᒻᒥᐅᓄᑦ (ᑯᐯᒃ) ᐊᒻᒪᓗ ᐃᓄᓐᓄᑦ ᓄᓇᑦᓯᐊᕘᒻᒥᐅᓄᑦ (ᓛᐸᑐᐊ) ᐊᑐᐃᓐᓇᕈᕐᑏᖃᑎᒌᑦᓯᒪᑦᓱᑎᒃ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎᓂᒃ ᓯᕗᓂᕐᒥᒃ ᑐᕌᒍᑎᓕᐅᖁᓪᓗᒋᑦ. ᐱᓇᓱᐊᖃᑎᒋᔭᐅᔪᑦ, ᓇᒻᒥᓂᖃᖃᑎᒋᔭᐅᔪᑦ ᐊᒻᒪᓗ ᑲᓇᑕᒥ ᐃᓄᓕᒫᑦ ᐃᓚᐅᑎᑕᐅᖃᑦᑕᓯᒪᒻᒥᔪᑦ ᐊᑐᐃᓐᓇᕈᕐᑎᑕᐅᑎᓪᓗᒋᑦ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎᓂᒃ. ᐸᕐᓇᓯᒪᐅᑏᑦ ᑐᑭᖃᑦᓯᐊᑐᒥᒃ, ᐸᕐᓇᓯᒪᐅᑎᑎᒍᑦ ᑐᑭᒧᐊᕈᑎᓕᐅᕈᑎᐅᕗᖅ ᐊᐅᓚᑕᐅᑦᓯᐊᖁᓪᓗᒍ ᐊᒻᒪᓗ ᑲᔪᓯᑦᓯᐊᖁᓪᓗᒍ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕝᕕᖓ ᐅᖄᒍᑎᖃᖃᑦᑕᓱᑎᒃ ᓯᕗᓂᕐᒥᒃ ᑐᕌᒐᑦᓴᓂᒃ, ᐸᕐᓀᒍᑎᓪᓚᕆᓐᓂᒃ ᓇᓗᓀᕐᓯᓂᒃᑯᑦ ᐊᒻᒪᓗ ᑐᕌᒐᐅᔪᓂᒃ. ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐊᕐᕌᒍᑕᒫᑦ ᑐᓴᕐᑎᓯᖃᑦᑕᓛᕐᑐᑦ ᖃᓄᐃᓘᓕᕐᒪᖔᒻᒥᒃ ᑐᕌᒐᒥᓂᓪᓗ ᐱᒍᓐᓇᓯᐊᕐᒪᖔᒻᒥᒃ ᐊᕐᕌᒍᐃᓪᓗ ᖁᓕᑕᒫᑦ ᓯᕗᓂᖓᒍᓪᓘᓃᑦ ᐸᕐᓇᓯᒪᐅᑎᐅᔪᓂᒃ ᕿᒥᕐᕈᖃᑦᑕᓛᕐᓱᑎᒃ ᑌᒣᒋᐊᖃᑐᐊᕈᑎᒃ.

ᑖᒃᑯᐊ ᐸᕐᓇᓯᒪᒍᑏᑦ ᐃᓱᓕᒍᑎᐅᖕᖏᑐᑦ. ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐊᐅᓚᑦᓯᔨᐅᖃᑎᒌᑦᑐᓗ ᑲᑎᖕᖓᔨᖏᑦ ᐅᖄᖄᑎᒌᖏᓐᓇᖃᑦᑕᓂᐊᕐᑐᑦ ᐸᕐᓇᑕᐅᓯᒪᔪᑦ ᐊᐅᓚᑦᓯᒍᑎᑦᓭᑦ ᐊᑐᓕᕐᑎᑕᐅᓂᖏᓐᓄᑦ ᐊᑐᕐᓂᖃᑦᓯᐊᖁᓪᓗᒋᑦ ᐱᕙᓪᓕᒍᑎᐅᑦᓯᐊᓗᑎᓪᓗ. ᑖᒃᑯᐊ ᐸᕐᓇᓯᒪᒍᑏᑦ ᓯᕗᒧᐊᒍᑎᐅᓚᖓᔪᑦ ᐱᓇᓱᐊᖃᑎᒌᓐᓂᐅᔪᓄᑦ ᐊᐅᓚᑕᐅᓂᖓᓄᑦ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᐊᕐᕌᒍᓂ ᙯᔪᓂ.

---

ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᑕ ᐊᑑᑎᖃᕐᓂᖓ

ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᓴᕐᕿᑎᑕᐅᓚᐅᕐᓯᒪᕗᖅ ᓴᐳᒻᒥᒍᑎᐅᓂᐊᕐᓗᓂ ᓛᐸᑐᐊᑉ ᑕᕐᕋᖓᓃᑦᑐᓂᒃ ᖃᕐᖃᓂᒃ, 39-ᓄᑦ ᑕᒫᓂ ᓄᓇᖃᕐᑐᓂ ᐃᓚᒋᔭᐅᒻᒪᑕ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓄᑦ ᐅᓇᑕᒡᒑᑕᐅᓯᒪᑦᓱᑎᒃ ᐸᕐᓇᓯᒪᒍᑎᓕᐊᖑᔪᓂ, ᐅᓪᓗᒥ ᐃᓅᔪᓄᑦ ᓯᕗᓂᕐᒥᓗ ᐃᓅᓛᕐᑐᓄᑦ ᑕᑯᔭᐅᖃᑦᑕᖁᑦᓱᒋᑦ ᐊᓕᐊᒋᔭᐅᓗᑎᓪᓗ. ᑖᓐᓇ ᒥᕐᖑᐃᓯᕐᕕᖑᕐᑎᑕᐅᓚᐅᔪᒻᒥᔪᖅ ᐃᓄᐃᑦ ᑌᒪᖕᖓᓕᒫᖅ ᓴᐳᒻᒥᒍᒪᒻᒪᐅᒃ ᓯᕗᓪᓕᖏᑦᑕ ᓄᓇᒋᒻᒪᐅᒃ. ᒥᕐᖑᐃᓯᕐᕕᖑᕐᑎᑕᐅᓂᖓᓄᑦ ᐱᓇᓱᐊᕐᑕᐅᓚᕆᑦᓯᒪᔪᑦ ᓲᓲᒋᔭᐅᑦᓯᐊᓗᓂ ᐱᓇᓱᐊᖃᑎᒌᑦᓯᐊᓂᕐᒥᓗ ᐱᑕᖃᖁᑦᓱᒋᑦ ᐃᓄᐃᑦ ᐱᓇᓱᐊᖃᑎᐅᔪᓪᓗ, ᓇᓗᓀᑦᓯᐊᓗᒍᓗ ᐃᓄᐃᑦ ᑕᒪᑐᒧᖓ ᓄᓇᒧᑦ ᐱᑐᑦᓯᒪᓂᖃᕐᓂᖓᓂᒃ. ᐅᓪᓗᒥ ᒥᕐᖑᐃᓯᕐᕕᒃ, ᖃᐅᔨᒪᔭᐅᕙᓚᐅᖕᖏᑑᒐᓗᐊᖅ ᐃᓄᓐᓄᓗ ᑲᑉᐱᐊᒋᔭᐅᑦᓱᓂ, ᐱᓇᓱᐊᕈᑎᓪᓚᕆᐅᑎᓪᓗᒍ ᑕᐅᑐᑦᑕᐅᓲᖑᓕᕐᑐᖅ ᓴᐳᒻᒥᒍᑎᑦᓴᐅᑎᓪᓗᒍ ᐃᓄᐃᑦ ᑭᖒᕚᒥᓄᑦ ᕿᒻᒪᖁᓯᕈᑎᒋᒍᓐᓇᓂᐊᕐᑕᖓᓂ ᐃᓗᕐᖁᓯᕐᒥᓂᓪᓗ ᑕᑯᑦᓴᐅᑎᑦᓯᒍᑎᒋᓗᒍ. ᓇᓗᓀᕐᓯᒍᑎᐅᑦᓱᓂᓪᓗ ᐃᓄᐃᑦ ᖃᐅᔨᒪᐅᓯᖓᓂᒃ ᐃᕐᖃᓇᕐᑐᖁᑎᓂᓪᓗ ᐃᓂᓂᒃ ᐃᓄᐃᓪᓗ ᓄᓇᒥᓄᑦ ᐃᓗᕐᖁᓯᕐᒥᒍᑦ ᐱᑐᑦᓯᒪᓂᖓᓂᒃ ᑕᒡᒐᓂ ᒥᕐᖑᐃᓯᕐᕕᒥ ᐊᑑᑎᓂᐊᕐᑎᓗᒍ ᓯᓚᕐᔪᐊᖃᕐᓂᓕᒫᖓᓂ. ᐃᓄᐃᓪᓗ ᒥᕐᖑᐃᓯᕐᕕᖃᕐᓂᒥᒃ ᑕᐅᑐᑦᓱᑎᒃ ᐃᓅᖃᑎᒌᑎᒍᑦ ᑮᓇᐅᔭᑎᒍᓪᓗ ᐱᕙᓪᓕᑕᐅᒍᑎᑦᓴᒥᓂᒃ ᓄᓇᒥᓂ, ᐊᒻᒪᓗ ᑕᑯᒍᒪᓂᖃᕐᓱᑎᒃ ᐃᓄᓐᓂᒃ ᐊᒥᓱᓂᒃ ᐱᑐᑉᐸᓕᐊᒋᐊᓪᓛᓂᖏᓐᓂᒃ ᒥᕐᖑᐃᓯᕐᕕᒧᑦ ᐊᒻᒪᓗ ᓄᓇᒥᓃᓐᓂᑯᑦ. ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᐃᓄᓐᓄᑦ ᐱᒍᑕᐅᒍᓐᓇᑐᖅ, ᐳᓛᕆᐊᕐᑐᓄᓪᓗ, ᓂᐅᕐᕈᑐᓕᕆᔨᓄᓪᓗ ᖃᐅᔨᓴᕐᑏᓗ ᑐᑭᓯᒪᓂᕐᑖᕆᐊᓪᓚᓗᑎᒃ ᑕᒪᑐᒥᖓ ᐃᓂᒥ ᑲᓇᑕᒦᑦᑐᒥᒃ. ᓛᐸᑐᐊᒥᐅᑦ ᐃᓄᐃᑦ, ᓄᓇᕕᒻᒥᐅᑦ ᐃᓄᐃᑦ ᑲᓇᑕᐅᓪᓗ ᒥᕐᖑᐃᓯᕐᕕᓕᕆᔨᖏᑦ ᐅᓂᒃᑲᐅᓯᑦᓴᖃᖃᑦᑕᑐᑦ ᐊᓕᐊᓇᕐᑐᓂᒃ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂ ᐃᓄᓐᓄᓗ ᓯᓚᕐᔪᐊᒥᐅᓄᑦ.

ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᐊᖏᓂᖃᕐᑐᖅ 9,700 km2-ᓂᒃ, ᓴᐳᒻᒥᓱᓂ ᑲᑦᔮᓇᕐᑐᔪᐊᕌᓗᒻᒥᓗ ᐅᑭᐅᕐᑕᑐᒥ ᓴᕐᕿᔮᕐᑎᓯᑦᓱᓂ ᐱᐅᔪᓪᓚᕆᒻᒥᒃ ᐃᓄᐃᑦ ᓄᓇᖓᓂᒃ. ᑑᕐᙰᑦ ᖃᕐᖃᖏᑦ ᐳᕐᑐᓂᕐᐸᐅᖃᑎᐅᔪᑦ ᐊᒥᐊᕆᑲᐅᑉ ᑕᕐᕋᖓᓂ ᓯᓚᕐᔪᐊᒥᓗ ᐱᐅᓂᕐᐹᓯᐊᓂᒃ ᑕᕆᐅᖁᑎᖃᕐᓱᓂ. ᐃᓗᐃᓕᖏᑦ ᑲᖏᕐᓱᖏᑦ ᐃᓐᓈᕈᖏᑦ ᑲᑦᔮᓇᓪᓚᕆᑦᑐᑦ ᐃᓐᓈᕈᖏᑦ ᑭᖏᓐᓂᓖᑦ 900-ᒦᑕᓂᒃ ᓛᐸᑐᐊᑉ ᑕᕆᐅᖓᓂᑦ. ᖃᕐᙯᑦ ᖄᖏᑦ ᐳᕐᑐᓂᖏᑦ ᐊᐅᔪᐃᑦᑐᑕᖃᕐᐳᑦ, ᑭᖑᓪᓕᐹᒦᒃ ᓯᓚᕐᔪᐊᖅ ᐊᐅᓚᐅᕐᓯᒪᑎᓪᓗᒍ ᐱᓯᒪᔪᓂᒃ. ᓇᕐᓴᑎᒍᑦ ᑰᓕᒃ ᓄᓇᒋᔭᐅᔪᑎᒍᑦ ᐊᖅᑯᓵᕆᓯᒪᑦᓱᓂ ᓂᐅᕙᓐᓛᓐ ᐊᒻᒪ ᓚᐸᑐᐊᒥᐅᑦ ᑯᐯᒻᒥᐅᓪᓗ ᐃᓄᐃᑦ ᐊᕐᖁᓯᓂᕕᓂᖏᓐᓂᒃ ᐅᓪᓗᒥᒧᑦ ᓱᓕ ᐃᓄᐃᑦ ᐊᑐᕐᐸᑕᖏᑦ.

ᒥᕐᖑᐃᓯᕐᕕᐅᑉ ᓯᓚᖓ ᕿᐅᔭᓇᕐᑐᖅ ᖃᕐᖃᓄᑦ ᓱᕐᕋᑕᐅᓂᖃᕐᓱᓂ ᓚᐸᑐᐊᓗ ᑕᕆᐅᖓᓄᑦ. ᒥᕐᖑᐃᓯᕐᕕᒃ ᓇᐹᕐᑐᖃᖕᖏᑐᒦᑦᑐᖅ. ᐱᕈᕐᑐᖃᕋᓗᐊᕐᓱᓂ, ᐃᓄᐃᑦ ᓯᕗᓪᓕᖏᓪᓗ ᑕᒪᑐᒥᖓ ᓄᓇᒥᒃ ᐊᑐᖃᑦᑕᓯᒪᔪᑦ ᐱᕈᕐᑐᖏᓐᓂᓗ ᒥᓕᐊᓂ ᐊᕐᕌᒍᓂ ᑖᒃᑯᐊ ᐱᕈᕐᑐᐃᑦ ᐱᕈᕐᐸᑐᑦ ᓇᕐᓴᓂ.

ᒥᕐᖑᐃᓯᕐᕕᒃ ᐊᒥᓱᓄᑦ ᓂᕐᔪᑎᓄᑦ ᓇᔪᒐᕆᔭᐅᔪᖅ. ᑑᕐᙰᑦ ᖃᕐᖃᖏᑦᑕ ᑐᒃᑐᖏᑦ ᐊᒥᓲᖕᖏᑐᑦ, ᐃᓚᖃᕐᒥᓱᑎᒃ ᑲᖏᕐᓱᐊᓗᒃᔪᐊᑉ ᑐᒃᑐᖁᑎᖏᓐᓂᒃ ᑖᒃᑯᐊ ᓯᓚᕐᔪᐊᒥ ᐊᑕᐅᓯᐊᕐᓱᑎᒃ ᐊᒥᓲᓂᕐᐸᐅᓯᒪᔪᑦ. ᓇᓄᐃᑦ ᓇᔪᒐᖓ ᐊᑦᓴᖃᕐᒥᓱᓂ ᓇᐹᕐᑐᖃᖕᖏᑐᒥᐅᓂᒃ ᐊᑦᔨᐅᖏᑦᑑᒥᔪᓂᒃ. ᐊᒪᕈᓕᒃ ᑎᕆᒐᓐᓂᐊᖃᕐᓱᓂᓗ. ᖃᓄᐃᑦᑐᑐᐃᓐᓇᓂᒃ ᖁᐸᓄᐊᕐᑕᖃᕐᓱᓂ ᓯᓈᒍᓪᓗ ᑕᕆᐅᒃᑯᑦ ᑎᒻᒥᐊᓄᑦ ᐊᕐᖁᑎᒋᔭᐅᓲᖑᑦᓱᓂ. ᐃᓄᐃᑦ ᑐᑭᓯᒪᔪᑐᙯᑦ ᑖᒃᑯᐊ ᓂᕐᔪᑏᑦ ᐊᕐᖁᓯᓂᕆᓲᖏᓐᓂᒃ ᓂᒪᓐᓂᖏᓐᓂᓗ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂ ᐆᒪᔪᕐᓂᐊᓲᑦ ᐃᖃᓗᓐᓂᐊᓱᑎᓪᓗ ᒥᕐᖑᐃᓯᕐᕕᒥ ᐊᕐᕌᒍᓕᒫᒥ.

ᒥᕐᖑᐃᓯᕐᕕᒃ ᐃᓂᒋᔭᐅᔪᖅ ᑕᓪᓕᒪᓄᑦ ᐊᓯᐅᑐᐃᓐᓇᕆᐊᖃᓕᕐᓂᕋᕐᑕᐅᔪᓄᑦ. ᐅᑯᐊ ᓂᕐᔪᑏᑦ “ᐊᓯᐅᑐᐃᓐᓇᕆᐊᓕᐅᓂᕋᕐᑕᐅᔪᑦ”: ᒥᑏᑦ (ᐅᐊᓐᓂᕙᓯᒻᒥᐅᑦ) ᒥᑎᕐᓇᖅ (ᐅᐊᓐᓂᕙᓯᒻᒥᐅᑦ) ᐃᒣᖕᖓᑌᑦ ᓇᓄᐃᑦ ᑭᒡᒐᕖᓪᓗ. ᑭᒡᒐᕖᑦ ᐊᑦᑕᓇᕐᑐᒦᓪᓚᕆᓐᓂᕋᕐᑕᐅᔪᑦ. ᐊᓯᖏᓐᓂ ᐊᑦᑕᓇᕐᑐᒦᑐᐃᓐᓇᕆᐊᓕᓐᓂᒃ ᓄᖑᐃᓐᓇᑐᐃᓐᓇᕆᐊᓕᓐᓂᒃ ᒥᕐᖑᐃᓯᕐᕕᒦᑦᑐᖃᑐᐃᓐᓇᕆᐊᖃᕐᒥᔪᖅ.

---

ᐸᕐᓇᕈᓯᐅᔪᕕᓃᑦ

ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᓴᕐᕿᑎᑕᐅᓯᒪᔪᖅ ᐃᕐᖃᓇᕐᑐᖁᑎᐅᔪᓂᒃ ᓴᐳᒻᒥᒍᑎᐅᓂᐊᕐᑎᓗᒍ ᐃᓄᓕᒫᓄᑦ ᑲᓇᑕᒥᐅᓕᒫᓄᓪᓗ ᓄᓇᒥᒃ ᐱᑐᖃᑎᖃᕈᓐᓇᖁᑦᓱᒋᑦ ᓛᐸᑐᐊᑉ ᑕᕐᕋᖓᑕ ᖃᕐᖃᖏᓐᓄᑦ - ᐃᓄᐃᑦ ᓄᓇᖓᓄ. ᑑᕐᙰᑦ ᖃᕐᖃᖏᑦᑕ ᒥᕐᖑᐃᓯᕐᕕᖓ ᓴᕐᕿᑎᑕᐅᓯᒪᔪᖅ ᓛᐸᑐᐊᒥᐅᑦ ᐃᓄᐃᑦ ᐊᖏᕈᑎᖃᕐᑎᓗᒍ ᓄᓇᑖᕐᓂᒥᒍᑦ ᓛᐸᑐᐊᒥ ᐊᖏᖃᑎᒌᒍᑎᖓᒍᑦ ᒥᕐᖑᐃᓯᕐᕕᓚᕆᖕᖑᑎᑕᐅᑦᓱᓂᓗ ᓄᓇᕕᒻᒥᐅᑦ ᐃᓄᐃᑦ ᐊᖏᕈᑎᖃᕐᑎᓗᒋᑦ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖓᒍᑦ.

ᒥᕐᖑᐃᓯᕐᕕᒃ ᓴᓪᓕᒥᑦ ᐱᒋᐊᕐᑐᖅ ᓯᕿᓂᕙᓯᒻᒦᑐᒥᒃ, ᐃᓚᐅᑎᓪᓗᒋᑦ ᕿᑭᕐᑕᓕᒫᑦ ᐃᒃᑲᕈᐃᑦ, ᓚᐸᑐᐊᑉ ᑕᕐᕋᕙᓯᓐᓂᐹᖓᓄᑦ ᑎᑭᑦᓱᓂ; ᑯᐯᒻᒥᓗ ᖃᓕᐊᕇᑦᑐᑦ ᓄᓀᑦ ᓂᐅᕙᓐᓛᓐᒥ ᓚᐸᑐᐊᑉ ᓯᓈᓄᑦ ᑎᑭᑦᓱᓂ; ᑯᐯᑉ ᐊᑐᐊᕐᓂᖓᓃᑦᑐᖅ, ᐃᒪᐅᑉ ᐊᑉᐸᓯᓐᓂᓴᖓ ᑎᑭᑦᓱᒍ ᓚᐹᑐᐊᑉ ᑕᕆᐅᖓᓃᑦᑐᖅ ᓯᓈᓂ, Iron Strand ᐅᖓᓯᓐᓂᓕᒃ 9 ᑭᓗᒦᑕᓂᒃ ᓂᐅᕙᓐᓛᓐ ᓛᐸᑐᐊᓪᓗ ᐃᒪᖓᓄᑦ, ᐃᓄᓐᓄᑦ ᓇᒻᒥᓂᕆᔭᐅᔪᖅ ᐃᓚᐅᒐᓂᓗ ᒥᕐᖑᐃᓯᕐᕕᒧᑦ. ᖃᕐᙯᑦ ᐳᕐᑐᓂᕐᐸᐅᔪᑦ ᑯᐯᑉ ᓄᓇᖓᑕ ᓴᓂᐊᓃᑦᑐᑦ ᑲᓇᑕᐅᑉ ᓄᓇᖁᑎᖓᓂ ᖃᕙᖕᖓᓂᖓᓃᑦᑐᑦ ᖃᕐᖃᖁᑎᖏᓐᓂ. (ᓄᓇᖕᖑᐊᖅ 2).

ᐃᓄᑦᑕᖃᓲᕕᓂᐅᒋᐊᖓ ᑕᐅᓴᓐᑎᓂ ᐊᕐᕌᒍᓂ ᖃᐅᔨᒪᓇᕐᑐᖅ ᒥᕐᖑᐃᓯᕐᕕᒥ. ᐅᓪᓗᒥ ᐃᓄᐃᑦ ᒪᙯᓲᖑᖏᓐᓇᑐᑦ ᐃᖃᓗᓐᓂᐊᓱᑎᓪᓗ ᐊᕐᕌᒍᓕᒫᒥ. ᑖᓐᓇ ᓄᓇᑐᐃᓐᓇᐅᖏᑦᑐᖅ ᐃᓄᐃᑦ ᐊᓂᕐᕋᖓᑦ ᓄᓇᖓᑦ. ᐃᓄᐃᑦ “ᐊᓕᐊᓇᕐᑑᓂᕋᓲᖓ” ᑐᑭᖃᕐᑎᓗᒍ “ᐃᓂᑦᓯᐊᖑᒋᐊᖓᓂᒃ”.

ᐊᕐᕌᒍᐃᑦ ᖁᓕᑦ ᓯᕗᓪᓕᐹᑦ

ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ ᓄᓇᑦᓯᐊᕗᒻᒥᐅᓄᓪᓗ ᒪᙯᕝᕕᒦᖃᑎᐅᓲᑦ ᐊᐅᓚᑦᓯᔨᐅᖃᑎᒌᑦᑐᓗ ᑲᑎᖕᖓᔨᖏᓐᓄᑦ ᑐᑭᓯᓴᕐᑎᑕᐅᑦᓱᑎᒃ ᓄᓇᒥᒃ, ᓂᕐᔪᑎᓂᒃ, ᐃᕐᖃᓇᕐᑐᓂᒃ ᐊᑑᑎᖃᑦᑕᓯᒪᔪᓂᒃ, ᐃᓗᕐᖁᓯᕐᒥᒃ ᐃᓄᐃᓪᓗ ᐱᑐᑦᓯᒪᓂᖓᓂᒃ ᓄᓇᒥᓄᑦ. ᐅᓂᒃᑳᖏᓐᓂᒃ ᑐᓵᑦᓱᑎᒃ ᐃᓄᐃᓪᓗ ᐃᓚᐅᑎᓪᓗᒋᑦ ᐅᓂᒃᑳᑐᐊᓂᒃ ᐳᓛᕆᐊᕐᑐᓄᑦ ᒥᕐᖑᐃᓯᕐᕕᒧᑦ ᐊᑑᑎᔭᐅᒍᓐᓇᑎᑦᓯᓱᑎᒃ.

ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᐃᓇᓱᑦᑎᖏᑦ ᐊᕐᕌᒍᓂ ᖁᓕᓂ ᓯᕗᓪᓕᐹᓂ ᐱᓇᓱᐊᖃᑎᖃᕐᓯᒪᔪᑦ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᓐᓂᒃ ᐅᓂᒃᑳᑐᐊᓂᒃ ᐳᓛᕆᐊᕐᑐᓄᑦ ᑐᓴᕐᑕᐅᑎᒍᒪᒐᔭᕐᑕᒥᓂᒃ ᐱᓇᓱᐊᕐᓱᑎᒃ ᖃᓄᐃᓕᖓᓗᑎᓪᓗ ᐃᓄᐃᑦ ᐃᓚᐅᓂᕆᖃᑦᑕᓂᐊᕐᑕᖓᓂᒃ - ᐃᓄᑐᙯᑦ ᐅᕕᒐᕐᑐᐃᓗ - ᒥᕐᖑᐃᓯᕐᕕᒦᖃᑦᑕᓱᑎᒃ ᓄᓇᒧᑦ ᐱᑐᑦᓯᒪᓂᖓ ᐃᓅᖃᑎᒌᓐᓂᖓᓗ ᓲᖑᓯᓕᐅᒥᖃᑦᑕᑐᖅ.

ᑖᒃᑯᐊ ᐊᐅᓚᑦᓯᒍᑎᑦᓭᑦ ᐸᕐᓇᑕᐅᔪᑦ ᐊᑑᑎᔭᐅᖃᑦᑕᓚᐅᔪᓂᒃ ᓄᐃᑕᑎᑦᓯᔪᑦ ᐊᕐᕌᒍᓂ ᖁᓕᓂ ᓯᕗᓪᓕᐹᓂ ᒥᕐᖑᓯᐃᕐᕕᐅᑉ ᐊᐅᓚᑕᐅᓂᖓᓂ ᐱᓇᓱᐊᖃᑎᒌᖏᓐᓇᓱᑎᓪᓗ ᐱᓂᐊᕐᓂᕋᐅᑎᒥᓂᓪᓗ ᓄᐃᑎᑦᓯᓯᒪᑦᓱᑎᒃ ᐊᖏᖃᑎᒌᒍᑎᐅᑉ ᑐᖕᖓᓂᓕᕐᑕᐅᖑᑎᖏᓐᓂ.

ᐊᓪᓚᕈᑏᑦ ᐱᓇᓱᐊᕈᓯᐅᔪᑦ

ᐃᓚᒋᔭᐅᑎᓪᓗᒍ ᑲᓇᑕᒥ ᒥᕐᖑᐃᓯᕐᕕᓕᕆᔩᑦ ᐱᖁᔭᖏᓐᓄᑦ ᒪᓕᒐᕐᓄᓗ, ᐊᐅᓚᑦᓯᒍᑎᐅᔪᑦ ᐃᖏᕐᕋᑎᑦᓯᒍᑎᐅᔪᓪᓗ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂᒃ ᑐᑭᒧᐊᑦᑎᑕᐅᓂᖃᕐᑐᑦ ᓄᓇᕕᒻᒥ ᐃᓄᐃᑦ ᓱᕐᕋᑕᐅᓂᕐᒧᑦ ᐱᕙᓪᓕᖁᑎᓄᓪᓗ ᐊᖏᖃᑎᒌᒍᑎᖓᓄᑦ ᐊᖏᖃᑎᖃᕐᓱᑎᒃ ᑲᓇᑕᒥ ᒥᕐᖑᐃᓯᕐᕕᓕᕆᔨᖏᓂᒃ ᒪᑭᕝᕕᑯᓐᓄᓗ (ᑭᒡᒐᑐᕐᓱᑎᒃ ᐃᓄᓐᓂᒃ ᓄᓇᕕᒻᒥᐅᓂᒃ) ᐊᒻᒪᓗ ᓛᐸᑐᐊᒥ ᐃᓄᐃᑦ ᓱᕐᕋᑕᐅᓂᕐᒧᑦ ᐱᕙᓪᓕᖁᑎᓄᓪᓗ ᐊᖏᖃᑎᒌᒍᑎᖓᓄᑦ ᐊᖏᖃᑎᖃᕐᓱᑎᒃ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓂᒃ ᓛᐸᑐᐊᒥᓗ ᐃᓄᐃᑦ ᑲᑐᑦᔨᖃᑎᒌᓐᓂᖓᓂᒃ (ᓄᓇᑦᓯᐊᕗᑦ ᑲᕙᒪᖓᓂᒃ ᑌᔭᐅᓕᕐᑐᑦ). ᑖᒃᑯᐊ ᐊᖏᖃᑎᒌᒍᑏᑦ ᑲᓇᑕᒥ ᒥᕐᖑᐃᓯᕐᕕᖃᕐᓂᒧᑦ ᒥᕐᖑᐃᓯᕐᕕᒥᓪᓗ ᓴᕐᕿᑎᑦᓯᓂᕐᒧᑦ ᑑᕐᙰᑦ ᖃᕐᖃᖏᓐᓂ ᑲᓇᑕᐅᑉ ᑲᕙᒪᖓᓂ ᓂᐅᕙᓐᓛᓐᒥᐅᓪᓗ ᑲᕙᒪᖓᓂ ᓛᐸᑐᐊᒥᓗ ᐅᖃᕐᓯᒪᔪᑦ ᓄᓇᐅᑉ ᐊᐅᓚᑕᐅᒍᑎᖏᑦ ᑲᕙᒪᓄᑦ ᐊᐅᓚᑕᐅᓂᐊᕐᑎᓗᒋᑦ ᑲᕙᒪᑐᖃᒃᑯᓄᑦ. ᑖᓐᓇ ᐊᖏᖃᑎᒌᒍᑎ ᐃᓚᖃᕐᓱᓂ ᒪᕐᕉᓂᒃ ᓄᓇᑖᕐᓂᒧᑦ ᐊᖏᖃᑎᒌᒍᑏᓐᓂᒃ ᓱᕐᕋᑕᐅᓂᕐᒧᑦ ᐱᕙᓪᓕᖁᑎᑖᕐᓂᒧᓪᓗ ᒪᕐᕉᒥᑎᓪᓗᒋᒃ ᐊᖏᖃᑎᒌᒍᑏᒃ ᑕᒪᒃᑯᐊᓕᒫᑦ “ᐊᖏᖃᑎᒌᒍᑎᒧᑦ ᑐᖕᖓᕕᐅᓂᕋᕐᑕᐅᔪᑦ”.

ᐊᖏᖃᑎᒌᒍᑎᐅᑉ ᑐᖕᖓᕕᖏᑦ ᑐᑭᓯᓇᕐᑎᓯᑦᓯᐊᑐᑦ ᑐᑭᒧᐊᒍᑎᐅᓂᐊᕐᑐᓂᒃ ᑕᓯᐅᕐᓯᒍᑎᐅᓂᐊᕐᑐᓂᓪᓗ ᑖᒃᑯᐊ ᐱᖓᓱᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᑎᓕᔭᐅᓯᒪᒍᑎᖏᑦ ᐊᑐᓕᕐᑎᑕᐅᑎᓪᓗᒋᑦ ᐃᓚᖃᕐᒥᓱᑎᒃ ᖃᓄᐃᓕᖓᑎᓪᓗᒍ ᐃᓄᐃᑦ ᐱᒍᓐᓇᐅᑎᖏᑦ ᐱᒐᓱᐊᕈᒪᓂᖏᓪᓗ ᒥᕐᖑᐃᓯᕐᕕᐅᑉ ᐊᐅᓚᑕᐅᓂᖓᓂ ᐊᑐᕐᑕᐅᓂᐊᕐᒪᖔᑕ. ᐊᖏᖃᑎᒌᒍᑎᐅᑉ ᑐᖕᖓᕕᖏᑦ ᐱᖓᓱᐃᓂ ᑲᕙᒪᓂ ᐊᐅᓚᑦᓯᒍᓐᓇᑐᓃᑦᑐᑦ ᐊᑦᔨᒌᖕᖏᑐᓂ ᐱᖓᓱᓂ ᓄᓇᓂ ᐊᕕᑦᑐᓯᒪᔪᓂ ᒪᕐᕈᐃᓂᓪᓗ ᐃᓄᒃᑎᑐᑦ ᐊᓪᓚᒍᓯᓕᓐᓂ ᐊᑦᔨᒌᖕᖏᒥᔫᓐᓂᒃ. ᑖᒃᑯᐊ ᐊᖏᖃᑎᒌᒍᑏᑦ ᐊᑐᓕᕐᑎᑕᐅᒍᑎᖏᑦ ᐱᓇᓱᐊᕐᑕᐅᒋᐊᖃᖃᑦᑕᑐᑦ ᐊᐅᓚᑦᓯᔨᐅᖃᑎᒌᑦᑐᓄᑦ ᑲᑎᖕᖓᔨᓄᑦ, ᐊᖏᖃᑎᒌᒍᑎᐅᓯᒪᔪᑦ ᓲᓱᒋᔭᐅᑦᓯᐊᖁᑦᓱᒋᑦ ᓯᕗᓪᓕᐅᔭᐅᒋᐊᓖᓪᓗ ᒥᕐᖑᐃᓯᕐᕕᒥ ᐊᐅᓚᑕᐅᒍᓐᓇᓯᐊᖁᑦᓱᒋᑦ.

ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ

ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᐊᐅᓚᑕᐅᔪᖅ ᐱᓇᓱᐊᖃᑎᒌᑦᑐᓄᑦ ᓛᐸᑐᐊᒥᐅᓄᑦ ᐃᓄᓐᓄᑦ ᓄᓇᕕᒻᒥᐅᓄᓪᓗ ᐃᓄᓐᓄᑦ. ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᑎᓕᔭᐅᓯᒪᐅᑎᖃᕐᑐᑦ ᐊᔪᖀᒋᐊᕐᑎᐅᓱᑎᒃ ᑲᕙᒪᑐᖃᒃᑯᑦ ᒥᓂᔅᑕᖓᓄᑦ ᑲᒪᒋᔭᖃᕐᑐᒧᑦ ᒥᕐᖑᐃᓯᕐᕕᓂᒃ ᐊᐅᓚᑕᐅᓂᖏᓐᓄᓗ. ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔩᑦ ᐊᔪᕿᒋᐊᕐᑎᐅᒥᔪᑦ ᑑᕐᙰᑦ ᓂᕐᔪᑎᖏᑦᑕ ᖃᓄᐃᓘᕐᑕᐅᔪᑦᓴᐅᓂᖏᓐᓂᒃ ᐸᕐᓇᖃᑎᒌᓲᖑᑦᓱᑎᓪᓗ ᐊᐅᓚᑕᐅᒍᑎᑦᓴᖏᓐᓂᒃ, ᐃᖃᓗᓕᕆᔨᓄᓪᓗ ᑑᕐᙰᑦ ᖃᕐᖃᖏᓐᓂ, ᒪᑭᕝᕕᒧᑦ ᓄᓇᑦᓯᐊᕗᑦ ᑲᕙᒪᖓᓄᑦ ᐊᓯᖏᓐᓄᓗ ᐊᐅᓚᑕᐅᓂᖓᓂᒃ ᒥᕐᖑᐃᓯᕐᕕᐅᑉ ᒥᕐᖑᐃᓯᕐᕕᓕᕆᐅᑎᓂᓪᓗ ᑲᒪᒋᔭᖃᕐᑐᓄᑦ. ᐊᔪᖀᒋᐊᕐᑎᐅᓂᕐᒥᒍᑦ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᑭᒡᒐᑐᓲᖑᖕᖏᑐᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓂᒃ. ᑖᒃᑯᐊ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᐊᔪᖀᒋᐊᕈᑎᖃᓲᖑᒻᒥᔪᑦ ᖃᐅᔨᓴᕐᑕᐅᔪᑦᓴᓂᒃ ᓯᕗᓪᓕᐅᔭᐅᒋᐊᓕᓐᓂᒃ, ᐳᓛᕆᐊᕐᑐᑦ ᐃᑎᕈᓐᓇᐅᑎᖏᓐᓂᒃ ᒥᕐᖑᐃᓯᕐᕕᐅᓗ ᐊᑐᕐᑕᐅᓂᖓᓂᒃ, ᖁᓪᓕᓴᔭᕐᓂᐊᑐᓂᒃ ᑎᑎᕐᑕᐅᒪᒍᑎᖓᓗ ᒥᕐᖑᐃᓯᕐᕕᐅᑉ ᐊᓯᑦᔨᑕᐅᑉᐸᑦ, ᑮᓇᐅᔭᓕᐅᕋᓱᐊᕈᑎᓂᓪᓗ ᐊᐅᓚᑦᓯᓂᕐᒧᓗ ᐸᕐᓇᓯᒪᐅᑎᐅᔪᓂᒃ. ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᐊᔪᖀᒋᐊᕈᑎᒋᒍᓐᓇᑕᖏᑦ ᒥᓂᔅᑕᒥᒃ ᑲᒪᒋᔭᖃᕐᑐᒥᒃ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓂᒃ ᑕᑯᔭᐅᒍᓐᓇᑐᑦ ᐊᕕᑦᑐᓯᒪᓂᖅ 4.5-ᒥ ᐱᕙᓪᓕᖁᑎᑖᕐᓂᒧᑦ ᓱᕐᕋᑕᐅᓂᕐᒧᓗ ᐊᖏᖃᑎᒌᒍᑎᓂ.

ᐱᓇᓱᐊᖃᑎᐅᔪᑦ

ᐊᖏᖃᑎᒌᒍᑎᐅᑉ ᑐᖕᖓᕕᖏᑦ ᐅᓇᑕᒡᒑᕈᑎᐅᓯᒪᔪᑦ ᐱᓇᓱᐊᖃᑎᐅᔪᓂᒃ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂ - ᒪᑭᕝᕕᒃ, ᓄᓇᑦᓯᐊᕗᑦ ᑲᕙᒪᖓᑦ ᐊᒻᒪᓗ ᓂᐅᕙᓐᓛᓐᒥ ᓛᐸᑐᐊᒥᓗ ᑲᕙᒫᒃ. ᑲᓇᑕᒥ ᒥᕐᖑᐃᓯᕐᕕᓕᕆᔩᑦ ᐱᓇᓱᐊᖃᑎᖃᕐᓂᕆᓲᖓ ᑖᒃᑯᓂᖓ ᐱᖓᓱᓂᒃ ᐊᑑᑎᒋᐊᖃᓪᓚᕆᑦᑐᓯ ᐊᑦᔨᒌᒥᒃ ᑐᕌᒐᖃᕐᓱᑎᒃ ᓯᕗᓪᓕᐅᔭᐅᒋᐊᓕᓐᓂᓗ ᒥᕐᖑᐃᓯᕐᕕᒥ ᐱᓇᓱᐊᕐᑕᖃᓲᖑᑦᓱᑎᒃ ᐅᓇᑕᒡᒑᑕᐅᓯᒪᔪᓂᒃ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᓐᓄᑦ ᐃᓄᓐᓄᓗ. ᑖᒃᑯᐊ ᐱᓇᓱᐊᖃᑎᒌᑦᑐᑦ ᓈᓚᒋᐊᕐᓯᒪᔫᓂᕋᕐᑕᐅᔪᑦ (ᒪᓕᑦᓱᒋᑦ ᐊᖏᖃᑎᒌᒍᑎᐅᑉ ᑐᖕᖓᕕᖏᑦ) ᐊᒻᒪᓗ ᐃᓚᐅᒍᓐᓇᓱᑎᒃ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᓐᓄᑦ.

---

ᐱᕙᓪᓕᐊᑕᐅᓂᖏᑦ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑏᑦ

ᐊᓪᓚᑕᐅᒪᔪᖅ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑏᑦ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓄᑦ ᒥᕐᖑᐃᓯᕐᕕᒃ ᑲᓇᑕᒥ ᓄᐃᑕᐅᓚᐅᕐᓯᒪᕗᖅ ᐱᓇᓱᐊᖃᑎᒌᒍᑎᐅᑦᓱᓂ ᑲᑐᑦᔨᖃᑎᒌᑦᑐᓄᑦ ᐊᐅᓚᑦᓯᓂᕐᒧᑦ ᑲᑎᖕᖓᔨᓄᑦ ᑲᑎᒪᖃᑎᒌᖃᑦᑕᓱᑎᒃ ᑕᑯᓐᓇᐅᑎᑦᓱᑎᒃ ᒪᙯᕝᕕᒥ ᐊᒻᒪᓗ ᐅᖄᓚᐅᑎᒃᑯᑦ ᑲᑎᒪᓂᖃᖃᑦᑕᓱᑎᒃ. ᓄᓇᖃᕐᖄᓯᒪᔪᑎᒍᑦ ᐃᓄᓕᒫᑎᒍᓪᓗ ᑲᑎᒪᓂᖃᕐᓯᒪᔪᑦ ᑲᖏᕐᓱᐊᓗᑦᔪᐊᒥ, ᑯᐯᒃᒥ ᐊᒻᒪᓗ ᓀᓂ, ᓂᐅᕙᓐᓛᓐᒥ ᐊᒻᒪ ᓛᐸᑐᐊᒥ ᐅᖄᒍᑎᖃᕐᓱᑎᒃ ᐸᕐᓇᓯᒪᐅᑎᑦᓴᐅᒐᔭᕐᑐᓂᒃ ᐱᒻᒪᕆᐅᔪᓂᒃ ᓯᕗᓪᓕᐅᑦᔭᐅᒋᐊᖃᕐᑐᓂᒃ ᒥᕐᖑᐃᓯᕐᕕᒻᒥ.

ᒥᕐᖑᐃᓯᕐᕕᒃᑯᑦ ᖃᕆᑕᐅᔭᒃᑯᑦ ᑐᕐᖃᑕᕐᕕᖓ ᑐᓴᐅᒪᔭᐅᒍᑎᑦᓴᓂᒃ ᐃᓗᓕᓕᒃ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎᑦᓴᖏᓐᓂᒃ ᕿᒥᕐᕈᔭᐅᒍᓐᓇᑐᓂᒃ ᐱᕙᓪᓕᐊᑕᐅᓂᕕᓂᖏᑦᑕ. ᐱᓇᓱᐊᖃᑎᒋᔭᐅᔪᑦ, ᓇᒻᒥᓂᖃᖃᑎᒋᔭᐅᔪᑦ ᐊᒻᒪᓗ ᓄᓇᓕᓐᓂ ᐃᓄᖁᑏᑦ ᑐᓴᕐᑎᑕᐅᓯᒪᔪᑦ ᐸᕐᓇᓂᐅᓚᖓᔪᓂᒃ ᐊᓪᓚᓯᒪᔪᑎᒍᑦ ᐊᒻᒪᓗ ᕿᒥᕐᕈᒍᓐᓇᓯᑎᑕᐅᑦᓱᑎᒃ ᐅᖃᐅᓯᑦᓴᖃᕐᑎᓯᒍᓐᓇᕕᖃᕐᑎᑕᐅᑦᓱᑎᒃ ᐅᖄᕈᑎᐅᓯᒪᔪᓂᒃ ᐊᓪᓚᕕᑦᓴᑎᒍᑦ ᓇᓗᓀᔭᕐᑕᐅᓯᒪᑦᓱᑎᒃ ᒥᕐᖑᐃᓯᕐᕕᒥ ᑐᕌᒐᑦᓴᐅᔪᓂᒃ, ᐱᓀᓗᑕᐅᔪᓂᒃ, ᐊᒻᒪᓗ ᐱᕕᑦᓴᓯᐊᖑᔪᓂᒃ ᐃᓱᒪᒋᔭᑦᓴᐅᕈᓐᓇᕋᔭᕐᑐᓂᒃ ᐊᕐᕌᒍᓂᒃ ᖁᓕᓂᒃ ᐸᕐᓀᓂᖃᕐᑎᓗᒋᑦ. ᐃᓱᒪᒋᔭᐅᔪᐃᑦ ᐱᓇᓱᐊᖃᑎᒌᑦᑐᐃᑦ ᑲᑎᒪᓂᖃᕐᑎᓗᒋᑦ ᐊᒻᒪᓗ ᓇᒻᒥᓂᖃᖃᑎᒋᔭᐅᔪᐃᑦ ᑭᐅᑦᔪᑎᖏᑦ ᕿᒥᕐᕈᔭᐅᓯᒪᔪᑦ ᐊᒻᒪᓗ ᐊᓪᓚᓯᒪᔪᓕᐊᕆᔭᕕᓂᐅᑦᓱᑎᒃ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎᖓᓄᑦ ᑕᑯᑦᓴᐅᑎᑕᐅᓯᒪᑦᓱᓂ, ᐊᖏᕐᑕᐅᓯᒪᑦᓱᓂ ᑲᑐᑦᔨᖃᑎᒌᓐᓂᒧᑦ ᐊᐅᓚᑦᓯᓂᕐᒥᒃ ᑲᑎᖕᖓᔨᖏᓐᓄᑦ ᒪᙯᕝᕕᒥ.

---

ᓯᕗᓂᕐᒥ ᑕᐅᑐᑦᑕᖓ

ᑐᕌᒐᖃᕐᓂᖅ ᓯᕗᓂᕐᒧᑦ ᐱᑕᖃᕆᐊᖃᓪᓚᕆᑦᑐᖅ ᐊᐅᓚᑦᓯᒍᑎᐅᔪᓂ ᐸᕐᓇᑕᐅᓯᒪᔪᓂ, ᓯᕗᓂᕐᒥ ᐊᐅᓚᑕᐅᒍᑎᒋᒐᔭᕐᑕᖏᓐᓂᒃ ᒥᕐᖑᐃᓯᕐᕕᐅᑉ. ᑖᓐᓇ ᓯᕗᓂᕐᒥ ᑕᐅᑐᑦᑕᖓ ᓴᕐᕿᔮᕐᑎᓯᔪᖅ ᑐᑭᓯᓇᕐᑎᓯᑦᓱᓂ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᑕ ᐊᑦᔨᐅᖏᑦᑑᒍᑎᖏᓐᓂᒃ ᓄᐃᑕᑎᑦᓯᓯᐊᕐᓱᓂᓗ ᐊᕐᕌᒍᓂ 15-ᓂ ᐱᓇᓱᐊᕈᑎᐅᓂᐊᕐᑐᓂᒃ ᒫᓐᓇᒥ ᐱᒋᐊᕐᑎᓗᒍ, ᑲᓇᑕᒥᐅᑦ ᐅᐸᐅᑎᓚᐅᕐᓯᒪᓂᐊᖕᖏᑐᑦ ᑕᑯᒍᑎᒋᒍᓐᓇᑕᖓ. ᓯᕗᓂᕐᒧᑦ ᑕᐅᑐᑦᑕᐅᔪᑦ ᐱᓇᓱᐊᕐᑕᐅᓯᒪᔪᑦ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᓐᓄᑦ ᓄᐃᑕᑎᑦᓯᓱᑎᒃ ᐃᓱᒪᒋᔭᖏᓐᓂᒃ ᐱᒍᒪᔭᖏᓐᓂᓗ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦᑕ, ᐃᓄᐃᑦ ᐱᓇᓱᐊᖃᑎᐅᔪᑦ ᑲᓇᑕᒥᓗ ᒥᕐᖑᐃᓯᕐᕕᓕᕆᔩᑦ.

---

ᐱᓇᓱᐊᕈᑎᐅᓚᐅᔪᑦ

ᒥᕐᖑᐃᓯᕐᕕᐅᑉ ᐱᐅᔫᒍᑎᓪᒪᕆᖓ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᐱᓇᓱᐊᖃᑎᖃᑦᓯᐊᓲᖑᓂᖓ ᐃᓄᓐᓂᒃ - ᓄᓇᑦᓯᐊᕗᑦ ᑲᕙᒪᖓᓂᒃ, ᒪᑭᕝᕕᒥᒃ ᐊᐅᓚᑦᓯᔨᐅᖃᑎᒌᑦᑐᓗ ᑲᑎᖕᖓᔨᖏᓐᓂᒃ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓄᑦ. ᐱᓇᓱᐊᖃᑎᒌᑦᓱᑕ ᓯᕗᓂᕐᒧᑦ ᐱᓇᓱᐊᕐᓂᐊᑕᑎᓐᓂᒃ ᐅᓇᑕᒡᒑᖃᑎᒌᑦᓯᒪᒐᑦᑕ ᒥᕐᖑᐃᓯᕐᕕᒧᑦ ᑲᑐᑎᖃᑦᑕᓱᒋᑦ ᐱᒍᓐᓇᓯᒐᓱᐊᕐᑕᕗᑦ. ᑕᒪᓐᓇ ᓱᓕᓪᓚᕆᑦᑐᖅ ᒪᙯᕝᕕᐅᑉ ᓴᕐᕿᑎᑕᐅᓯᒪᓂᖓᓄᑦ ᖃᐅᔨᓴᕐᕕᐅᓗ ᑑᕐᙰᑦ ᖃᕐᖃᖏᓐᓂ ᐱᓇᓱᐊᕐᐸᑕᓕᒫᕗᓪᓗ ᐳᓛᕆᐊᕐᑐᓄᑦ, ᐅᕕᒃᑲᓄᑦ ᖃᐅᔨᓴᕐᓂᒥ ᑐᕌᒐᖃᕈᑎᐅᔪᑦ ᐱᒍᓐᓇᓯᔭᐅᒐᓱᐊᕐᑐᓂᓪᓗ.

ᐊᓯᐊᒍᑦ ᐋᕐᕿᓯᒪᖕᖏᑐᐊᕐᒪᑦ ᐱᕕᑦᓴᐅᓂᐊᕐᑐᓂᒃ ᐋᕐᖀᓯᒪᒍᓐᓇᓲᖑᔪᒍᑦ ᐱᒍᓐᓇᓯᑦᓱᒋᓪᓗ ᐊᑖᓂ ᐅᖃᕐᑕᐅᔪᓂᒃ ᐱᔭᕆᔭᐅᓂᐊᕐᓗᑎᒃ ᐅᓇᑕᒡᒑᑕᐅᓯᒪᔪᓂᒃ ᐊᕐᕌᒍᓂ ᖁᓕᓂ ᐱᒍᓐᓇᓯᒐᓱᐊᓚᖓᔭᕗᑦ.

ᑐᕌᒉᑦ ᐱᒍᓐᓇᓯᔭᐅᒐᓱᐊᕐᑐᓗ ᑖᒃᑯᓇᓂ ᐸᕐᓇᓯᒪᒍᑎᓂ ᐅᖃᕐᑕᐅᓯᒪᔪᑦ ᑲᓇᑕᐅᑉ ᒥᕐᖑᐃᓯᕐᕕᓕᔨᖏᑦᑕ ᐱᓇᓱᐊᓚᖓᓂᕋᐅᑎᖏᓐᓂᒃ ᐅᖃᕐᑕᐅᓯᒪᔪᓂᒃ ᓱᕐᕋᑕᐅᓂᕐᒧᑦ ᐱᕙᓪᓕᖁᑎᑖᕐᓂᒧᓪᓗ ᐊᖏᖃᑎᖐᒍᑎᓂ ᓄᓇᑦᓯᐊᕗᑦ ᑲᕙᒪᖓᓂ ᒪᑭᕝᕕᒥᓗ ᓄᐃᑕᑎᑦᓯᓯᐊᕐᑐᑦ ᓲᓱᑦᓴᓱᑎᓪᓗ ᐱᓇᓱᐊᖃᑎᒌᓐᓂᓚᕆᒻᒥᒃ ᐱᖕᖑᑎᓯᒪᔭᑦᑎᓂᒃ ᐊᕐᕌᒍᓂ ᖁᓕᓂ ᐊᓂᒍᕐᑐᓂ ᐱᓇᓱᐊᖃᑎᒌᑦᓱᑕ ᓯᕗᒧᐊᒍᑎᑦᓴᑖᕆᓯᒪᔭᕗᑦ. ᑐᕌᒉᑦ ᐱᒍᓐᓇᓯᔭᐅᒐᓱᐊᕐᑐᓗ ᐊᓪᓚᑕᐅᓯᒪᔪᑦ ᐱᒍᓐᓇᓯᔭᐅᒐᔭᕐᑎᓗᒋᑦ ᑖᑦᓱᒪ ᐸᕐᓇᓯᒪᐅᑎᐅᔫᑉ ᐊᑑᑎᓂᖓᓂ. ᐊᕐᕌᒍᑕᒫᑦ ᐊᑐᓕᕐᑎᑕᐅᒍᑎᖏᓐᓂᒃ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᑐᓴᕐᑎᑕᐅᓲᑦ, ᐱᓇᓱᐊᖃᑎᐅᔪᑦ, ᑲᖐᒋᔭᖃᕐᑐᓗ ᐃᓄᓕᒫᓪᓗ ᖃᓄᐃᓘᓕᕐᒪᖔᑕ ᑐᓴᐅᒪᑎᑕᐅᑦᓱᑎᒃ ᐱᒍᓐᓇᓯᔭᐅᒍᒪᔪᓂᒃ.

---

ᐸᕐᓇᓯᒪᐅᑎᒃ 1

ᓄᑖᑦ ᑲᑎᖃᑎᒌᓐᓃᑦ - ᑕᕆᐅᒥᑦ ᕿᓚᒻᒧᑦ.

ᑖᓐᓇ ᐸᕐᓇᓯᒪᐅᑎ ᓄᑖᓂᒃ ᐱᑐᒍᑎᑦᓴᓂᒃ ᑐᕌᖓᒍᑎᐅᓛᕐᑐᖅ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕝᕕᖓᓂᒃ ᐱᕚᓪᓕᕈᑎᑦᓭᑦ ᐊᒥᓱᖕᖑᒋᐊᕐᑕᐅᓗᑎᒃ ᒥᕐᖑᐃᓯᕐᕕᐅᑉ ᓇᕐᓴᖏᓐᓂᒃ ᖃᕐᖃᖏᓐᓂᓗ ᕿᒥᕐᕈᑎᑕᐅᓂᒃᑯᑦ, ᐃᓄᐃᑦ ᐅᓂᒃᑲᐅᓯᖏᓐᓂᒃ ᑐᓵᓂᒃᑯᑦ ᓄᓇᓕᒻᒥᓂᒃ, ᐊᒻᒪᓗ ᐃᓄᓐᓂᒃ ᓇᒻᒥᓂᓕᓐᓂᒃ ᓴᐳᒻᒥᓂᒃᑯᑦ ᐊᒻᒪᓗ ᐃᓄᓐᓂᒃ ᐱᓇᓱᑦᑎᐅᔪᓂᒃ. ᐳᓛᕆᐊᕐᑐᓂᒃ ᐊᓕᐊᒋᔭᐅᓕᕐᑎᓯᒐᓱᐊᕐᓂᑯᑦ ᐊᒻᒪᓗ ᖃᐅᔨᓴᕐᑎᓂᒃ ᒥᕐᖑᐃᓯᕐᕕᒧᑦ, ᒪᙯᕝᕕᖓ ᐊᑐᕐᑐᓴᓕᐅᕐᓂᒨᓂᕐᓴᐅᓛᓕᕐᑐᖅ. ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂ ᒪᙯᕝᕕᒃ ᖃᐅᔨᓴᕐᕕᖓᓗ ᒥᕐᖑᐃᓯᕐᕕᐅᑉ ᓈᓂᖓᑕ ᐊᑖᓃᒋᐊᕐᑐᖅ ᓄᓇᑦᓯᐊᕘᒻᒥ ᓇᒻᒥᓂᖁᑎᓕᓐᓄᑦ ᐊᐅᓚᑕᐅᑦᓱᓂ ᐱᓇᓱᐊᖃᑎᒌᑦᑐᓄᓪᓗ. ᒪᙯᕝᕕᒃ ᒥᕐᖑᐃᓯᕐᕕᓕᐊᕐᑐᓄᑦ ᐃᑎᕐᑕᕕᐅᓲᖑᒻᒪᓂᒃ, ᐆᑦᑐᕋᐅᑎᐅᓯᓚᐅᕐᓯᒪᑦᓱᓂ ᐊᕐᕌᒍᐃᑦ ᖁᓕᑦ ᐊᓂᒍᕐᑐᑦ ᐃᓄᑐᐃᓐᓇᓄᑦ ᓇᒻᒥᓂᕆᔭᐅᑦᓱᓂ ᒪᑭᑕᑎᑕᐅᓂᐊᕐᑎᓗᒍ. ᑕᒪᓐᓇ ᐸᕐᓇᓯᒪᐅᑎᒃ ᑐᕌᒐᖃᕐᑐᖅ ᖃᓄᖅ ᑲᓇᑕᒥ ᒥᕐᖑᐃᓯᕐᕕᒃ ᐃᑲᔪᕐᓯᒍᓐᓇᒪᖔᑦ ᐱᓇᓱᑦᑎᐅᖃᑎᒥᓂᒃ ᒪᙯᕝᕕᒃ ᓇᒻᒥᓂᖅ ᒪᑭᑕᒍᓐᓇᓯᑦᓯᐊᖁᑦᓱᒍ ᑮᓇᐅᔭᑎᒍᑦ, ᐃᓗᕐᖁᓯᕐᑎᒍᑦ ᐊᕙᑎᓕᕆᓂᒃᑯᓗ ᓴᐳᒻᒥᒍᓐᓇᓯᐊᓛᕐᒪᑦ ᓂᐅᕐᕈᐸᑦᑐᓂᒃ, ᖃᐅᔨᓴᕐᑎᓂᒃ, ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᓐᓂᒃ ᐃᓄᑐᐃᓐᓇᓂᓪᓗ ᐃᓄᑐᖃᕐᓂᒃ ᐅᕕᒃᑲᓂᓪᓗ ᐱᑐᖃᑎᒌᑦᑎᓗᒋᑦ ᓄᓇᒧᑦ ᒥᕐᖑᐃᓯᕐᕕᐅᓗ ᐅᓂᒃᑳᑕᐅᓂᖏᓐᓄᑦ ᐊᑐᓂᓪᓗ ᐅᓂᒃᑳᑐᐊᒥᓄᑦ.

---

---

---

---

---

---

---

ᐸᕐᓇᓯᒪᐅᑎᒃ 2

ᐱᓂᐊᕐᓂᕋᐅᑎᐅᓯᒪᔪᓂᒃ ᓱᓕᑎᑦᓯᓂᖅ

ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦ ᐱᓇᓱᐊᖃᑎᖃᓛᕐᑎᓗᒋᑦ ᓄᓇᑦᓯᐊᕗᑦ ᑲᕙᒪᖓᓂᒃ, ᒪᑭᕝᕕᒥᒃ ᐊᒻᒪᓗ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᓐᓂᒃ ᓄᓇᖓ ᐃᓗᕐᖁᓯᖓᓗ ᐱᐅᓕᓂᐊᕐᑕᐅᓯᐊᖁᓪᓗᒍ ᒥᕐᖑᐃᓯᕐᕕᐅᑉ, ᓇᓗᓀᕐᑕᐅᓗᓂᓗ ᓱᓕᓕᕐᑎᑕᐅᓗᓂᓗ ᐃᓄᐃᑦ ᖃᐅᔨᒪᐅᓯᖓ ᐱᑐᑦᓯᒪᓂᖓᓗ ᐃᓄᐃᑦ ᓄᓇᒥᓄᑦ ᐱᕕᑦᓴᖃᕐᑎᓯᒍᑎᐅᓗᓂ ᐃᓄᑐᐃᓐᓇᓂᒃ ᐊᒻᒪᓗ ᐃᓄᐃᑦ ᒪᑭᑕᑎᒐᓱᐊᕐᑕᖏᓐᓂᒃ. ᐊᐅᓚᑦᓯᓗᑎᒃ ᒥᕐᖑᐃᓯᕐᕕᒥᒃ ᐱᓇᓱᐊᖃᑎᒌᓪᓗᑎᒃ ᐊᖏᖃᑎᖐᒍᑎᐅᓯᒪᔪᑦ ᑐᖕᖓᕕᐅᔪᑦ ᐊᒻᒪᓗ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᐱᒍᓐᓇᓯᑦᓯᐊᕈᑎᐅᓚᖓᔪᑦ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓄᑦ. ᐸᕐᓇᓯᒪᒍᑎᐅᔪᑦ ᑲᔪᓯᓚᖓᔪᑦ ᐱᒍᓐᓇᓯᒐᓱᐊᕈᑎᐅᓗᑎᒃ ᓯᕗᓂᓕᐅᕈᑎᐅᒐᓱᐊᕐᑐᓂᒃ ᑑᕐᙰᑦ ᖃᕐᖃᓱᐊᖏᑦᑕ ᐱᓇᓱᐊᖃᑎᒌᑦᑐᓗ ᐱᒍᓐᓇᓯᒪᒍᒪᖏᓐᓂᒃ.

---

---

---

---

---

---

ᐸᕐᓇᓯᒪᐅᑎᒃ 3

ᐃᓄᐃᑦ ᐅᓂᒃᑲᐅᓯᖏᓐᓂᒃ ᐊᒥᕐᖃᕈᑎᖃᕐᓂᖅ -ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓐ ᐃᓄᐃᑦ ᐃᓗᕐᖁᓯᖓᒍᑦ ᑕᐅᑐᒍᓯᖃᕐᓂᖅ

ᐃᓄᐃᑦ ᐅᓂᒃᑲᐅᓯᖏᓐᓂᒃ ᐊᒥᕐᖃᕈᑎᖃᕐᓂᖅ ᐱᒻᒪᕆᐅᕗᖅ ᐱᑐᖃᑎᒌᒍᑎᐅᑦᓱᓂ ᐃᓄᑐᐃᓐᓇᓄᑦ, ᓂᐅᕐᕈᑐᓄᑦ ᑲᓇᑕᒥᐅᓄᓪᓗ ᑐᑭᓯᑎᑦᓯᒍᑎᐅᒻᒪᑦ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᑕ ᐃᓗᕐᖁᓯᖓᓂᒃ ᐃᕐᖃᓇᕐᑐᖁᑎᖏᓐᓂᓗ ᐃᓄᐃᑦ ᓄᓇᖓᓂ. ᑖᓐᓇ ᐸᕐᓇᓯᒪᒍᑎᐅᔪᖅ ᐊᓪᓚᖑᕐᑎᓯᒍᑎᐅᒐᔭᕐᑐᖅ ᐃᓄᑐᙯᑦ ᐅᓂᒃᑳᑐᐊᖏᓐᓂᒃ ᖃᐅᔨᓵᕆᒍᑎᑦᓯᐊᓂᒃ ᐅᕕᒃᑲᓂᑦ ᓂᐅᕐᕈᑐᓂᓪᓗ. ᐅᐱᒍᓲᑎᖃᕐᓗᑎᒃ ᐃᓄᐃᑦ ᖃᐅᔨᒪᐅᓯᖏᓐᓂᒃ ᐊᑑᑎᒐᔭᕐᑐᖅ ᐊᑯᓂᓗ ᐅᒫᒍᓐᓇᓱᓂ ᒥᕐᖑᐃᓯᕐᕕᒥ. ᖃᐅᔨᓴᕐᑕᐅᒋᐊᓪᓚᓗᓂᓗ ᐃᓄᐃᑦ ᐅᓂᒃᑳᑐᐊᖏᑦ ᓂᐅᕐᕈᑐᓂ ᑲᓇᑕᒥᐅᓂᓗ ᑐᑭᓯᑎᑦᓯᒍᑎᐅᒋᐊᓪᓚᒐᔭᕐᑐᖅ ᐅᐱᒍᓱᓕᐅᒥᒍᑎᐅᓗᓂᓗ ᓱᒧᑦ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᐊᑦᔨᐅᖏᑦᓯᐊᓱᓂ ᐃᓂᐅᒻᒪᖔᑦ.

---

---

---

---

---

ᐊᐅᓚᑦᓯᕕᐅᔪᑦ

ᒥᕐᖑᐃᓯᕐᕕᐅᑉ ᐱᓇᓱᑦᑎᖏᑦ ᐊᒻᒪᓗ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᐅᓇᑕᒡᒑᓯᒪᔪᑦ ᓯᑕᒪᐅᔪᕐᑐᓂᒃ ᐊᐅᓚᑦᓯᕕᐅᒐᔭᕐᑐᓂᒃ ᒥᕐᖑᐃᓯᕐᕕᒥ ᓄᓇᓂᒃ ᐃᓗᕐᖁᓯᓕᕆᕕᓐᓂᓗ ᐱᒻᒪᕆᐅᓂᖓᓂᓪᓗ ᐃᓄᐃᑦ ᐅᓂᒃᑲᐅᓯᖏᑦ ᐅᓂᒃᑲᐅᑕᐅᓗᑎᒃ ᓂᐅᕐᕈᑐᓄᑦ ᑲᓇᑕᒥᐅᓄᓪᓗ. ᑕᓪᓕᒪᑦ ᐃᓃᑦ ᓯᕿᓂᕙᓯᖓᓂ ᒥᕐᖑᐃᓯᕐᕕᐅᑉ ᓂᐅᕐᕈᕕᐅᓲᑦ ᑌᒣᒻᒪᑦ, ᒪᓕᒐᖃᕆᐊᖃᕐᑐᑦ ᓄᓇᐅᑉ ᐃᓗᕐᖁᓯᓕᕆᐅᑏᓪᓗ ᓴᐳᒻᒥᔭᐅᒍᑎᑦᓴᖏᓐᓂᒃ. ᒪᕐᕉᒃ ᐃᓃᒃ ᑕᕐᕋᕙᓯᒻᒦᑑᒃ ᒥᕐᖑᐃᓯᕐᕕᒥ ᑲᒪᒋᔭᐅᑦᓯᐊᕆᐊᓖᒃ ᐅᐸᐅᑎᒐᓱᒋᐊᖏᓪᓗ ᐱᔭᕐᓃᑑᑦᓱᑎᒃ ᓂᐅᕐᕈᑐᓄᑦ ᓯᕗᓂᕐᒥ ᐊᑑᑎᔭᐅᑎᑕᑦᑎᓄᑦ ᐃᓚᒋᔭᐅᓕᑐᐃᓐᓇᕆᐊᓖᒃ.

ᑕᓪᓕᒪᑦ ᐃᓃᑦ ᓯᕿᓂᕙᓯᒻᒦᑐᑦ ᒥᕐᖑᐃᓯᕐᕕᒥ ᐊᑦᔨᒌᓂᒃ ᐊᐅᓚᑦᓯᓂᕐᒧᑦ ᐱᔭᕐᓃᓕᐅᕈᑎᑕᖃᖃᑦᑕᑐᑦ ᓂᐅᕐᕈᑐᓄᑦ ᐅᐸᑦᑕᐅᒍᓐᓇᓂᖓᓄᑦ, ᐃᓱᐊᕐᓯᓂᕐᓴᐅᒐᔭᕐᑐᖅ ᐊᑑᑎᔭᖏᑦ. ᓴᐳᒻᒥᔭᐅᓂᖓᓗ ᓄᓇᐅᑉ ᐃᓗᕐᖁᓯᓕᕆᐅᑏᓪᓗ. ᐃᒡᒋᐊᖅ ᓄᓇᐅᑉ ᐊᕕᑦᑐᑕᐅᓯᒪᓂᖓᓂ ᐱᖓᓱᒐᓃᑦᑐᑐᐊᖅ, ᐱᖓᓲᔪᕐᑐᑦ ᐃᓃᑦ ᓄᓇᐅᑉ ᐊᔨᑦᑐᑕᐅᓯᒪᓂᖓᓂ ᒪᕐᕈᒦᑦᑎᓗᒋᑦ. ᐊᐅᓚᑦᓯᓂᕐᒧᑦ ᑐᕌᒉᑦ ᐱᒍᓐᓇᓯᔭᐅᒐᓱᐊᕐᑐᓗ ᐱᖕᖑᑎᑕᐅᓯᒪᔪᑦ ᑖᒃᑯᓄᖓ ᓯᑕᒪᐅᔪᖕᖏᒐᕐᑐᓄᑦ ᐃᓂᓄᑦ ᐊᑖᓂ ᑐᑭᓯᓇᕐᑎᑕᐅᔪᓄᑦ.

ᐊᒡᒋᒋᐊᖅ (ᓴᓪᓕᐅᑉ ᑲᖏᕐᓱᖓ) ᐊᒡᒋᒋᐊᖅ ᐃᓗᐃᓕᕐᒦᑐᖅ Branigan ᕿᑭᕐᑕᖓᓂ, ᓴᓪᓕᐅᑉ ᑲᖏᕐᓱᖓᓂ ᐃᓄᓐᓄᑦ ᓇᔪᒐᐅᓲᑐᖃᖅ ᓯᕗᓪᓕᖏᓐᓄᓗ. ᐃᓗᕐᖁᓯᕐᑎᒍᑦ ᐊᑑᑎᒐᑦᓴᖃᑦᓯᐊᑐᖅ ᖃᕐᒪᑕᓕᒃ, ᓂᕿᖃᐅᑎᕕᓂᕐᑕᓕᒃ, ᐅᑕᕐᕿᐅᕕᑦᑕᓕᒃ ᐊᓯᖏᓐᓂᓗ ᐃᓗᕐᖁᓯᕐᒥᒃ ᐱᓇᓱᐊᕈᑎᐅᓲᓂᒃ ᐅᓪᓗᒥᒧᑦ. ᐃᒡᒋᐊᖅ ᐃᓂᖃᕐᑐᖅ ᓂᐅᕐᕈᑐᓄᑦ ᑎᑭᕝᕕᐅᒍᓐᓇᑐᒥᒃ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᐱᓇᓱᐊᕐᕕᖓᒍᑦ ᑖᕙᓂᓗ ᓂᐅᕐᕈᑐᑦ ᖃᕐᖃᓄᑦ ᒪᔪᕋᕈᓐᓇᓱᑎᒃ ᕿᒥᕐᕈᓗᑎᒃ ᐃᓕᓐᓂᐊᓗᑎᓪᓗ ᐃᓗᕐᖁᓯᕐᑎᒍᑦ ᖃᓄᐃᓕᖓᓂᐅᔪᓂᒃ ᐃᕐᖃᓇᕐᑐᓄᓪᓗ ᐱᒻᒪᕆᐅᓂᖏᓐᓂᒃ.

ᓴᓪᓕᑯᓗᒃ (ᕉᔅ ᕿᑭᕐᑕᖓ) ᐃᓂᐅᔪᖅ, ᖃᒻᒥᑯᑦ ᐃᓄᐃᑦ ᓄᓇᒋᖃᑦᑕᓚᐅᔭᖓ ᕿᓚᓗᒐᕐᓂᐊᕕᒋᑦᓱᒍ, ᓇᑦᓯᓂᐊᕐᕕᒋᑦᓱᒍ ᕿᐅᓐᓇᑐᒥ ᓯᑯᓕᒻᒥ ᓛᐸᑐᐊᑉ ᑕᕆᐅᖓᓂ. ᑖᓐᓇ ᕿᑭᕐᑕᖅ ᒥᑭᔪᐊᐱᐅᔮᕐᑐᖅ ᐃᓐᓈᕈᐃᑦ ᑕᑯᑦᓱᒋᑦ ᓴᓪᓕᐅᑉ ᐃᑭᕋᓴᖓᓂ ᐊᒥᓱᓂᓪᓗ ᐃᓗᕕᕐᑕᖃᕐᓱᓂ, ᒪᕐᕉᓂᓪᓗ ᓄᓇᓕᑦᑕᖃᕐᓱᓂ ᖃᕐᒪᑕᓕᕕᓂᕐᓂᒃ. ᑕᒫᓂ ᑐᓂᕐᑕᓂᐊᕐᑕᐅᖃᑦᑕᓯᒪᔪᑦ 5000 ᐊᕐᕌᒍᓂ ᖃᐅᔨᔭᐅᖃᑦᑕᓯᒪᔪᑦ ᐃᓄᖃᕐᓯᒪᒋᐊᖓᓂᒃ ᑑᕐᙰᑦ ᖃᕐᖃᖏᑦ. ᓴᓪᓕᑯᓗᒃ ᐃᓄᐃᑦ ᐃᓗᕐᖁᓯᕐᒥᓂᒃ ᓴᕐᕿᔮᕐᑎᓯᕕᓪᓚᕆᖓ ᓴᓪᓕᐅᑉ ᐃᑭᕋᓴᖓᓂ. ᑲᓇᑕᒥ ᒥᕐᖑᐃᓯᕐᕕᑯᑦ ᐱᕙᓪᓕᐊᓯᒪᕗᑦ ᐊᒻᒪᓗ ᑲᔪᓯᑎᑦᓯᓯᐊᖃᑦᑕᓱᑎᒃ ᐳᓛᕆᐊᕐᑐᓄᑦ ᐊᒻᒪᓗ ᐃᓗᕐᖁᓯᕐᑎᒍᑦ ᓴᐳᒻᒥᔭᐅᓂᖏᑦᑕ ᒪᓕᒐᖏᓐᓅᓕᖓᔪᓂᒃ ᓴᓪᓗᑯᒻᒥ.

ᕌᒪ ᐃᓂᐅᔪᖅ ᓄᓇᖓ ᐱᑕᖃᑦᓯᐊᓱᓂ ᐃᓗᕐᖁᓯᓕᕆᓂᕐᒨᓕᖓᔪᓂᓪᓗ, ᐃᓄᐃᑦ ᓯᕗᓪᓕᕆᓚᐅᔭᒥᓄᑦ ᐱᑐᖃᑎᒌᕝᕕᖓ. ᑕᒫᓂ ᐅᔭᕋᑦᑕᕕᖃᕐᑐᖅ ᕌᒪᒥᓪᓗ ᐊᐅᓚᑦᓯᓚᐅᕐᑐᕕᓂᕐᓂᒃ, ᐃᓄᐃᑦ ᐅᓇᑕᒡᒑᓯᒪᔭᖓ ᐊᐅᓚᑕᐅᒍᑎᖃᖁᑦᓱᒍ ᐱᐅᓯᕐᓲᑎᑐᐃᓐᓇᐅᖏᑦᑐᒥᒃ ᐊᒥᕐᖄᖃᑎᒌᒍᑎᐅᓗᓂᓗ ᑲᓇᑕᒥᐅᓄᑦ. ᒪᓕᒐᕐᑕᖃᕆᐊᖃᑦᓯᐊᓛᕐᑐᖅ ᑭᑦᔨᒐᕐᑕᓕᒻᒥ ᐅᔭᕋᑦᑕᕕᒃ ᐃᕐᖃᓇᕐᑐᖁᑎᐅᑎᓪᓗᒍ ᑌᔭᐅᓯᒪᒻᒪᑦ.

ᓯᕐᓗᐊᖅ (ᑕᕐᕋᕙᓯᒻᒦᑐᖅ) ᐊᐅᓚᑕᐅᔪᑦᓴᐅᑎᓪᓗᒍ ᐅᓇᑕᒡᒑᑕᐅᓯᒪᔪᖅ ᑲᑎᕝᕕᐅᓲᖅ ᓂᐅᕐᕈᑐᓄᓪᓗ ᐅᐸᑦᑕᐅᓯᑎᐅᑦᓱᓂ. ᓯᕐᓗᐊᖅ ᐃᓄᐃᑦ ᐊᑐᓲᖓ ᓯᕗᓪᓕᖏᑦᑕᓗ ᐅᑭᐅᓂᒃ ᑕᐅᓴᓐᑎᓂᒃ. ᓄᓇᖓ ᐱᑦᓴᑕᖃᑦᓯᐊᑐᖅ ᐃᓗᕐᖁᓯᕐᒨᓕᖓᔪᓂᓪᓗ ᐃᓗᕕᕐᑕᖃᕐᑐᖅ, ᖃᕐᒪᑕᖃᕐᓱᓂ, ᓂᕿᖃᐅᑎᑕᖃᕐᓱᓂ, ᐊᓯᖏᓐᓂᓗ. ᑐᓂᕐᑕᓂᐊᕐᑐᖃᓚᐅᔪᑎᓪᓗᒍ ᖃᐅᔨᑦᓯᐊᓂᕐᓴᖑᕐᓯᒪᔪᑦ, ᓂᐅᕐᕈᑐᓄᑦ ᐅᐸᑦᑕᐅᑎᒋᐊᖓ ᐃᓱᐊᕐᑑᓱᓂ ᐱᓇᓱᐊᖃᑎᐅᑎᓪᓗᒋᑦ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᑐᓵᔨᖏᑦ. ᑲᓇᑕᒥ ᒥᕐᖑᐃᓯᕐᕕᑯᑦ ᐱᕙᓪᓕᐊᓯᒪᕗᑦ ᐊᒻᒪᓗ ᑲᔪᓯᑎᑦᓯᓯᐊᖃᑦᑕᓱᑎᒃ ᐳᓛᕆᐊᕐᑐᓄᑦ ᐊᒻᒪᓗ ᐃᓗᕐᖁᓯᕐᑎᒍᑦ ᓴᐳᒻᒥᔭᐅᓂᖏᑦᑕ ᒪᓕᒐᖏᓐᓅᓕᖓᔪᓂᒃ ᓯᓪᓗᐊᒥ.

ᐱᑐᒃᑭᒃ (ᓇᕝᕚᑉ ᑰᖓᓂ) ᐊᐅᓚᕕᒋᓲᑐᖃᖓᑦ ᐃᓄᐃᑦ ᓄᓇᕕᒻᒥᐅᑦ (ᑯᐯᑉ ᑕᕐᕋᖓᓂ) ᓄᓇᑦᓯᐊᕘᕐᒥᐅᓪᓗ (ᓂᐅᕙᓐᓛᓐ ᑕᕐᕋᖓᓂ ᓛᐸᑐᐊᒥ) ᑌᒪᖕᖓᓂᐊᕐᔪᒃ - ᐱᓱᕝᕕᐅᕙᑦᑐᕕᓂᖅ ᕿᒧᑦᓯᑯᓪᓘᓐᓃᑦ ᐅᓪᓗᒥᓕ ᓯᑭᑑᒃᑯᑦ ᐅᐸᑦᑕᐅᕙᓕᕐᒥᔪᖅ. 2006-ᖑᑎᓪᓗᒍ ᐃᓄᑦᓱᒥᒃ ᓇᑉᐯᔪᖃᓚᐅᔪᖅ ᑲᓇᑕᒥ ᒥᕐᖑᐃᓯᕐᕕᓕᕆᔨᓂᒃ ᐅᐱᒍᓱᒍᑎᒋᑦᓱᒍ ᓯᕗᓪᓕᕕᓂᕐᒥᑕ ᐊᕐᖁᓯᓂᕕᓂᕆᒻᒪᐅᒃ ᐅᓪᓗᒥᓗ ᐱᒻᒪᕆᐅᓂᖓᓂᒃ ᑐᑭᓯᑎᑦᓯᒍᑎᒋᑦᓱᒍ. ᐊᒥᓱᑦ ᑐᓂᕐᑕᓂᐊᕐᕕᓭᑦ ᐅᓇᑕᒡᒑᑕᐅᓯᒪᔪᑦ ᓂᐅᕐᕈᑐᓪᓗ ᐊᑑᑎᒍᓐᓇᓯᐊᕐᓱᑎᒃ ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᐱᓇᓱᑦᑎᖏᑦᑕ ᐊᑑᑎᓲᖏᓐᓂᒃ ᐊᕐᖁᑎᒋᓂᐊᕐᑕᖏᑦ ᐅᓇᑕᒡᒑᕇᕐᓯᒪᔪᓂᒃ.

---

---

ᑖᒃᑯᐊ ᐱᖓᓱᑦ ᐃᓃᑦ ᐊᐅᓚᑕᐅᔪᑦ ᑕᕐᕋᕙᓯᖓᓂ ᒥᕐᖑᐃᓯᕐᕕᐅᑉ ᐅᐱᕐᖏᕕᒃ, ᑲᖓᓚᕐᓯᐅᕕᐅᑉ ᑕᓯᖓ ᐊᒻᒪᓗ ᓇᕐᓴᐅᑉ ᑕᓯᖓ.

ᐅᐱᕐᖏᕕᒃ ᑕᕐᕋᕙᓯᓐᓂᐹᖅ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓᓂ ᑕᒫᓂᓗ ᕿᓚᓗᒐᕐᓂᐊᕕᑐᖃᐅᑦᓱᓂ ᐊᑐᕐᑕᐅᓲᖑᖏᓐᓇᑐᖅ ᐃᓄᓐᓄᑦ. ᑕᒪᓐᓇ ᐊᐅᓚᑕᐅᓂᖓ ᐊᖏᔫᖕᖏᑐᖅ, ᑲᖐᒋᔭᐅᓪᓗᐊᕋᓂ ᐅᔭᕋᑦᑕᖃᕐᓱᓂ ᑲᑦᔮᓇᕐᑐᒥᒃ ᐊᑭᓐᓇᔮᖓ, ᐅᒥᐊᕐᑐᑐᓄᑦ ᐊᑐᕋᑦᓴᓯᐊᖑᑦᓱᓂ ᑲᓇᑕᐅᑉ ᒥᕐᖑᐃᓯᕐᕕᖏᑦᑕ ᐊᐅᓚᑦᓯᕕᒋᖕᖏᑕᖓ. ᓄᓇᕕᒻᒥᐅᑦ ᓄᓇᑦᓯᐊᕗᒻᒥᐅᓗ ᐃᓄᐃᑦ ᐱᓇᓱᐊᖃᑎᒌᕝᕕᒋᒍᓐᓇᑕᖓ ᐊᖑᓇᓱᐊᕐᕕᒋᓗᒍ ᕿᓚᓗᒐᕐᓂᒃ. ᑕᒪᓐᓇ ᓄᓇ ᐅᔭᕋᑦᑕᓕᒃ ᐊᐅᐸᕐᑐᐊᐱᓐᓂᒃ ᖃᐅᒪᔪᓂᒃ. ᐃᓄᐃᑦ ᐅᖄᕐᓯᒪᔪᑦ ᐅᐱᕐᖏᕕᓕᐊᕐᑎᓯᖃᑦᑕᓂᕐᒥᒃ ᐅᖃᕐᓱᑎᓪᓗ ᖃᓄᐃᓘᕐᑎᓯᖃᑦᑕᕋᔭᕐᒪᖔᕐᒥᒃ ᑕᒫᓂ.

ᑲᖓᓚᕐᓯᐅᕕᐅᑉ ᑕᓯᖓ ᐃᓂᒋᔭᐅᔪᖅ ᖃᓯᒋᐊᓄᑦ. ᓄᓇᑦᓯᐊᕗᑦ ᑲᕙᒪᖓᑦ ᐊᒻᒪᓗ ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᐱᓇᓱᐊᖃᑎᒌᒐᔭᕈᒪᑦᓱᑎᒃ ᖃᐅᔨᓴᕐᑎᓯᓗᑎᒃ ᖃᓯᒋᐊᑦ ᖃᑦᓯᐅᒪᖔᑕ ᑕᕆᐅᖑᖕᖏᑐᒦᑦᑐᑦ. ᑖᒃᑯᐊ ᖃᓯᒋᐊᑦ ᓴᐳᒻᒥᔭᐅᖁᓗᒋᑦ ᓇᔪᒐᖓᓗ ᑕᒪᓐᓇ ᐅᓇᑕᒡᒑᓯᒪᔭᕗᑦ ᓴᐳᒻᒥᔭᐅᔪᑦᓴᐅᑎᓪᓗᒍ ᒥᕝᕕᐅᖃᑦᑕᕋᔭᕐᓂᖓᓗ ᓄᕐᖃᑎᑕᐅᓯᒪᑦᓱᓂ. ᑌᒣᒐᓗᐊᕐᑎᓗᒍ, ᒥᕝᕕᐅᒍᓐᓇᕋᓗᐊᕐᓱᓂ ᖃᐅᔨᓴᕆᐊᕐᑐᑐᓄᑦ.

ᓇᕐᓴᐅᑉ ᑕᓯᖓ ᓇᕐᓴᐅᑉ ᐃᓗᐃᓕᖓᓃᑦᓱᓂ ᐃᓄᐃᑦ ᐃᖃᓗᑉᐱᓂᐊᕐᕕᒋᓲᑐᖃᖓ. ᑕᒪᓐᓇ ᐱᖁᔭᖃᕋᑕᕐᑎᓇᒍ ᑭᓇᑐᐃᓐᓇᑯᓐᓄᑦ ᐃᖃᓗᓐᓂᐊᕕᐅᖃᑦᑕᓚᐅᔪᒻᒥᔪᖅ ᑌᒣᓐᓂᖓᓄᑦ ᑖᓐᓇ ᑕᓯᖅ ᓴᐳᒻᒥᔭᐅᓂᖃᕆᐊᖃᕐᑐᖅ ᐳᓛᕆᐊᕐᑐᑦ ᖃᐅᔨᒪᑦᓯᐊᖁᑦᓱᒋᑦ ᑕᒡᒐᓂ ᑕᓯᕐᒥ ᐃᖃᓗᓐᓂᐊᕈᓐᓇᖏᓐᓂᒥᓂᒃ ᕿᒫᓄᓪᓗ ᒥᓲᑦ ᖃᖓᑦᑕᔫᑦ ᑕᒡᒍᖓ ᒥᒍᓐᓇᕋᑎᒃ.

---

---

ᑎᑎᕐᑐᐃᓂᖅ

ᑲᓇᑕᒥ ᒥᕐᖑᐃᓯᕐᕕᐅᔪᑦ ᓄᓇᖕᖑᐊᑎᒍᑦ ᐋᖅᑭᓱᕐᑕᐅᓯᒪᓂᖏᑦ ᓇᓗᓀᕐᑕᐅᓯᒪᑦᓯᐊᓗᑎᒃ ᐊᓪᓚᑕᐅᓯᒪᐅᑎᖏᑦ ᓄᓇᐃᑦ ᐃᒣᓪᓗ ᑕᒡᒐᓂ ᒥᕐᖑᐃᓯᕐᕕᒻᒥ ᐊᓯᖏᓐᓂᓗ ᐱᓇᓱᐊᕐᕕᐅᖃᑦᑕᕋᔭᕐᑐᓂ ᓱᓇᑐᐃᓐᓇᓄᑦ ᐊᑐᕐᑕᐅᔪᓐᓇᕋᔭᕐᑐᐃᑦ ᓄᓇᒥ ᐅᕝᕙᓗᓘᓐᓃᑦ ᐃᒫᓂ ᓴᐳᒻᒥᔭᐅᓗᑎᒃ ᐊᑐᕐᑕᐅᔪᓐᓇᕋᔭᕐᑐᐃᑦ. ᑕᒪᒃᑯᐊ ᓄᓇᖕᖑᐊᒃᑯᑦ ᐊᓪᓚᑕᐅᓯᒪᐅᑎᖏᑦ ᑕᓪᓕᒪᐅᓕᖓᔪᓂᒃ ᐊᒡᒍᑐᕐᓯᒪᐅᑎᖃᕐᒪᑕ:

• ᐊᓪᓚᑕᐅᓯᒪᔪᖅ 1 - ᐊᑦᔨᐅᖏᑦᑐᒃᑯᑦ ᓴᐳᒻᒥᔭᐅᒍᑎᓕᒃ;
• ᐊᓪᓚᑕᐅᓯᒪᔪᖅ 2 - ᓱᓇᖃᖏᑦᑐᖅ ᓄᓇᑐᐃᓐᓇᖅ;
• ᐊᓪᓚᑕᐅᓯᒪᔪᖅ 3 - ᓱᕐᕋᑕᐅᓯᒪᖏᑦᑐᖅ ᓄᓇ ᐊᕙᑎᒦᑦᑐᖅ;
• ᐊᓪᓚᑕᐅᓯᒪᔪᖅ 4 - ᓯᓚᒥ ᐱᖕᖑᐊᕕᐅᓲᖅ;
• ᐊᓪᓚᑕᐅᓯᒪᔪᖅ 5 - ᒥᕐᖑᐃᓯᕐᕕᒻᒥ ᐱᓇᓱᐊᕐᕕᐅᓲᖅ.

ᐊᐅᓚᑦᓯᔨᐅᖃᑎᒌᑦᑐᑦ ᑲᑎᖕᖓᔨᖏᑦ ᐃᑲᔪᕐᓯᒪᒐᓱᐊᖏᓐᓇᖃᑦᑕᑐᑦ ᓂᐅᕐᕈᑐᑦ ᐊᓕᐊᓇᕐᑐᓂᒃ ᐊᑑᑎᖁᑦᓱᒋᑦ, ᕿᒥᕐᕈᓗᑎᒃ ᐃᓕᑦᓯᓗᑎᓪᓗ ᒥᕐᖑᐃᓯᕐᕕᒥᒃ ᐃᓄᐃᓪᓗ ᐃᓅᒍᓯᖓᓂᒃ ᓄᓇᒥᓂ. ᒥᕐᖑᐃᓯᕐᕕᐅᑉ ᑎᑎᕐᑕᐅᓯᒪᓂᖓ ᑕᒪᑐᒥᖓ ᓴᕐᕿᔮᕐᑎᓯᔪᖅ ᑐᑭᒧᐊᒍᑎᐅᑦᓱᓂᓪᓗ ᑐᖕᖓᕕᖃᕐᓂᒧᑦ ᐊᖏᖃᑎᒌᒍᑎᓂ, ᐊᐅᓚᑦᓯᒍᑎᐅᓂᐊᕐᓗᓂ ᓂᐅᕐᕈᑐᓂᒃ ᓴᐳᒻᒥᒍᑎᐅᓗᓂᓗ ᐃᓗᕐᖁᓯᕐᒨᓕᖓᔪᓂᒃ ᓄᓇᖓᓂᓪᓗ ᐃᕐᖃᐅᒪᓇᑦᓯᐊᖁᓪᓗᒋᑦ ᐊᑐᕐᓂᖃᕐᓗᑎᒃ ᓄᓇᖓᓗ ᓱᕐᕃᑑᑦᓯᐊᖁᓪᓗᒍ ᐃᓄᐃᓪᓗ ᐃᓗᕐᖁᓯᕐᒥᓂᒃ ᐊᑑᑎᒍᓐᓇᓯᐊᖁᓪᓗᒋᑦ (ᐊᖑᓇᓱᐊᕈᓐᓇᓗᑎᒃ, ᒪᙯᒍᓐᓇᓗᑎᒃ, ᐊᓯᖏᓐᓂᓗ) ᒥᕐᖑᐃᓯᕐᕕᒥ. ᒥᕐᖑᐃᓯᕐᕕᐅᑉ ᑎᑎᕐᑐᑕᐅᓯᒪᓂᖓ ᓛᐸᑐᐊᒥᐅᑦ ᓄᓇᕕᒻᒥᐅᓗ ᐃᓄᐃᑦ ᐱᒍᓐᓇᐅᑎᖏᓐᓂᒃ ᓴᕐᑯᓯᒍᑎᐅᖕᖏᑐᖅ ᐊᖏᖃᑎᒌᒍᑎᐅᓯᒪᔪᓂ ᓄᓇᑖᕐᓂᒧᑦ ᐊᖏᖃᑎᒌᒍᑎᓂ ᐊᒻᒪᓗ/ᐅᕝᕙᓗᓗᓐᓃᑦ ᐱᓂᐊᕐᓂᕋᕐᓂᒧᑦ ᐊᖏᖃᑎᒌᒍᑎᐅᓯᒪᔪᓂ.

ᐊᓪᓚᑕᐅᓯᒪᔪᖅ 2 - ᓱᓇᖃᖏᑦᑐᖅ ᓄᓇᑐᐃᓐᓇᖅ

ᓄᓇᐅᑉ ᐊᓪᓚᑕᐅᓯᒪᓂᖓ 2 ᓇᓗᓀᕐᑕᐅᓯᒪᕗᖅ ᓇᓗᓀᕐᑕᐅᓯᒪᓪᓚᕆᓐᓂᖓᓂᒃ ᒥᕐᖑᐃᓯᕐᕕᒻᒧᑦ. ᑖᓐᓇ ᓄᓇᐅᑉ ᓇᓗᓀᕐᑕᐅᓯᒪᓂᖓ ᐊᒥᓲᓕᖓᔪᓂᒃ ᐊᑑᑎᕕᐅᖃᑦᑕᑐᖅ ᒥᕐᖑᐃᓯᕐᕕᒻᒥ ᐊᒻᒪᓗ ᐳᓚᕋᑦᑐᓄᑦ ᐱᕕᑦᓴᓯᐊᖑᔪᖅ ᐊᑐᕐᑕᐅᔪᓐᓇᓗᓂ ᓱᕐᕋᑕᐅᓯᒪᖏᑦᑐᖅ ᐱᐅᓯᑐᖃᕐᓂᓗ ᐱᑕᖃᕐᓱᓂ ᑑᕐᙰᑦ ᖃᕐᖃᕐᓱᐊᖏᑦᑕ ᓯᓚᕐᕿᔮᕐᕕᖓ ᐊᒥᓲᖏᑦᑐᓂᒃ, ᐱᑕᖃᕐᐸᑦ, ᐱᓇᓱᐊᕐᕕᐅᒍᓐᓇᑐᖅ ᐱᓇᓲᑎᑕᖃᕈᓐᓇᓱᓂᓗ.

ᐊᓪᓚᑕᐅᓯᒪᔪᖅ 3 - ᓱᕐᕋᑕᐅᓯᒪᖏᑦᑐᖅ ᓄᓇ ᐊᕙᑎᒦᑦᑐᖅ

ᓄᓇᐅᑉ ᐊᓪᓚᑕᐅᓯᒪᓂᖓ 3 ᒥᑭᔫᒐᓗᐊᖅ ᓇᓗᓀᕐᑕᐅᓯᒪᕗᖅ ᐊᒡᒋᒋᐊᕐᒥᒃ, ᐃᓱᒪᒋᔭᐅᔪᖅ ᖁᒻᒧᐊᑎᑕᐅᓯᒪᔪᒧᑦ ᐊᑐᕐᑕᐅᖃᑦᑕᓛᕐᓂᐊᓱᓂ ᑖᓐᓇ ᓄᓇᓕᒃ ᐳᓚᕋᑦᑐᓄᑦ ᐱᔨᑦᓯᕈᑕᐅᒐᔭᕐᑎᓪᓗᒍ ᐱᑐᑦᓯᒪᕕᐅᒍᓐᓇᓗᓂ ᖃᕆᑕᐅᔭᑎᒍᑦ ᐱᐅᓯᑐᖃᓕᕆᓂᕐᒧᑦ ᖃᐅᔨᓇᓱᐊᕐᓂᒧᑦ ᐊᒻᒪᓗ ᐅᓪᓕᕕᐅᖃᑦᑕᓗᓂ ᐱᓱᑦᑐᓄᑦ ᐅᓪᓗᒥᒃ ᐊᑕᐅᓯᐅᖏᑦᑐᒥᒃ ᐅᓪᓕᒋᐊᖃᓚᖓᔪᓄᑦ ᐊᖅᑯᑎᒋᔭᐅᖃᑦᑕᓪᓗᓂ.

ᖃᐅᔨᓇᓱᐊᕐᕕᐅᖃᑦᑕᓗᓂᓗ ᒥᕐᖑᐃᓯᕐᕕᐅᑉ ᒥᑦᓵᓅᓕᖓᔪᓂᒃ ᓄᓇᒥᒃ ᐱᐅᓯᑐᖃᕐᓅᓕᖓᔪᓂᓪᓗ ᖃᐅᔨᓇᓱᐊᕐᕕᐅᖃᑦᑕᓗᓂ, ᓇᓗᓀᕐᑕᐅᒋᐊᓪᓚᓯᒪᓂᖓ ᐃᓱᒪᒋᔭᐅᓯᒪᕗᖅ ᐱᓇᓱᐊᖃᑎᒌᑦᑐᓄᑦ ᐊᐅᓚᑕᐅᓗᓂ ᑲᑎᒪᔨᓄᑦ. ᐊᐅᓚᑦᓯᕕᐅᔫᑉ ᓄᓇᖓ ᓇᓗᓀᕐᑕᐅᓯᒪᕗᖅ ᐋᖅᑭᑕᐅᕙᓪᓕᐊᓛᕐᓂᐊᑎᓪᓗᒍ ᑕᒪᒃᑯᐊ ᐊᑑᑎᓕᕐᑎᑕᐅᑦᓯᐊᓕᑐᐊᕐᐸᑕ ᐸᕐᓇᑕᐅᓯᒪᔪᐃᑦ ᐃᓂᑦᓴᐅᔪᓪᓗ ᓇᓗᓀᕐᓯᒪᑦᓯᐊᓛᕐᓂᐊᓱᑎᒃ ᓄᓇᖕᖑᐊᒃᑯᑦ ᐊᓪᓚᑕᐅᓯᒪᑦᓯᐊᓗᑎᒃ.

ᒥᕐᖑᐃᓯᕐᕕᒨᕈᓐᓇᓂᖅ

ᑑᕐᙰᑦ ᖃᕐᖃᕐᓱᐊᖏᑦᑕ ᓯᓚᕐᕿᔮᕐᕕᖓ ᑕᕐᕋᒦᓐᓂᓴᐅᕗᖅ ᒥᕐᖑᐃᓯᕐᕕᒻᒥ ᐅᐸᒋᐊᖓ ᐱᔭᕐᓃᖅᑐᒐᓚᐅᑦᓱᓂ. ᐅᐱᕐᖔᒥ ᐅᐸᑦᑕᐅᔪᓐᓇᓯᐊᕋᔭᕐᑐᖅ ᖃᖓᑦᑕᔫᒃᑯᑦ ᐅᕝᕙᓗ ᐅᒥᐊᒃᑯᑦ ᓵᑕᕐᑕᐅᓯᒪᔪᒃᑯᑦ ᐱᒋᐊᕙᓪᓗᓲᑦ ᖄᐱ ᕚᓕ ᒎᓯᐯᒥᑦ, ᓂᐅᕙᓪᓛᓐ ᐊᒻᒪᓗ ᓈᐸᑐᐊᒥᑦ ᐅᕝᕙᓗᓘᓐᓃᑦ ᑰᑦᔪᐊᒥᑦ, ᓄᓇᕕᒻᒥᑦ. ᐃᓄᐃᑦ ᐅᑭᐅᒃᑯᑦ ᓯᑭᑑᕐᓱᑎᒃ ᒥᕐᖑᐃᓯᕐᕕᓕᐊᓲᑦ. ᑲᓇᑕᐅᑉ ᒥᕐᖑᐃᓯᕐᕕᓕᕆᔨᖏᑦᑕ ᐊᐅᓚᑦᓯᔨᖏᑦ ᒥᖃᑦᑕᕈᓐᓇᐅᑎᓂᒃ ᖃᖓᑦᑕᔫᓄᑦ ᐊᓚᑦᓯᔨᐅᔪᑦ ᓂᐅᕐᕈᑐᑦ ᓄᓇ ᐃᓗᕐᖁᓯᕐᒨᓕᖓᔪᓪᓗ ᒥᕐᖑᓯᐃᕐᕕᒥ ᓴᐳᒻᒥᔭᐅᑦᓯᐊᖁᑦᓱᒋᑦ.

---

ᐊᕙᑎᐅᑉ ᖃᐅᔨᓴᕐᑕᐅᒍᑎᑦᓴᖏᑦ ᓀᓪᓕᑎᕐᓯᒪᔪᑦ

ᒥᕐᖑᐃᓯᕐᕕᓕᒫᑦ ᑲᓇᑕᒥ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎᖏᑦ ᖃᐅᔨᓴᕐᑕᐅᖄᓲᑦ ᐸᕐᓇᓯᒪᐅᑏᑦ ᐊᕙᑎᑦᑎᓅᓕᖓᔪᓂᒃ ᖃᐅᔨᓴᕐᑕᐅᓂᒃᑯᑦ ᑐᑭᓯᓴᖁᓪᓗᒋᑦ ᓱᓀᑦ ᐱᐅᔫᒐᔭᕐᒪᖔᑕ ᓱᕐᕋᑕᐅᒍᓯᖏᑦ. ᑌᒫᒃ ᑐᑭᓯᒪᓂᖅ ᖃᐅᔨᒪᔭᐅᔪᐃᑦ ᑐᖕᖓᕕᒋᑦᓱᒋᑦ ᑐᑭᑖᕈᑎᒋᕋᓱᐊᕐᓱᒋᑦ ᓄᓇᒨᓕᖓᔪᐃᑦ ᖃᓄᐃᖕᖏᓯᐊᕐᓂᓴᖏᓐᓄᑦ ᐅᕝᕙᓘᓐᓃᑦ ᐋᕐᕿᒋᐊᕐᑕᐅᖑᓱᑦᑐᓄᑦ ᐃᓅᓯᕐᒥᒃ ᐸᕐᓇᓯᒪᐅᑎᑎᒍᑦ. ᐸᕐᓇᓯᒪᐅᑏᑦ ᐊᕙᑎᑦᑎᓅᓕᖓᔪᓂᒃ ᖃᐅᔨᓴᕐᑕᐅᓂᒃᑯᑦ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎᖏᓐᓂᒃ ᑑᕐᙰᑦ ᖃᕐᖃᓱᐊᖏᑦᑕ ᓯᓚᕐᕿᔮᕐᕕᖓ ᒥᕐᖑᐃᓯᕐᕕᑯᖏᓐᓄᑦ ᐃᓱᒪᒋᔭᐅᔪᑦ ᓱᕐᕃᒍᑎᐅᒍᓐᓇᑐᐃᓐᓇᕆᐊᓖᑦ ᓯᓚᐅᑉ ᐅᕐᖂᓯᕙᓪᓕᐊᓂᖓᓄᑦ, ᓄᓇᓕᒻᒥᒃ ᐊᒻᒪᓗ ᓄᓇᓕᓕᒫᓂᒃ ᓱᖃᑦᓯᐅᑎᐅᓲᓂᒃ ᒥᕐᖑᐃᓯᕐᕕᐅᑉ ᓯᓚᑖᓂ, ᓂᕆᐅᒋᔭᐅᔪᑦ ᐳᕐᑐᓯᒋᐊᓛᕐᓂᖏᑦ ᐳᓛᕆᐊᕐᑐᐃᑦ ᐊᒻᒪᓗ ᐅᓐᓂᑑᑎᐅᔪᐃᑦ ᐊᐅᓚᑦᓯᓂᕐᒧᑦ ᐸᕐᓀᒍᑎᓂᒃ. ᐸᕐᓇᓯᒪᐅᑏᑦ ᐊᕙᑎᑦᑎᓅᓕᖓᔪᓂᒃ ᖃᐅᔨᓴᕐᑕᐅᓂᖏᑦ ᖃᐅᔨᓴᕐᑕᐅᓯᒪᔪᐃᑦ ᓱᕐᕃᑐᐃᓐᓇᕆᐊᖃᕐᓂᖏᑦ ᐊᑦᔨᒌᖕᖏᑐᓂᒃ ᐃᓂᐅᔪᓂᒃ ᓄᓇᒨᓕᖓᔪᓂᒃ, ᐃᓚᐅᑎᓪᓗᒋᑦ: ᑑᕐᙰᑦ ᖃᕐᖃᓱᐊᖏᑦᑕ ᑐᑦᑐᖁᑎᖏᑦ, ᓄᓇ (ᐱᕈᕐᑐᖏᑦ ᐱᕈᕐᑑᖏᑦᑑᒐᓗᐊᓪᓗ), ᓄᓇᒥᐅᑌᑦ ᐃᒪᕐᐱᒥᐅᑌᓪᓗ ᐆᒪᔪᐃᑦ (ᐃᓚᐅᑎᓪᓗᒋᑦ ᐃᓱᐃᓗᑌᑦ ᐊᒻᒪᓗ ᓇᔪᒐᕆᓲᖏᑦ), ᐃᓗᕐᖁᓯᓅᓕᖓᔪᐃᑦ (ᑐᓂᑦᑕᓂᐊᕐᕖᑦ, ᑐᓂᑦᑕᓂᐊᕈᑎᑦᓭᑦ, ᓄᓀᑦ ᐱᐅᓯᖏᑦ ᓄᓀᓪᓗ ᐃᓗᓕᖏᑦ) ᐃᒪᑐᐃᓐᓇᓃᓲᑦ (ᐃᖃᓗᑉᐲᑦ, ᑑᓪᓖᑦ, ᖁᐱᕐᕈᐃᑦ, ᐊᒻᒪᓗ ᓇᔪᒐᓖᑦ), ᐃᓄᐃᑦ ᓄᓇᒥᐅᑌᑦ, ᐊᒻᒪᓗ ᐊᕙᑎᖏᓐᓅᓕᖓᔪᐃᑦ ᐱᒻᒪᕇᑦ ᐳᓛᕆᐊᕐᑐᓄᑦ ᑕᑯᑦᓴᐅᓲᑦ.

ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎ ᐊᒥᓱᓂᒃ ᐱᐅᔪᓂᒃ ᓱᕐᕃᒍᑎᖃᕋᔭᕐᑐᖅ ᐊᕙᑎᖏᓐᓅᓕᖓᔪᓂᒃ, ᐃᓚᐅᑎᓪᓗᒋᑦ ᐊᐅᓚᑕᐅᑦᓯᐊᓂᕐᓴᐅᓗᑎᒃ ᓄᓇᒨᓕᖓᔪᐃᑦ ᐊᒻᒪᓗ ᐃᓗᕐᖁᓯᕐᒨᓕᖓᔪᐃᑦ ᑐᑭᓯᒪᓂᕐᓴᐅᓕᕐᓗᑎᒃ ᓄᓇᒨᓕᖓᔪᐃᑦ ᐱᐅᓯᒋᓲᖏᓐᓂᒃ ᐊᒻᒪᓗ ᐱᕐᖁᓯᒋᔭᐅᓯᒪᔪᐃᑦ ᐱᐅᓯᖏᓐᓂᒃ ᐃᓗᕐᖁᓯᕐᑎᒍᑦ ᐊᑐᕋᑦᓴᐅᔪᓂᒃ ᐊᒻᒪᓗ ᓄᓀᑦ ᐱᐅᓯᖏᓐᓂᒃ ᒥᕐᖑᐃᓯᕐᕕᒥ; ᐱᐅᓂᕐᓴᒥᒃ ᖃᐅᔨᓴᕐᓂᖃᖃᑦᑕᓕᕐᓗᑎᒃ ᐊᒻᒪᓗ ᑲᒪᒋᔭᖃᖃᑦᑕᓗᑎᒃ ᐱᓇᓱᐊᖃᑎᒋᔭᐅᑎᓪᓗᒋᑦ ᐃᓄᐃᑦ ᓄᓇᓕᖏᑦ ᐊᒻᒪᓗ ᐱᕕᑦᓴᓯᐊᕌᓗᐃᑦ ᖃᐅᔨᒪᔭᐅᔪᑐᖃᕐᑎᒍᑦ; ᐊᒻᒪᓗ ᐃᓄᐃᑦ ᐱᕚᓪᓕᕈᑎᑦᓴᖏᑎᒍᑦ ᐱᑐᑦᓯᒪᐅᓯᕆᓲᖏᓐᓄᑦ ᓄᓇᒥ ᒥᕐᖑᐃᓯᕐᕕᒦᒍᓐᓇᓯᓕᐅᒥᑎᓪᓗᒋᑦ, ᐊᒻᒪᓗ ᐅᕕᒃᑲᓂᒃ ᐃᓚᐅᑎᑦᓯᓂᕐᓴᐅᓗᑎᒃ ᓄᓇᒦᓐᓂᒥᒃ.

ᐳᕐᑐᓯᒋᐊᕐᑎᓗᒋᑦ ᐳᓛᕆᐊᕐᑐᐃᑦ/ᖃᐅᔨᓴᕐᑏᑦ ᐃᓚᐅᑎᑕᐅᓂᖏᑦ ᓄᓇᒥ ᓇᓗᓀᕐᑕᐅᓯᒪᔪᕐᑎᒍᑦ ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎᐅᔪᒥ ᐱᐅᖕᖏᑐᒥᒃ ᐊᕙᑎᖏᓐᓅᓕᖓᔪᒥᒃ ᓱᕐᕃᓯᒪᑐᐃᓐᓇᕆᐊᓕᒃ. ᑌᒣᒐᓗᐊᕐᑎᓗᒍ, ᑕᒪᒃᑯᐊ ᓱᕐᕋᑕᐅᒪᔪᐃᑦ ᐳᒃᑭᓕᒋᐊᕐᑕᐅᕈᓐᓇᑐᑦ ᐸᕐᓇᓯᒪᐅᑎᓕᐅᕐᓂᑯᑦ ᐊᐅᓚᑦᓯᓂᕐᒧᑦ ᐸᕐᓀᒍᑏᑦ ᐃᓗᐊᓂ ᐊᒻᒪᓗ ᐱᐅᓯᐅᒥᒋᐊᕐᑕᐅᕆᐊᓖᑦ ᓇᓗᓀᕐᑕᐅᓯᒪᓗᑎᒃ ᐸᕐᓇᓯᒪᐅᑏᑦ ᐊᕙᑎᖏᓐᓅᓕᖓᔪᐃᑦ ᖃᐅᔨᓴᕐᑕᐅᒍᑎᑎᒍᑦ, ᐃᓚᐅᑎᓪᓗᒋᑦ ᐊᐅᓚᑦᓯᒐᓱᐊᕐᓂᖅ ᐃᓄᐃᓪᓗ ᐆᒪᔪᐃᓪᓗ ᐸᑦᓯᒪᐅᑎᓂᖏᑦ; ᐱᓇᓱᐊᖃᑎᒌᖃᑦᑕᓗᒋᑦ ᐅᒥᐊᕐᔪᐊᓂᐊᕐᑏᑦ ᐃᓱᒪᒋᑦᓯᐊᓗᒋᓪᓗ ᐊᕙᑎᖏᓐᓅᓕᖓᔪᐃᑦ ᓱᕐᕋᑕᐅᓂᕆᓲᖏᑦ ᐅᒥᐊᕐᔪᐊᑉ ᒪᓕᒐᖏᑦᑕ ᕿᒥᕐᕈᔭᐅᒋᐊᕐᑎᓗᒋᓪᓗ; ᐊᒻᒪᓗ ᐸᕐᓇᓯᒪᐅᑏᑦ ᐃᓗᐊᓂ ᐳᒃᑭᓕᕆᐊᕐᑕᐅᑎᓗᒋᑦ ᓱᕐᕋᑕᐅᓲᑦ ᐃᓗᕐᖁᓯᑎᒍᑦ ᐱᓂᐊᕐᓂᕆᔭᐅᓲᑦ ᓯᓚᐅᑉ ᐊᓯᑦᔨᐸᓪᓕᐊᓂᖓ ᐱᑦᔪᑎᒋᑦᓱᒍ. ᐱᓇᓱᐊᕋᑦᓭᑦ ᓱᕐᕃᓂᕆᓲᖏᑦ ᖃᐅᔨᓴᕐᑕᐅᖑᓱᑦᑐᑦ ᐊᑑᑎᔭᐅᒋᐊᖃᕐᒪᑕ ᐊᒻᒪᓗ ᐅᓐᓂᑑᑎᓕᐅᕈᑎᐅᒐᔭᕐᓱᑎᒃ ᐸᕐᓇᓯᒪᐅᑎᑎᒍᑦ ᐊᕙᑎᖏᑦᑕ ᖃᐅᔨᓴᕐᑕᐅᖁᓪᓗᒋᑦ ᑭᖕᖒᒪᒋᔭᐅᑉᐸᑕ, ᐱᓗᐊᕐᑐᒥᒃ ᐳᕐᑐᓯᕙᓪᓕᐊᔪᒥᒃ ᓱᕐᕋᑕᐅᑐᐃᓐᓇᕆᐊᖃᖃᑦᑕᕋᔭᕐᐸᑕ.

ᐃᓄᐃᑦ ᐱᓇᓱᖃᑎᕗᑦ, ᐱᖃᖃᑕᐅᔪᐃᑦ ᐊᒻᒪᓗ ᓇᐅᑐᐃᓐᓀᑦ ᐃᑲᔪᖃᑦᑕᓯᒪᕗᑦ ᐅᖃᐅᓯᑦᓴᖃᕈᓐᓇᓱᑎᓪᓗ ᐸᕐᓇᑕᐅᔪᓄᑦ ᐱᕙᓪᓕᐊᔭᐅᔪᓄᑦ, ᐊᒻᒪᓗ ᓯᕗᓂᕆᔭᐅᔪᒪᔪᐃᑦ ᓀᓕᒋᐊᕐᓯᒪᑎᓪᓗᒋᑦ ᐊᕙᑎᑦᑎᓅᓕᖓᔪᑦ ᐱᓇᓱᐊᕐᑕᐅᓂᖏᓐᓄᑦ, ᓇᐅᑐᐃᓐᓀᓪᓗ ᐅᖃᐅᓯᕆᓯᒪᔭᖏᑦ, ᐃᓄᓐᓄᑦ ᐊᒻᒪᓗ ᐱᖃᖃᑕᐅᔪᓄᑦ ᐃᓕᑕᕆᔭᐅᒪᔪᓄᑦ ᓯᕗᓂᑦᓴᒨᓕᖓᔪᓄᑦ ᐊᕙᑎᒥᐅᑕᓕᕆᓂᕐᒧᑦ ᐃᑲᔪᕐᕐᓯᕈᑕᐅᑦᓱᑎᒃ ᐊᒻᒪᓗ ᐊᐅᓚᑦᓯᓂᕐᒧᑦ ᐸᕐᓀᑕᐅᓯᒪᔪᓄᑦ ᓈᒻᒪᓈᕐᓯᒪᔪᓄᑦ.

ᐸᕐᓇᓯᒪᐅᑎᑦᓭᑦ ᐊᕙᑎᖏᓐᓅᓕᖓᔪᐃᑦ ᖃᐅᔨᓴᕐᑕᐅᓂᑦᓴᖏᓐᓄᑦ ᓄᐃᑕᐅᓚᐅᕐᓯᒪᔪᖅ ᒪᓗᑦᓱᒋᑦ ᐳᕐᑐᓂᕐᓴᒥ ᒥᓂᔅᑕᒃᑯᑦ ᑐᑭᒧᐊᕐᑎᓯᔨᖏᓐᓄᑦ ᐊᕙᑎᖏᓐᓅᓕᖓᔪᐃᑦ ᖃᐅᔨᓴᕐᑕᐅᓂᑦᓴᖏᑦ ᒪᓕᒐᑦᑎᒍᑦ, ᐸᕐᓀᓂᒃᑯᑦ ᐊᒻᒪᓗ ᐱᓇᓱᐊᕋᑦᓭᑦ ᐅᓐᓂᑑᑎᐅᓂᖏᓐᓄᑦ (2010) ᐊᒻᒪᓗ ᖃᐅᔨᓴᕐᓂᐅᔪᓂᒃ ᐃᑲᔪᕐᓯᒍᑎᕕᓂᐅᑦᓱᓂ ᖃᓄᖅ ᐊᐅᓚᑦᓯᓂᕐᒧᑦ ᐸᕐᓀᒍᑏᑦ ᐊᑐᕐᑐᓯᐊᖑᒻᒪᖔᑕ ᑲᓇᑕᒥ ᓱᒃᑯᑎᕆᑦᑌᓕᒪᓂᕐᒧᑦ ᐱᕙᓪᓕᐊᒍᑎᑦᓴᐅᔪᓂᒃ ᐸᕐᓀᓂᒃᑯᑦ. ᐱᓇᓱᐊᕋᑦᓭᑦ ᑲᔪᓯᑎᑕᐅᖁᓪᓗᒋᑦ ᐊᐅᓚᑦᓯᓂᕐᒧᑦ ᐸᕐᓀᒍᑏᑦ ᑐᕌᒐᖏᑦ ᖃᐅᔨᓴᕐᑕᐅᒋᐊᖃᕋᔭᕐᑐᑦ ᓱᕐᕋᑕᐅᕋᔭᕐᒪᖔᑕ ᑲᒪᒋᔭᐅᒋᐊᖃᕋᓗᐊᕐᒪᖔᑕ ᓱᕐᕃᒍᑎᐅᒐᔭᕐᒪᖔᑕ ᖃᐅᔨᓴᕐᑕᐅᓂᑦᓴᖏᑦ ᐱᖁᔭᖅ, ᐅᕝᕙᓘᓐᓃᑦ ᐱᖁᔭᓕᐅᕐᑎᒧᑦ. ᐊᐅᓚᑦᓯᓂᕐᒧᑦ ᐸᕐᓇᓯᒪᐅᑎ ᐃᑲᔪᕐᓯᓲᖑᕗᖅ ᑲᓇᑕᒥ ᓱᒃᑯᑎᕆᑦᑌᓕᒪᓂᕐᒧᑦ ᐱᕙᓪᓕᐊᒍᑎᑦᓴᐅᔪᓂᒃ ᐸᕐᓀᕈᑏᑦ ᑐᕌᒐᖃᕐᓱᑎᒃ ᑲᓇᑕᒥᐅᓂᒃ ᐱᑐᑦᓯᒪᑎᑦᓯᒐᓱᐊᕐᓂᖅ ᓄᓇᒧᑦ.

ᐊᒥᓱᑦ ᐊᕙᑎᒥᐅᑕᒨᓕᖓᔪᐃᑦ ᐊᑑᑎᖃᑦᓯᐊᑐᐃᑦ ᓂᕆᐅᒋᔭᐅᕗᑦ ᐊᒻᒪᓗ ᓈᒻᒪᑦᓴᖏᓪᓚᕆᑦᑐᒥᒃ ᐱᓪᓚᕆᐅᔪᒥᒃ ᐱᑕᖃᓚᐅᖏᑦᑐᐃᑦ ᑕᒪᑦᓱᖕᖓᓕᖓᔪᒥᒃ ᐊᑑᑎᓕᕐᑎᑕᐅᓂᐊᖓᓄᑦ ᑑᕐᙰᑦ ᖃᕐᖃᕐᓱᐊᖏᑦᑕ ᓯᓚᕐᕿᔮᕐᕕᖓ - ᑑᕐᖓᑦ ᖃᖅᑲᖏᓐᓂ ᒥᕐᖑᐃᓯᕐᕕᒃ ᑲᓇᑕᒥ ᐊᐅᓚᑕᐅᓂᖓᓅᓕᖓᔪᓄᑦ ᐸᕐᓀᑕᐅᓯᒪᔪᓄᑦ.